Ossip Bernstein

Vun Wikipedia
Ossip Bernstein (1909)

Ossip Bernstein (oorsprünglich russ. Осип Самойлович Бернштейн, wetenschaplich Transliteration Osip Samojlovič Bernštejn as ok сип Самуилович Бернштейн/Osip Samuilovič Bernštejn; * 20. September 1882 in Schytomyr; † 30. November 1962) weer en russisch-ukrainisch-franzöösch Schachspeler.

Turnierspeler[ännern | Bornkood ännern]

Ossip Bernstein stamm ut en good situeert Koopmannsfamilie un gung 1901 nah Düütschland, um dor Juristeree to studeeren. He wunn mehrere Turniere vun de Berliner Schachgesellschaft un nehm 1902 an dat Hööftturnier vun de Düütsch Schachbund in Hannober deel, bi dat he up Platz 2 keem. He weer ok en bannig gooden Simultanspeler. 1903 speel he in Berlin tegen 80 Gegner un wunn 70 Partien bi söss Remisen un blots veer verloren Partien. 1906 hett he sien Doktertitel an de Universität Heidelbarg makt. Dornah is he nah Moskau ümsiedelt un is Liddmaat vun de Moskauer Schachgesellschaft wurrn.

Sien eersten grooten internationalen Erfolg gelung hüm bi dat Turnier in Kiew 1903, bi dat he den tweeten Platz achter Michail Iwanowitsch Tschigorin belegen dee, aber de in den direkten Duell besiegen kunn.

Bit to de Utbröök vun den Eersten Weltkrieges nehm he an völ bedüüden Turieren deel un keem meest up vördere Plätze, so as in Coburg 1904, Barmen 1905, Oostende 1906 un 1907, Sankt Petersburg 1909, San Sebastián 1911. In dat Johr wunn Bernstein ok en Wettstried tegen Simon Winawer mit 3,5 - 2,5. Bi dat Allrussisch Nationalturnier 1912 in Vilnius keem he up Platz 2 achter Akiba Rubinstein, de to de Tiet as ernsthaft Weltmeesterschapskandidat gull. Nich so good leep dat bi dat Turnier in Sankt Petersburg 1914, as he all in de Vörrunde rutfloog, aber as eenzig Deelnehmer en Partie tegen den Schachweltmeester Emanuel Lasker winnen kunn.

Nah de Oktoberrevolution, bi de he sien Vermögen verlor, emigreer he mit sien Fru un twee Kinner nah Frankriek un leev af 1920 as ansehn Afkaat in Paris. He nehm blots noch af un an an Turnieren deel, verlor aber meest nichts an sien Speelstärke un kunn 1933 en Trainingswettkamp tegen Weltmeester Alexander Alexandrowitsch Aljechin unentscheeden (2:2) hollen. 1940 muss Bernstein vör de Nationalsozialisten nah Spanien flüchten, is aber nah dat Enn’ vun den Tweeten Weltkrieg nah Frankriek torüchgahn. 1950 kreeg he vun de FIDE den Titel vun en Grootmeester. Noch 1954 hett he Frankriek bi de Schacholympiade in Amsterdam an’t eerst Brett vertreden un wunn in das sülvig Johr in Montevideo en mit en Schönheitspries uttekent Partie tegen Miguel Najdorf. 1956 hett Bernstein Russland to’n letzten Mal sehn, as he as Kaptein vun de franzöösch Mannschap to de Schacholympiade nah Moskau keem. Wegen Krankheit kunn he aber nich mitspeelen.

Ossip Bernstein is an’ 30. November 1962 in en Sanatorium in de franzöössch Pyrenäen storven.

Savielly Tartakower, de 1930 en Biographie över Bernstein verapenlicht hett, hett hüm as "Taktiker par excellence" betekend.

Bernsteins best Historsch Elo-Tall bedrog 2688, dormit weer he in dat Johr 1906 ünner de tein best Speler up de Welt.

Schachkompositschoon[ännern | Bornkood ännern]

Bernstein hett ok eenig Schachupgaven un Studien komponeert. Dat nahfolgend Speel up Patt illustreert dat.

Ossip Bernstein
Schachmatnoje obosrenije, 1903
Witt an’ Toog dwingt dat Remis




Lösung:

1. g7+ Kg8
2. f7+ Kxf7
3. Lh5+ Kg8
4. Lf7+ Kxf7
5. g6+ Kg8
Witt is patt.

Literatur[ännern | Bornkood ännern]

  • Savielly Tartakower: Moderne Schachstrategie: Ossip S. Bernsteins Schach- und Lebenslaufbahn. Breslau 1930 (Reprint Olms-Verlag, Zürich 1985, ISBN 3-283-00177-4)

Weblenken[ännern | Bornkood ännern]

Category:Ossip Bernstein. Mehr Biller, Videos oder Audiodateien to’t Thema gifft dat bi Wikimedia Commons.