Strandvolleyball

Vun Wikipedia
Wesseln na: Navigatschoon, Söök
Strandvolleyball
De düütsche Speler Stefan Uhmann
Spelersche un Schiedsrichter

Strandvolleyball oder ok Beachvolleyball is en olympische Mannschopssportoort ut de Koppel vun de Torüchslagspelen, bi de sik twee Mannschoppen, elk mit twee Spelers, op en dör en Nett ünnerdeelt Speelfeld ut Sand gegenöverstaht. Dat Teel is dorbi, en Ball över dat Nett op den Bodden vun’t gegnerische Speelfeld to spelen oder de annere Mannschop so antospelen, dat se en Fehler maken deit. Entwickelt hett sik Strandvolleyball in de 1920er Johren in de USA as en Afoort vun’n normalen Hallen-Volleyball. Mit de Tiet is disse Afoort jümmer mehr professionaliseert worrn, üm wegtokamen vun den Roop as reinen Freetietsport. Bi de olympschen Spelen 1996 is Strandvolleyball dat eerste mol Deel vun’t offizielle Programm wesen un 1997 fünnen in Los Angeles to’n eersten mol offizielle Strandvolleyball-Weltmeesterschoppen statt. To Anfang weern vör allen de Mannschoppen ut de USA un Brasilien de annern vörut, later hebbt aver ok annere Natschonen as Düütschland, China oder Australien Medaillen wunnen.

Regeln[ännern | Bornkood ännern]

Spelers[ännern | Bornkood ännern]

Bi offizielle Wettstrieden besteiht en Strandvolleyball-Mannschop ut twee Spelers. Gröttere Mannschoppen gifft dat blots in’t Training oder bi Freetietveranstalten. De Mannslüüd drägt Shorts un en Shirt, wiel de Fronslüüd in’n Bikini spelen doot. Wenn dat Weder koolt is oder dat regen deit kann ok warmere Kledaasch verlööft warrn. De Spelers speelt plattbarft op dat Feld.

Speelfeld[ännern | Bornkood ännern]

Dat Speelfeld is rechteckig mit en Flach vun 16 mol 8 Meters, de vullstännig mit Sand bedeckt is. In de Mitt warrt dat Feld dör en Nett in twee Speelhälften splitt. Dat Nett hett en Hööch an de böveren Kant vun 2,43 m bi de Mannslüüd un vun 2,24 m bi de Fronslüüd un driggt an de Ennen en Antenn. Buten de Sietenlienen is en Freezoon vun tomindst dree Meters vörschreven. En Middellien gifft dat nich, aver en Speler dröff blots denn op de gegnerische Hälft pedden, wenn de Gegner dorbi nich stört warrt.

Ball[ännern | Bornkood ännern]

En Strandvolleyball

De Ball besteiht buten ut en waterafwiesen, week Material (tomeist Kunstledder) un en Gummiblaas binnen in. He mutt de Bedingen in’t Fre’e, as Water un Sand, afkünnen un schüll helle Klören opwiesen. Mit en Ümfang vun 66 bit 68 cm un en Gewicht vun 260 bit 280 g is de Ball ’n lütt beten grötter as de Hallenvolleyball. De Binnendruck is mit 171 bit 221 mbar dorgegen aver sieter as de Hallenvolleyball.

Afloop[ännern | Bornkood ännern]

De Ballwessel fangt mit’n Opslag an, de vun achter de Grundlien slahn warrn un op direkten Weg twüschen de beiden Antennen över’t Nett gahn mutt. De Gegner-Mannschop mutt dorbi fre’e Sicht op den Speler hebben, de den Opslag maken deit, un kann dat wenn nödig ok bi’n Schiedsrichter infoddern. De Speler, de den Opslag maken mutt, wesselt mit Winnen vun’t Opslagrecht. Stellt dat Schiedsgericht en Fehler in de Reeg fast, warrt de Wessel eerst denn maakt, de Speelstand warrt nich nadräglich richtig stellt.

En Mannschop mutt den Ball na höchstens dreemol Anröhren wedder torüch över dat Nett spelen. De Block tellt dorbi as eersten Ballkuntakt – anners as bi’n Hallenvolleyball. De beiden Spelers vun een Mannschop mööt den Ball afwesselt spelen. Utnahmen sünd direkt na’n Block – dor dröff de Speler, de blockt hett den Ball noch en tweet mol anröhren – oder wenn dat bi’n eersten Ballkuntakt „bi de sülven Akschoon“ to en Dubbelanröhren kamen is, as to’n Bispeel vun’n Arm op’n annern Deel vun’n Lief.

