River Phoenix

Vun Wikipedia
Wesseln na: Navigatschoon, Söök
River Phoenix 1989 op’n Governor’s Ball bi de Oscar-Verlehen

River Phoenix (* 23. August 1970 in Madras, Oregon as River Jude Bottom; † 31. Oktober 1993 in Hollywood, Kalifornien) weer en US-amerikaanschen Schauspeler. Al in jungen Johren harr he groten Spood in’t Filmgewarf un gell as een vun de veel versprekensten Jungtalente in’t Kino vun de 1990er Johren.

Leven[ännern | Bornkood ännern]

De Vadder vun River Phoenix (John Lee Phoenix, an sik John Lee Bottom) weer en Timmermann, sien Moder (Heart Phoenix, borene Arlyn Sharon Dunetz) arbeidt as Sekretärsche. De beiden sünd Anfang vun de 1970er Johren in de Sekte Kinner vun Gott intreden. Se un jemehr Kinner River, Rain Joan of Arc (korttietig Rainbow), Joaquin Raphael (Joaquin Phoenix, de sik en Tiet lang Leaf nömen de), Libertad Mariposa (Liberty Mariposa Butterfly) un Summer Joy hebbt in verscheeden Länner in Middel- un Süüdamerika leeft, ünner annern in Costa Rica un Venezuela, woneem de Vadder as Arzbischop vun de Sekte insett weer. De Öllern hebbt jemehr Kinner sülvst Ünnerricht geven un dorbi sünners de musischen Anlagen ünnerstütt.

Mit söven Johr hett River tohopen mit sien Süster Rain as Stratenmusiker in Caracas Geld för de Familie verdeent. Gitarr Spelen is de hele Tiet sien Passion bleven. He un sien Süster Rainbow hebbt eenige Tiet in de Musikgrupp Aleka’s Attic speelt. 1977 is de Familie wedder ut de Sekte rutgahn, töög na Los Angeles üm un hett den Naam in Phoenix ännert.

De Öllern geven sik Mööh, jemehr Kinner dör lütte Optreden in Warfspots ünnertobringen. 1982 bit 1983 hett River Phoenix den 12-johrigen Guthrie in de Feernsehreeg Seven Brides for Seven Brothers. Annere Feernsehproduktschonen kemen na mit de Serien Hotel un Fantasy Island. Sien eersten Speelfilm weer Explorers vun 1985. Een Johr later speel he in den Film Stand By Me, de in de USA groten finanziellen Spood harr un de Phoenix beropen maakt hett. Dorna speel he in The Mosquito Coast un Little Nikita, in de he an de Siet vun Harrison Ford un Sidney Poitier to sehn weer. 1988 weer he för den Oscar nomineert as Best Nevendorsteller för sien Rull in Running On Empty. 1989 weer he as de junge Indiana Jones in den Film Indiana Jones and the Last Crusade.

As de beste Film mit River Phoenix gellt allgemeen My Private Idaho, in den he ünner den Speelbaas Gus Van Sant an de Siet vun Keanu Reeves en schwulen Streekjung dorstellt hett. Dorna hett he Sneakers dreiht, ünnerschreev en Verdrag för Dark Blood un stünn op de Besettenlist för Interview with the Vampire. Wiel de Dreiharbeiten to Dark Blood, in de Halloween-Nacht vun 1993 is River Phoenix an en Överdosis vun Heroin un Kokain („Speedball“) vör den Nachtclub Viper Room tohopenbroken un bleev Dood. Sien vörsehn Rull in Interview with the Vampire is dorna vun Christian Slater övernahmen worrn. Slater hett de hele Gage för de Rull an en Organisatschoon för Deertenrechten spennt, de Phoenix ünnerstütt harr. As letzte Film mit Phoenix in de Hööftrul keem wenige Weken na sien Dood Silent Tongue in de Kinos.

