Ridley Scott

Vun Wikipedia
Wesseln na: Navigatschoon, Söök
Ridley Scott im März 2012

Sir Ridley Scott (* 30. November 1937 in South Shields, England) is en britischen Filmspeelbaas un Filmproduzent.

Scott gellt vundaag as een vun de bedüdensten Speelbasen mit groot Inwirken. He hett de Vertellorden vun verschedene Genres, as vör allen ok den modernen Hollywood-Actionfilm, bedüden mitprägt. Siene Filmen Alien, Blade Runner, Thelma & Louise un Gladiator weern filmhistoorsch stilbilln. Ok sien Broder Tony Scott is en bekannten Hollywood-Speelbaas. Tosamen bedrieft se siet de 1970er Johren de Produkschoonsfirma för Warffilmen Ridley Scott Associates (RSA) un siet 1995 de Filmprodukschoonsfirma Scott Free Productions. Scott is 2003 vun de britischen Königsche vun wegen sien Verdeensten üm de Kunst to’n Ridder slahn worrn. Sien Söhn Jake un sien Dochter Jordan arbeit ok in’t Filmgewarf.

Levensloop[ännern | Bornkood ännern]

Scott sien Vadder weer Soldat vun Beroop, de bi de Royal Engineers (Kampünnerstüttenstruppen) vun de britischen Armee deent hett. He kreeg em dorüm nich faken to sehn. Na Tieten in Cumbria, Wales un Düütschland hett sik de Familie in Stockton-on-Tees in’n Noorden vun England daallaten. De industriell prägte Landschop dor weer laterhen Inspiratschoon för Szenen in den Film Blade Runner.

Vun 1954 bit 1958 hett Scott an’t West Hartlepool College of Art Grafik-Design un Maleree lehrt un dat Diplom mit Utteken maakt. Dorophen hett he Grafik-Design an’t Royal College of Art in London studeert, wo David Hockney een vun sien Mitstudenten weer. 1963 hett he dat Studium mit Utteken afslaten. He kreeg dorna en Reisstipendium för een Johr in de USA un arbeit in de Tiet bi Time Life, Inc., woneem he mit de Dokumentaristen Richard Leacock un Donn Alan Pennebaker arbeit hett.

As he torüchkeem, hett he 1965 en Lehrsteed as Szenenbillner bi de BBC an. Dordör hett he mitarbeit an Feernsehprodukschonen as Z-Cars oder de Science-Fiction-Reeg Out of the Unknown. Dat duer nich lang, bit he in dat Trainingsprogramm för Speelbasen opnahmen worrn is un he denn eenige Episoden sülvst inszeneert hett.

1968 is Scott vun de BBC weggahn, üm Ridley Scott Associates (RSA) to grünnen. An dat Projekt hebbt blangen sien Broder Tony Speelbasen as Alan Parker, Hugh Hudson un Hugh Johnson mitarbeit. RSA is in Europa to een vun de spoodrieksten Hüüs för Warffilm opstegen, för dat Scott mehr as 2000 Warfspots inszeneert hett. Vele dorvun sünd op de Festspelen vun Cannes un Venedig uttekent worrn.

In de Filmbranche gellt Ridley Scott as en ökonoomschen Speelbaas, vun wegen dat he normalerwies mit’n Drüddel vun de Dreihdaag utkummt as annere Kollegen. He sülvst meen, dat he dat sien fröhere Arbeit as Speelbaas för Video- un Warfspots to verdanken hett, aver ok den Ümstand, dat he eenige Szenen mit bit to föffteihn Kameras gliektietig dreiht[1].

Historie vun sien Warken[ännern | Bornkood ännern]

En Markenteken för Scott is sien utprägten ästheetschen un malerischen visuellen Stil, den he sik in sien johrelangen Insichten in de Produkschoon vun Warfspots anegent hett. Sien eersten Themenfilm The Duellists vun 1977 weer keen groten kommerziellen Spood, fünn aver bi de Kritik noog Acht, dat he dorna de Mööglichkeit harr, 1979 den Science-Fiction-Film Alien to dreihn. Sien nächsten Film Blade Runner (1982) baseert op den Roman Do Androids Dream of Electric Sheep? vun Philip K. Dick. Dat düstere futuristische Wark hett visuell so’n starken Indruck maakt, dat dordör en hele Generatschoon vun Cyberpunk Literatur, Musik un Kunst inspireert worrn is.

1985 hett Scott den Film Legend dreiht, de – as ok wietere Nafolgers – nich an den Spood vun de fröheren Warken ranrecken deen, mit de Tiet aver to en Fantasy-Kultfilm worrn is un 2002 mit en restaureerten Director’s Cut nee opleggt weer. Faken weer kritiseert, dat Scott den visuellen Stil vör den Inholt un de Charakters vun die Figuren stellen de. Dat Gegendeel hett Scott 1991 mit den Film Thelma & Louisse bewiest, för den he ok sien eerste Nomineeren för den Oscar kregen hett.

In de Folg geve dat wedder eenige Filmen, de künstlerisch un kommerziell dörfallen sünd. Sünners de Militärfilm G.I. Jane is vun vele Kritikers angrepen worrn, vun wegen dat he en nich differenzeerte Pro-Militär-Ansicht dorstellen de. Mit en groten Triumph harr Scott in’t Johr 2000 en Comeback mit den Film Gladiator, de bi de Tokiekers düchtig goot ankamen is un ünnern annern as beste Film mit den Oscar uttekent worrn is. Ok för de beste Regie weer he nomineert, hett den Pries aver nich wunnen. Nochmol nomineert weer he för den kontroversen Kriegsfilm Black Hawk Down vun 2001, den en verunglückten Militärinsatz in Somalia as Thema hett un in beindruckende Biller ümsett. Black Hawk Down hett dat ne’ere Dorstellen vun Action prägt un hett de dokumentaarsche Kameraföhren to’n Dörbrook in de Filmkunst holpen.