Tospeel vun ünnen

Der Ball dröff mit all Deelen vun’n Lief speelt warrn, wobi dat Tospeel vun baven oder vun ünnen maakt warrn kann. Bi’t Tospeel vun baven seht de Regeln en „reine“ Technik vör. De Ball dröff blots över dat Nett pritscht warrn, wenn he in’n rechten Winkel to de Schullerass, also graad na vörn oder na achtern, nich aver na de Siet speelt warrt. Anners is dat Pritschen över’t Nett blots verlööft, wenn dat ahn Afsicht passeert, also en klore Afsicht to’n Tospeel to sehn weer. Dat kann to’n Bispeel wesen, wenn de Ball dör den Wind in’t annere Mannschopsfeld weiht warrt. Dat Leggen mit apene Hand oder de ut de Hall bekannte Lob (Angreepsfinte mit eenhännig Tospeel vun Baven mit apene Hand) is nich verlööft un gellt as technischen Fehler.

In de Feldafwehr is dat bövere Tospeel mit Help vun de Fingers (apene Hand) ok streng regelt. De Ball dröff nich föhrt (to lang anröhrt) und o nich fangen oder smeten warrn. Eenzige Utnahm is en Ball, de hard slahn weer, bi denn en licht Föhren mööglich is (so nöömten „Beachdig“). Dorbi warrt de Hannen mit schalenförmig hollen Handflachen na’n Ball föhrt un de denn dör en aktiv Strecken vun de Arms speelt. Wanneer en Ball as „hard slahn“ gellt, hangt af vun de Reakschoonstiet, de de Afwehrspeler hett, den Afstand, den de Ball torüchleggt hett un de Snelligkeit un de Flaagbahn. En Opslag fallt nich ünner disse Regel.

Bit 1990 weern in de US-amerikaanschen Beachball-Reeg pritschte Bäll al as technisch fehlerhaft ansehn, wenn se in de Luft tweemol roteern deen. In’n europääschen Ruum weer disse Regel nich anwennt, liekers warrt op dat kontrolleerte Utföhren vun dat böverer Tospeel sünners acht. Dat Tospeel dör korte Bewegungsimpulsen ut de Fingers, as dat in’t Hallenvolleyball tyypsch is, warrt bi’n Strandvolleyball faken as to „hard“ affleit.

Tellwies[ännern | Bornkood ännern]

Kann en Mannschop den Ball nich na de Regeln wedder torüchspelen, kriggt de Gegner een Punkt. Punkt kann en Mannschop bi egenen aver ok bi’n gegnerischen Opslag maken (Rally-Point-System). Dat Speel warrt över twee Winnsätz utspeelt. In de eersten beiden Sätz warrt dorto 21 Punkten bruukt. In’n drüdden Satz (Tie-Break) warrt 15 Punkten speelt. En Satz gellt eerst as wunnen, wenn en Mannschop twee Punkten Vörsprung hett. Üm Nadeelen uttoglieken, de ünner fre’en Himmel vörkamen künnt (to’n Bispeel Wind, oder wenn de Sünn blennt), warrt jümmer na söven Punkten (in’n Tie-Break na fief) de Sieten wesselt.

Uttiet[ännern | Bornkood ännern]

Jeedeen Mannschop kann in jeden Satz en Uttiet nehmen, un kann free bestimmen, wanneer se de nehmen will. Wieter schrifft dat Regelwark na 21 speelte Punkten en technische Uttiet vör, de dörtig Sekunnen duert. Dat gellt aver nich in drüdden Satz. Butendem drööft de Spelers dat Spel kort ünnerbreken, üm jemehr Sünnbrillen rein to maken. Faken warrt dat utnütt um dat fleten Speel vun’n Gegner to stören. De Schiedsrichter mutt dorüm en Speler verwarnen, wenn he dit taktische Middel to faken insetten deit. Schüll sik en Speler wiel dat Speel wat doon, hett de bedrapene Mannschop fief Minuuten Tiet, den Speler wedder in en Tostand to bringe, dat he wieterspelen kann. Wenn dat nich geiht, warrt dat Speel afbroken un för den Gegner weert. Wenn de Bedingen to slecht sünd (to’n Bispeel bi starken Regen), warrt dat Speel ünnerbroken un bi glieken Speelstand later wieterspeelt.