River Phoenix hett sik sien Leven lang mit de Musik befaat. Mit sien Fründ John Frusciante vun de Grupp Red Hot Chili Peppers hett he Leder inspeelt, vun de 1997 eenige op Frusciantes Album Smile From The Streets You Hold. 1993 weer he in een Video vun Flea to sehn, wo he den Bassspeler vun de Red Hot Chili Peppers in en Interview befragen de. Butendem weern em en Reeg vun Leder vun Musikers as Natalie Merchant, Paul Ellis, R.E.M. un de Chili Peppers.

Phoenix is sien Leven lang de alternative Optucht vun sien Öllern tro bleven, weer en övertüügten Ümwelt- un Deertenschuuler un leev as Veganer. Ünnerstütt hett he de Organisatschoon PETA, hett bi Spennensammeln holpen un hett in Costa Rica en Rebeed Regenwoold köfft.

Filmografie (Utwahl)[ännern | Bornkood ännern]

Johr Titel Synchroonsnacker
1982 Seven Brides for Seven Brothers, Feernsehreeg  
1984 Celebrity, Feernsehminireeg  
1985 Surviving  
1985 Explorers
dt.: Explorers – Ein phantastisches Abenteuer
 
1986 Stand By Me
dt.: Stand By Me – Das Geheimnis eines Sommers
Timmo Niesner
1986 Circle of Violence: A Family Drama, Feernsehn  
1986 The Mosquito Coast
dt.: Mosquito Coast
Jens Markgraf
1987 Little Nikita Nicolas Böll
1988 A Night in the Life of Jimmy Reardon
dt.: Jimmy Reardon
Philipp Brammer
1988 Running On Empty
dt.: Die Flucht ins Ungewisse
Frank Schaff
1989 Indiana Jones and the Last Crusade
dt.: Indiana Jones und der letzte Kreuzzug
Simon Jäger
1990 I Love You to Death
dt.: Ich liebe Dich zu Tode
Simon Jäger
1991 My Own Private Idaho
dt.: My Private Idaho – Das Ende der Unschuld
Tobias Lelle
1991 Dogfight Simon Jäger
1992 Sneakers
dt.: Sneakers – Die Lautlosen
Frank Schaff
1993 The Thing Called Love
dt.: The Thing Called Love – Die Entscheidung fürs Leben
Torsten Sense
1993 Even Cowgirls Get the Blues  
1993 Silent Tongue
dt.: Schweigende Zunge
Simon Jäger

Utteken[ännern | Bornkood ännern]

In sien kort Leven hett River Phoenix bannig veel Filmpriesen kregen, ünner annern weer he nomineert för den Oscar as Best Nevendorsteller för sien Rull in Running On Empty. Uttekent weer he mit negen Priesen:

  • 1984: den Young Artist Award as Best jungen Dorsteller in en Feernsehreeg in Seven Brides for Seven Brothers.
  • 1986: den Young Artist Award as Best jungen Schauspeler in en Feernsehminireeg in Surviving.
  • 1986: den Young Artist Award as Utermatige Leistung vun en Jungschauspeler in en Speelfilm in Explorers.
  • 1987: den Jackie Coogan Award för Stand By Me
  • 1988: den NBR Award as Best Nevendorsteller in Running on Empty.
  • 1988: den Young Artist Award as Gröttsten jungen männlichen Superstar in en Speelfilm in The Mosquito Coast.
  • 1991: den Volpi Cup as Best Schauspeler in My Own Private Idaho.
  • 1992: den Independent Spirit Award as Best Hööftdorsteller in My Own Private Idaho.
  • 1992: den NSFC Award as Best Schauspeler in My Own Private Idaho.

Literatur[ännern | Bornkood ännern]

  • Brian J. Robb: River Phoenix. Schirmer/Mosel, 1999
  • Penelope Dening: Das große River Phoenix Album. VGS Verlagsgesellschaft, Mai 1998

Weblenken[ännern | Bornkood ännern]