Tosamen mit dien Broder Tony hett he för den US-amerikaanschen Kavelsenner TNT De Minireeg The Company dreiht. 2008 segg he, dat he 25 Johr töven müsst hett, bit he de Rechten an dat Book The Forever War vun Joe Haldeman för en Verfilmen kregen hett[2]. Dat Book will he nu in 3D verfilmen[3], womit he torüch kummt na’t Science-Fiction-Genre.

För den US-Feernsehsenner CBS produzeert he siet 2009 de Reeg Good Wife, de in Düütschland siet März 2010 bi ProSieben utstrahlt warrt. Ok bi disse Reeg hett he mit sien Broder Tony tosamenarbeit. Mit Robin Hood hett he 2010 wedder en Historienfilm vörleggt, de ok mit go’e Kritiken bedacht worrn is.

Projekten, an de he arbeiten deit, sünd to’n Bispeel de eerste Verfilmen vun den Roman Brave New World vun Aldous Huxley, den he tosamen mit Leonardo DiCaprio produzeert. Scott warrt dorbi wohrschienlich ok de Regie övernehmen[4]. Aktuell arbeit he an en Prequel to sien eersten groten Film Alien. De Vörgeschicht schall in 3D dreiht warrn un twee Deelen ümfaten. De Produkschoonsfirma 20th Century Fox plaant den Kinostart för den eersten Deel Enn 2011[5].

Filmografie (Utwahl)[ännern | Bornkood ännern]

Johr Titel Funkschoon
1965 Boy and Bicycle Produzent
Speelbaas
1977 The Duellists
dt.: Die Duellisten
Speelbaas
1979 Alien
dt.: Alien – Das unheimliche Wesen aus einer fremden Welt
Speelbaas
1982 Blade Runner
dt.: Der Blade Runner
Speelbaas
Produzent
1985 Legend
dt.: Legende
Speelbaas
1987 Someone to Watch Over Me
dt.: Der Mann im Hintergrund
Speelbaas
Produzent
1989 Black Rain Speelbaas
1991 Thelma & Louise Speelbaas
Produzent
1992 1492: Conquest of Paradise
dt.: 1492 – Die Eroberung des Paradieses
Speelbaas
Produzent
1994 The Browning Version
dt.: Schrei in die Vergangenheit
Produzent
1996 White Squall
dt.: White Squall – Reißende Strömung
Speelbaas
Produzent
1997 G.I. Jane
dt.: Die Akte Jane
Speelbaas
Produzent
1998 Clay Pigeons
dt.: Lebende Ziele
Produzent
2000 Where the Money Is
dt.: Ein heißer Coup
Produzent
2000 Gladiator Speelbaas
2001 Hannibal Speelbaas
Produzent
2001 Black Hawk Down Speelbaas
Produzent
2002 The Gathering Storm, Feernsehn Produzent
2003 Matchstick Men
dt.: Tricks
Speelbaas
Produzent
2005 Kingdom of Heaven
dt.: Königreich der Himmel
Speelbaas
Produzent
2005 In Her Shoes
dt.: In den Schuhen meiner Schwester
Produzent
2006 A Good Year
dt.: Ein gutes Jahr
Speelbaas
Produzent
2007 The Assassination of Jesse James by the Coward Robert Ford
dt.: Die Ermordung des Jesse James durch den Feigling Robert Ford
Produzent
2007 American Gangster Speelbaas
Produzent
2008 Body of Lies
dt.: Der Mann, der niemals lebte
Speelbaas
Produzent
2009 Tell-Tale
dt.: Das schwarze Herz
Produzent
2010 Welcome to the Rileys
dt.: Willkommen bei den Rileys
Produzent
2005-10 Numb3rs, Feernsehreeg
dt.: Numb3rs – Die Logik des Verbrechens
Produzent
2010 Robin Hood Speelbaas
Produzent
2009-10 Good Wife, Feernsehreeg

Utteken[ännern | Bornkood ännern]

Ridley Scott is bit hüüt (Januar 2011) mit dörteihn Filmpriesen uttekent worrn un wee för 33 wietere Priesen nomineert, dorünner ok dreemol för den Oscar in de Kategorie Best Speelbaas. Wunnen hett he ünner annern:

Literatur[ännern | Bornkood ännern]

  • Inge Kirsner: Actionästhet, Vielfilmer, Identitätssucher: Ridley Scott und seine Kinowelten. In: Thomas Bohrmann, Werner Veith, Stephan Zöller (Rgv.): Handbuch Theologie und Populärer Film. Band 2. Ferdinand Schöningh, Paderbuorn 2009, ISBN 978-3-506-76733-2, S. 111-121.

Weblinken[ännern | Bornkood ännern]

Commons-logo.svg Ridley Scott. Mehr Biller, Videos oder Audiodateien to’t Thema gifft dat bi Wikimedia Commons.

Borns[ännern | Bornkood ännern]

  1. TV Spielfilm, 27/08, S. 17.
  2. Guardian.co.uk: Ridley Scott verfilmt Der Ewige Krieg, 13. Oktober 2008 (afropen an’n 31. Mai 2010)
  3. Firstshowing.net: Ridley Scott verfilmt Der Ewige Krieg in 3D, 26. März 2009 (afropen an’n 31. Mai 2010)
  4. moviepilot.de: Ridley Scott verfilmt Brave New World mit Leonardo DiCaprio
  5. Guardian.co.uk: Ridley Scott bringt Vorgeschichte zu Alien in 3D, 27. April 2010 (afropen an’n 31. Mai 2010)