Technik[ännern | Bornkood ännern]

Baggern bi de Annahm

De grundsätzlichen Techniken vun’t Speel sünd jüst so as bi’n Volleyball in de Hall, vunwegen dat sik dat Speel dorvun afleiden deit. Man ünnerscheedt twüschen dat ünnere un bövere Tospeel. Dat bövere Tospeel warrt ok „Pritschen“ nöömt. Dorbi speelt de Speeler den Ball mit apene Hannen un afspreizte Fingers tomeist vör oder över’n Kopp. Dör de strengen Regeln bi’n Strandvolleyball un de Unsekerheit bi’t Utleggen dorvun hett dat ünnere Tospeel (oder „Baggern“) sünners bi de Profis de gröttere Bedüden as in de Hall. Dorbi wart de Ball mit de utstreckten Arms speelt, de blangenenanner hollen warrt.

Bi’n Strandvolleyball gifft dat aver en poor tosätzliche Techniken, de in de Hall normalerwies nich bruukt warrt. De bekanntste Technik in’n Angreep is de so nöömte Pokeshot (vun’t engelsche poke = „Stoot, Schubs“). Dorbi warrt de Ball mit de middleren Lidden vun twee oder mehr Fingers över’t Nett stött. En gröttere Hööch kriggt man bi’n Cobrashot, bi den de Ball mit de Fingerspitzen vun de utstreckten Hand piel to’n Middelpunkt speelt warrt. Disse beiden Techniken drööft anwennt warrn, vunwegen dat se weniger Ballkontroll beden doot as de Lob.

De Pokeafwehr warrt to’n Afwehren vun Ball vöer Bosthööch bruukt, de wieter weg sünd un blots mit een Hand to kriegen sünd. Dat Handgelenk is jüst so as bi’n Angreepspoke böögt oder streckt, aver nienich överstreckt. De Impeuls warrt afhangig vun de Positschoon to’n Ball ut dat Handlidd un/oder ut den Ellbagen oder de Schuller överdragen. De so nöömte Tomahawk is en Technik, bi de man Bäll, de nich hard slahn sünd, dicht an’n Lief mit an’anner leggte Hannen bi slaten Fingers över de Schuller (also in oder över Kopphööch) afwehrt. De Fingerlidden överlappt sik dorbi un de Duumens wiest na baven. De Ball warrt mit de Handkanten speelt un kriggt den Impeuls dör dat lichte Strecken vun de Arms. To’n afwehren vun hard slahne Bäll dicht an’n Lief in Bosthööch bruukt man de Chickenwing-Technik. Dorbi deent en gliek dull böögten Böver- un Ünnerarm oder Ellbagen as Speelflach – ünnerstütt, wenn nödig, dör de Bost oder de Schuller vun de glieken Liefhälft. De Impuls kummt hier dör’t Anböhren vun de Arms un Schuller. De Gatordig (eng.: gator = Alligator) warrt bi harde Bällöver Hüfthööch anwennt. Se warrt dicht an’n Lief mit beide Hand-Binnenflachen afwehrt, wobi de Hannen tosamen ein Korf billt[1].

Kommunkatschoon[ännern | Bornkood ännern]

Handteken bi’n Strandvolleyball

Wiel dat Speel drööft keen Anwiesen dör en Trainer geven warrn. De Spelers in en Mannschop mööt sik dorüm en Taktik torechtleggen, woans se sik gegensietig tosnacken künnt. Dat Snacken finnt tomeist twüschen de Ballwessels, wiel de Uttieten un in de Satzposen statt.

In Profi-Mannschoppen sünd de beiden Spelers normalerwies so tosammenstellt, dat sik een vun jem tomeist as Blockspeler inbringt, wiel de annere op de Annahm spezialiseert is. Üm jemehr Strategie to kommunizeeren, hebbt de Spelers en eenfack System vun Handteken utklamüstert. Vör den Opslag wiest de Speler, de in’t Feld steiht, mit sien Fingers achter’n Rüch an, woans de Block stellt warrt un in welke Richt oder op welken vun de beiden Gegners de Opslag gahn schall. De beiden Hannen beteht sik dorbi tomeist op de beiden Gegenspelers. En slaten Fuust bedüüt, dat keen Block plaant is, utstreckte Wiesfingers schüllt en Longline-Block (an de Lien langs) andüden un en V-Teken ut Wies- un Middelfinger wiest en schraag blockten Ball (Cross) an. Wenn bi’n längeren Ballwessel en ne’en Block nödig warrt, gifft de Blockspeler wietere Handtteken.

