Leopold I. (HRR)

Vun Wikipedia
Wesseln na: Navigatschoon, Söök
Kaiser Leopold I.

Leopold I. (* 9. Juni 1640 in Wien; † 5. Mai 1705 ok dor), VI.  ut dat Huus Habsborg, weer vun 1658 bit 1705 Kaiser vun dat Hillge Röömsche Riek un bovento noch König vun Ungarn (vun 1655 af an), Böhmen (vun 1656 af an), Kroatien un Slawonien (vun 1657 af an). An un for sik weer sien Naam Leopold Ignatius Joseph Balthasar Felician. Wat de Machtpolitik bedrepen deit, gung dat unner Leopold siene Regeerung in’n Westen sunnerlich dor um, Ludwig XIV. vun Frankriek af to wehren, de sien Riek bannig na Westen to utbreden wull. In’n Süüdosten drauhden toeerst noch de Osmanen un belagern 1683 to’n tweeten Mol de Hööftstadt Wien. Tolest hefft sik dor avers den Kaiser siene Feldherren dörsetten konnt un sünd denn achter de Osmanen ranjaagt. So hefft se ganz Ungarn in’e Hand kregen. Dor hefft de Habsborgers noch veel mehr Land buten de Grenzen vun dat Hillge Riek mit in’e Hand kregen, wo se alleeen dat Seggen harrt hefft. Vundeswegen warrt Leopold siene Tied ok ankeken as de Anfang vun de Grootmachtpositschoon vun de Habsborgermonarkie. In de Binnenpolitik regeer Leopold na de Oort vun den Afsolutismus. In siene Tied stellt sik ok de Gegenreformatschoon noch en lest Mol bannig up de Achterbeen. Man in dat Riek bleev he dor bi un versoch den Striet mank de Konfessionen ut to glieken. He hett mit siene leifige Politik dat Amt vun den Kaiser noch en lest Mol bannig up’e Hööchde brocht. As de leste König vun Spanien ut dat Huus Habsborg doot bleven weer, keem dat to den Krieg um dat Spaansche Arv. Dor hett Leopold sik dorachter klemmt, dat siene Familie dat Arv in’e Hand kriegen scholl.

Wo he herkeem un wie dat mit siene Familie weer[ännern | Bornkood ännern]

He weer de tweete Söhn vun Kaiser Ferdinand III. (16081657) un de Infantsche vun Spanien Maria Anna. Sien Broder weer Ferdinand IV.. Siene Suster Maria Anna weer de Fro vun König Philipp IV. vun Spanien. Siene Halfsuster Eleonore hett eerst König Michael I. vun Polen freet un is later de Fro vun Hartog Karl V. vun Lothringen wurrn. Siene Halfsuster Maria Anna Josepha weer de Fro vun Jan Wellem, den Hartog vun Jülich-Berg un latern Kurförsten vun de Palz. Leopold sülms hett Jan Wellem siene Suster Eleonore as drudde Fro heiraat.

Ok Mit Ludwig den XIV. vun Frankriek weer he en direkten Verwandten. De beiden sünd Veddern ween over ehre spaanschen Mudders un denn ok noch Swagers vun wegen de spaanschen Ehfroen, de se beide harrt hefft. [1]

Froenslüde un Kinner[ännern | Bornkood ännern]

Siene eerste Fro weer siene Nicht un Cousine Margarita Teresa vun Spanien (1651-1673). Dat weer de Dochter vun Philipp IV. vun Spanien un den siene Fro Maria Anna vun Öösterriek. De beiden hefft veer Kinner kregen:

As tweete Fro hett he siene Cousine in'n tweeden Graad Claudia Felizitas vun Tirol freet (1653-1676). De beiden hefft twee Kinner harrt, de beide fröh sturven sünd:

  • Anna Maria Sophie (*/† 1674) un
  • Maria Josefa Klementine (1675–1676).

Siene drudde Fro is 1676 in Passau Eleonore Magdalene vun Palz-Neeborg wurrn. Dat weer den Kuförsten [Philipp Willem (Palz)|Philipp Willem]] un den siene Fro Elisabeth vun Hessen-Darmstadt ehre Dochter. De beiden hefft tein Kinner kregen:

Literatur[ännern | Bornkood ännern]

  • John P. Spielman: Leopold I. – Zur Macht nicht geboren, Graz / Wien / Köln 1981. ISBN 3-222-11339-4
  • Anton Schindling: Leopold I. In: Anton Schindling, Walter Ziegler (Hrsg.): Die Kaiser der Neuzeit. 1519-1918. Heiliges römisches Reich, Österreich, Deutschland. Beck, München 1990 ISBN 3-406-34395-3, S. 169–185

Weblenken[ännern | Bornkood ännern]

Commons-logo.svg Leopold I.. Mehr Biller, Videos oder Audiodateien to’t Thema gifft dat bi Wikimedia Commons.

Belege[ännern | Bornkood ännern]

  1. Anton Schindling: Leopold I. In: Des./Walter Ziegler (Rutg.): Die Kaiser der Neuzeit. München, 1990 S. 169


Vörgänger Amt Nafolger
Ferdinand III. Röömsch-düütschen Kaiser
1658-1705
Joseph I.