Tosätzlich to de Handteken warrt ok korte KOmmandos bruukt, üm den Mitspeler Anwiesen för den Angreep to geven. Begrepen, de dorbi faken bruukt warrt, sünd Line (Longline), Cross (schraag slahn Angreep), Shot (över’n Block op de Lien spelen) un Cut (korte, schraage Finte), ok in’n Tosamenhang mit -over (dorbi warrt blockt, so dat de ANgreep över’n Block speelt warrn mutt), to’ Bispeel Line-over. In’n düütschsprakigen Ruum sünd ok de Kommandos mit un ahn (Block) begäng.

Historie[ännern | Bornkood ännern]

Anfäng in de USA un in Brasilien[ännern | Bornkood ännern]

Dat eerste Strandvolleyball-Speel warrt den US-Amerikaner George David Center toschreven, de al 1915 mit Frünnen an’n Waikīkī-Strand op Hawaiʻi speelt hett. Verbreedt hett sik de Afoort vun’t Volleyball in de 1920er Johren in Santa Monica un an annere Strännen in Kalifornien. Eerste Strandvolleyballers geev dat tietgliek an de brasiliaanschen Strännen vun Copacabana un Ipanema. Vun 1922 an weern eerste Clubs grünnt, de ok bald anfungen hebbt, ünnerenanner Wettstrieden uttodrägen. As bi’n Hallen-Volleyball hebbt disse Mannschoppen noch mit söss Spelers in de Mannschop speelt. Dat vundaag blots noch mit twee Spelers speelt warrt, schall op den fröheren Hallen-Volleyballer Paul „Pablo“ Johnson torüchgahn, de in de 1930er Johren op eenige vun sien Mitspelers töven deen, de aver nich kemen. To disse Tiet weer de ne’e Spoortoort ok so langsom in Europa ankamen. Över Paris, woneem de Nudisten den Sport opgriepen deen, hett sik Strandvolleyball wieter na Oosten hen utbreedt. In dat folgen Johrteihnt weern in Santa Monica eerste Turneren organiseert. Dat eerste Priesgeld geev dat 1948 in Los Angeles to winnen. De Strand vun Hermosa Beach in’n Los Angeles County gellt bit vundaag as een vun de leevsten Speelöörd.

Noch gröttere Bedüden kreeg vun 1960 an de Strand vun Manhattan Beach in’n Los Angeles County, woneem de as „Godfather of Beach Volleyball“ bekannte Charlie Saikley de eersten Manhatten Beach Open organiseert hett, de siet 1965 jeed Johr stattfunnen hebbt un as dat „Wimbledon vun’n Strandvolleyball“ gellt[2]. De rutragene Speler Karch Kiraly, dör den dat Speel bekannter worrn is un de mit dorto bidragen hett, dat de dormolige Freetietsport vun de 1980er Johren an as professchonelle Sportoort achte worrn is, hett de sünnere Bedüden vun dat Turneer as folgt beschreven: „Du snackst mit jichtenseen Speler un vertellst em, dat he in sien hele Loopbahn blots een Turneer winnen künn, denn wull dat foorts jeedeen in Manhatten beleven. Dor gifft dat bi all Spelers en tosätzlich Füür.“[3] Mitt vun de 1970er Johren hebbt Wettstrieden stattfunnen, de as inoffizielle Weltmeesterschoppen ansehn weern. Butendem hett sik en eerste Turneerreeg entwickelt.

Olympsche Spelen[ännern | Bornkood ännern]

Olympsche Spelen 2008 in Peking

Bi de Olympsche Spelen 1992 in Barcelona is dat Speel op Sand as Demonstratschoonssportoort vörstellt worrn. De eenzige Speler, de bit hüüt de as eenzige in de Hall un op Sand olympsch Gold wunnen hett, is Karch Kiraly. Bi de Olympsche Spelen 1992 in Atlanta hett he sik mit sien Mitspeler Kent Steffes in en rein US-amerikaansch Endspeel dörsett. Veer Johr later hebbt wedder de US-Amerikaner wunnen, ditmol gegen de Brasilianers Zé Marco un Ricardo Santos. Dorna sünd ok annere Natschonen so stark worrn, dat se üm de Goldmedaille mitspelen deen. Bit letzte olympsche Turneer 2008 in Peking hebbt de USA jemehr drüdde Goldmedaille in’n Strandvolleyball wunnen.

Bi de Fronslüüd sünd all negen Demaillen vun de eersten dree Olympschen Spelen an de Mannschoppen ut Brasilien, de USA un Australien gahn. Sandra Pires un Jackie Silva (1996), Natalie Cook un Kerri Pottharst (2000) as ok Kerri Walsh un Misty May-Treanor (2004) hebbt dorbi in’t Endspeel jümmer gegen en brasiliaansch Duo wunnen. De letzten beiden hebbt 2008 noch en tweet mol wunnen, ditmol aver gegen de Mannschop ut China.

Weltmeesterschop[ännern | Bornkood ännern]

Hauptartikel: Strandvolleyball-Weltmeesterschop

Dat de Spelers ut de USA un ut Brasilien den Sport beherrschen doot, wiest sik ok bi de Resultaten vun de Weltmeesterschoppen. Dat harr in Rio de Janeiro al teihn internatschonale Turneeren geven, vördem 1997 in Los Angeles de eersten offiziellen Weltmeesterschoppen afholen weern. Bi de Fronslüüd heebt eerst de BRasilianers dree mol in de Reeg wunnen, dorna hebbt de US-Amerikanersches Walsh un May-Treanor dreemol wunnen. De eersten Deelnehmers an en Endrunn, de nich ut BRasilien oder de USA kemen, weern 2007 de Chinees’schen.

Bi de Mannslüüd güngen bit in’t Johr 2005 all Goldmedaillen na Süüdamerika – veermol na Brasilien un eenmol na Argentinien. Eerst 2007 hebbt de US-Amerikaners hier de Nees vör hatt. Bi de Meesterschoppen 2005 in Berlin hebbt Julius Brink un Jonas Reckermann in’t Endspeel gegen de Brasilianers wunnen un weern dormit de eerste europääsche Mannschop,m de den Weltmeester-Titel holt hebbt.

Europameesterschoppen[ännern | Bornkood ännern]

Hauptartikel: Strandvolleyball-Europameesterschop
De Winnersches vun de EM 2008 in Hamborg

De eersten Europameesterschoppen vun de Mannslüüd in’n Strandvolleyball hebbt 1993 in Almería stattfunnen. De Winners hebbt de eerste veer Johren wesselt, wobi de düütsche Mannschop mit Jörg Ahmann un Axel Hager 1994 un 1996 bit in de Medaillenplätz kamen sünd. Enn vun de 1990er Johren hebbt de Swiezer dat Turneer domineert, de veermool de Goldmedaille wunnen hebbt. Ok de Nedderlannen hebbt en Tiet lang an de Spitz stahn. Bi de Meesterschoppen 2011 in Kristiansand geev dat eerstmols en rein düütsch Endspeel. Bi de Mannslüüd sünd in de Bilanz de Swiez un Düütschland de spoodrieksten Mannschoppen bi de Europameesterschoppen.

De eersten Europameesterschoppen vun de Fronslüüd weern 1994 in Espinho. De eerstsen beiden Titels güngen an düütsche Mannschoppen. Dorna hebbt de Tschech’schen un de Italienersches de Meesterschoppen domineert. Bi de Meesterschoppn 2003 in Alanya geev dat en rein düütsch Endspeel twüschen de Duos Pohl/Rau un Ahmann/Vollmer, de dat nächste Johr as Gastgevers aver keen Spood harrn. In’t Johr 2007 güng de Reeg vun Sara Goller un Laura Ludwig los, de veermol in Reeg bit in’t Endspeel kamen sünd. De spoodrieksten Natschonen bi de Europameesteschoppen vun de Fronslüüd sünd bit hüüt Düütschland un Italien.

Wettstrieden in verschedene Länner[ännern | Bornkood ännern]

Düütschland[ännern | Bornkood ännern]

Eerste Turneeren hebbt in Düütschland 1989 stattfunnen, twee Johren later weer vun’n düütschen Volleyballverband ok dat eerste mol en Turneerreeg utricht. De Düütsche Strandvolleyball-Meesterschop billt siet 1992 den Afsluss un Hööchpunkt vun disse Reeg. Dat eerste mol weer de Veranstaltung in dat Oostseebad Damp utdragen, dorna hett sik Timmendorfer Strand as duersomen Oort för de Veranstaltung dörsett. Mit de Masters-Reeg hett sik de Sport denn wieterentwickelt. 1997 hebbt de Veranstalters denn de Turneren an’n Strand vun de Turneren binnen de Städer scheedt un de Tall vun de Beach Cups minnert. Liekers bleev dat Intresse vun de Tokiekers bestahn. 2005 güng de natschonale Strandvolleyball bargdaal. Mehr Acht schüll de Sport dör Överdrägen in’t Feernsehn bi RTL kriegen, man de Senner hett an’t Enn vun’t Johr de Tosamenarbeit künnigt jüst so as de Vermarkter Sportfive. Siet 2006 gifft dat in Düütschland de Smart Beach Tour as eenzige Turneerreeg.

Butendem hett dat in Düütschland al en Reeg vun internatschonale Turneren geven, wobi sik vör allen Berlin as regelmatigen Gastgever wiest. Vun 1995 bit 2008 weer jeed Johr de FIVB World Tour in Berlin to Gast, siet 2003 tosamen mit en Grand Slam, de blots 2006 wegen de Football-Weltmeesterschop utfallen is. 2010 hett in Berlin de Europameesterschop stattfunnen.

USA[ännern | Bornkood ännern]

De US-amerikiaanschen Profi-Spelers hebbt 1983 de Association of Volleyball Professionals grünnt, üm jemehr Rechten bi’t Vermarkten un in finanzielle Fragen beter dörsetten to künnen. De ne’e Verband hett na en Streik vun de Spelers bi en inoffizielle Weltmeesterschop en egene Turneer-Reeg anfungen. De AVP-Tour hett sik as Konkurrenz to de FIVB World Tour entwickelt, ok vunwegen dat se mit hoge Priesgeller locken de. Vele Spelers sünd de levers na de AVP-Turneren gahn, as an annere internatschonale Turneren deeltonehmen. Wegen de Finanzkries müss de Reeg 2010 afbroken warrn. 2011 weer en nee Kunzept utarbeit.

Spoodrieke Spelers[ännern | Bornkood ännern]

Düütschland[ännern | Bornkood ännern]

Jonas Reckermann

As de eersten Strandvolleyball-Turneren afholen weern, weer Jörg Ahmann un Axel Hager dat spoodriekste Team vun de düütschen Mannslüüd. Jemehrn Hööchpunkt hebbt se 2000 bi de olympschen Spelen in Sydney hatt, as se de Bronze-Medaille wunnen hebbt. Na jem is ok de Ahmann-Hager-Arena in Timmendorfer Strand nöömt worrn. Spoodriek weer ok de Mannschop ut Christoph Dieckmann un Jonas Reckermann, de tosamen 2002 bit 2004 dreemol in’t EM-Endspeel stahn un tweemol den Titel holt hebbt. Dieckmann is 2006 noch mol mit Julius Brink Europameester worrn. Later hebbt denn Brink un Reckermann tosamen speelt. Se sünd opstunns de spoodriekste Mannschop bi de düütschen Mannslüüd un sünd 2011 Europameester worrn. Annere spoodrieke Spelers weern oder sünd ünner annern Jonathan Erdmann, Kay Matysik, David Klemperer un Eric Koreng.

De düütschen Fronslüüd sünd mang de besten Spelersches in Europa, ok wenn se bi Weltmeesterschopppen un de Olympschen Spelen noch keen Medaillen kregen hebbt. Danja Müsch, Beate Bühler un Jana Vollmer weern Spelers, de in de 1990er Johren sünners Acht op sik tagen hebbt. As eerste Mannschop hebbt Stephanie Pohl un Okka Rau 2008 in Marseille en Turneer vun de World Tour wunnen. In’t Johr 2007 güng de spoodrieke Tiet vun Sara Goller un Laura Ludwig los: Veermol in de Reeg hebbt se bi de EM speelt un dorbi tweemol den Titel holt. Wietere bekannte Spelersches sünd Ilka Semmler un Katrin Holtwick.

Öösterriek[ännern | Bornkood ännern]

De öösterriekschen Schwaiger-Süsters

Öösterriek tellt siet 2003 to de spoodrieken Natschonen in’n internatschonalen Strandvolleyball. Dat Johr hebbt Nik Berger un Clemens Doppler de EM in Alanya wunnen, 2007 hett Doppler tosamen mit Peter Gartmayer noch mol den Titel wunnen. In de folgen Tiet hett dat Duo Reinder Nummerdor un Richard Schuil dreemnol in de Reeg den Titel wunnen. Nich so veel Spood harrn toeerst de Fronslüüd, de eerst 2011 mit Barbara Hansel un Sara Montagnolli jemehr eerste EM-Medaille wunnen hebbt. Dat tweete öösterrieksche Natschonalteam besteiht ut de Süsters Doris un Stefanie Schwaiger, de bi de olympschen Spelen in Peking un dorna ok bi de Weltmeesterschoppen bit in’t Veerdelfinale kamen sünd.

Swiez[ännern | Bornkood ännern]

De Swiezer Mannslüüd sünd bi de Europamnesterschoppen vör Düütschland de spoodriekste Natschoon. Doran hebbt den gröttsten Andeel de Bröder Martin un Paul Laciga, de dat Turneer vun 1998 bit 2000 dreemol in de Reeg wunnen hebbt. Dat Johr dorop sünd denn de Swiezer Markus Egger un Sascha Heyer Meester worrn. Ok Patrick Heuscher un Stefan Kobel weern mehrmols ünner de besten Mannschoppen in Europa un hebbt 2004 in Athen ok de opstunns eenzige olympsche Goldmedaille för de Swiez wunnen. Bi de Fronslüüd is Simone Kuhn en rutragen Swiezerin. Se weer an all dree Swiezer Medaillen bi Europameesterschoppen bedeeligt. 2004 hett se tosamen mit Nicole Schnyder-Benoit wunnen, 2009 weer se mit Nadine Zumkehr Drüdde.

USA[ännern | Bornkood ännern]

Kerri Walsh un Misty Mae-Treanor mit den dormaligen US-Präsidenten George Bush

As Oorsprungsland vun’n Strandvolleyball hebbt de USA al fröh vele starke Spelers hatt. To de prominentesten Spelers, de sik üm en Professchonaliseren vun den Sport möht hebbt, tellt Karch Kiraly. He hett mit sien Partner Kent Steffes gegen de annern US-Amerikaners Michael Dodd un Mike Whitmarsh dat Olympia-Turneer in Atlante wunnen und weer dormit de eerste Speler, de Goldmediallen in de Hall un ok in’n Sand holt hett. 2000 hebbt Dain Blanton un Eric Fonoimoana dat tweete Olympia-Gold för de USA wunnen. En wietere spoodrieke Mannschop besteiht ut Todd Rogers un Phil Dalhausser. De beiden hebbt 2007 de WM wunnen un een Johr later ok dat Olympia-Endspeel in Peking.

Bi de Fronslüüd hebbt Kerri Walsh un Misty May-Treanor de Olympia-Goldmedaille in Athen wunnen. Se domineert de internatschonale Konkurrenz bi de Fronslüüd siet de WM 2003. Den WM-Titel hebbt se dorna noch tweemol wunnen, un 2008 hebbt se in Peking ok noch en tweet mol die Olympschen Spelen wunnen. In’t Johr 2009 hebbt April Ross un Jennifer Kessy den WM-Titel wunnen.

Brasilien[ännern | Bornkood ännern]

Sandra Pires ut Brasilien

As tweet Oorspungsland hett ok Brasilien vele go’e Spelers entwickelt. To Anfang weern dat vör allen de beiden Länenr, de sik gegensietig Konkurrenz maakt hebbt. Bi de Weltmeesterschoppen hebbt se bit hüüt negen Endspelen wunnen, bi de Olympschen Spelen hebbt se tohopen negen Medaillen wunnen, dorünner tweemol de goldene.

De eersten brasilaanschen Weltmeesters bi de Mannslüüd weern 1997 Guilherme un Pará, de twee Johren later noch mol Drüdde worrn sünd. De Tiel güng in Marseille an Emanuel Rego un José Loiola. En nee Duo hett sik denn mit Emanuel un Ricardo billt, de 2003 in’t egen Land Weltmeester worrn sünd un bi de Olympschen Spelen in Athen Gold wunnen hebbt. Bi de WM 2005 in Berlin hebbt Márcio Araújo un Fabio Luiz den Titel wunnen. Se weern 2008 in Peking Tweete.

Bi de Fronslüüd hebbt Sandra Pires un Jackie Silva de eersetn Titels bi de wichtigsten Turneren wunnen. Bi de Olympschen Spelen 1996 in Atlanta hebbt se gegen jemehr Landslüüd Mônica Rodrigues un Adriana Samuel dat eerste olympsche Gold holt un sünd een Johr later ok Weltmeester worrn. Sandra Pires weer ok noch mit annere Spelers tohopen spoodriek: Tosamen mit Adriana Samuel kreeg se 2000 de olympsche Bronze-Medaille, mit Tatiana Minello stünn se 2001 in’t WM-Endspeel. Wunnen hebbt dit Speel Adriana Behar un Shelda Bede, de ok in’t Vörjohr al Weltmeester weern. Bi de Weltmeesterschop 2005 in Berlin hebbt Larissa un Juliana jemehr spoodrieke Tiet anfungen. Se weern al dreemol vör mit dorbi, vördem se 2011 den to’n eersten mol ok den Titel wunnen hebbt.

Kritik[ännern | Bornkood ännern]

In de Kritik: knappe Speelkledaasch

Vun de Tiet an, as Strandvolleyball 1996 to’n eersten mol in’t Programm vun de Olampschen Spelen weer, warrt de Sportoort vun konservative Gruppen un vun Regeeren vun islamsche Länner kritiseert. Dorbi geiht dat sünners üm de knappe Kledaasch vun de Spelers, de för en düchtige sexuelle Utstrahlen sorgt. In’n Rahmen vun de Olympschen Spelen hett de FIVB en offizielle Vörschrift rutgeven, wona de Bikini-Büxen vun de Fronslüüd an de Siet blots 7 cm breet wesen drööft[4]. De Aktiven sülvst hebbt mit disse Regel an sik aver keen Lasten. Se wiest eher op de praktischen Sieten vun de drange Kledaasch hen un op de Vördeelen vör allen bi hitt Sommerweder[5]. Strandvolleyball in de Neeg vun’n Nacktsport to stellen, weer nich anmeten warrt dorbi argumenteert, tomal Aktive in annere Sportorden as to’n Bispeel in de Lichtathletik ok nich veel mehr Huut afdecken deen. Ümstreden is wieter ok dat Rahmenprogramm mit dansen Fronslüüd un Musik dör en DJ, wat siet 2004 in de Posen begäng is.

Freetietsport[ännern | Bornkood ännern]

Spelers bi en Freetietturneer

Strandvolleyball weer siet dat Opkamen an de Strännen vun de USA lange Tiet as’n Trend- oder Freetietsport ansehn. Vundaag warrt de Sport vun Profis aver ok vun tallrieke AMateure utöövt. In Düüschland gifft dat opstunns mehr as 800 Strandvolleyball-Anlagen[6]. Strandvolleyball kann aver nich blots an’n Strand speelt warrn. Ok in Binnenstäder wiet weg vun de See künnt Speelfeller inricht warrn, as to’n Bispeel jeed Johr in Leipzig bi’t SachenBeach. De WM 2007 hett sogors in över 1.000 m Hööch in Gstaad in de Siwezer Bargen stattfunnen. Dordör, dat de Profi-Sport fakener ok in’t Feernsehn to sehn is, finnt de Sport ok bi de Amateuren jümmer mehr Toloop.

Footvolley[ännern | Bornkood ännern]

Hööftartikel: Footvolley

In de 1960er Johren is an de Strännen vun Brasilien en ne’en Trendsport utklamüstert worrn. Footvolley stellt en Kombinatschoon dor vun Volleyball un Football. De eerste düütsche Verband is 2003 grünnt worrn. Siet de Tiet versöökt de Aktiven, jemehr Sportoort to professchonaliseeren.

Literatur[ännern | Bornkood ännern]

  • Jörg Ahmann: Beach-Volleyball-Taktik für Gewinner. Neuer Sportverlag, Stuttgart 2004. ISBN 3-938023-00-7
  • Rüdiger Naffin: Beach-Volleyball - für Anfänger und Fortgeschrittene. Neuer Sportverlag, Stuttgart 2005. ISBN 3-938023-07-4

Borns[ännern | Bornkood ännern]

  1. Strieden üm jeedeen Ball (PDF-Datei; 1,37 MB)/HTML-Siet
  2. Charlie Saikley, 69; Headed Beach Volleyball Tourney vun de Los Angeles Times vun’n 25. Juni 2005, afropen an’n 17. August 2011
  3. In’t engelsche Original: „You talk to any player and if they were told they could only win one tournament in their whole career, everybody would choose it to be here in Manhattan. There’s an extra fire among all the players.“ A Magical Day at the Beach vun de Los Angeles Times vun’n 06. Juli 2004 afropen an’n 17. August 2011
  4. Beach volleyball Players' uniforms guidelines for the Olympic Games (PDF)
  5. Enger Bikini, knappe Höschen, Stuttgarter Zeitung vun’n 17. August 2004
  6. Överischt vun de Anlagen in Düütschland (DVV)

Weblinks[ännern | Bornkood ännern]

Commons-logo.svg Strandvolleyball. Mehr Biller, Videos oder Audiodateien to’t Thema gifft dat bi Wikimedia Commons.
Allgemeen
Verbännen