Erzhartog

Vun Wikipedia
Lütt Wapen vun Öösterriek, 1512: Binnenschild un Den Erzhartog sien Hoot
Privilegium maius. Titelsiet, Kaiser Maximilians I. sien Exemplar

Erzhartog (ok Arzhartog) weer vun 1453 bit 1918 de Titel vun den Herrscher vun dat Erzhartogdom Öösterriek. Dor heet he denn Erzhartog vun Öösterriek, up middellat. Archidux Austriae (afkört’ A.A.) mit. All röömsch-düütschen Kaisers ut dat Huus Habsborg, de vun 1463 af an wählt wurrn sünd (Vun 1780 af an Huus Habsborg-Lothringen), hefft düssen Titel arvt. Vun 1804 af an hefft em all Kaisers vun Öösterriek dragen.

As dat in dat Huus Habsborg bit to dat 17. Johrhunnert hen noch mööglich weer, dat Arv up to deelen un as in verscheden Deele vun dat Habsborgerriek verschedene Prinzen nevenanner regeern dö, hefft all Habsborgers, de in een Deel vun’t Riek regeern döen, den Titel Erzhartog kregen. Bit 1918 weer dat bovento noch de Titel vun all Prinzen (vun 1804 af an kaiserliche Prinzen) ut de Hüser Habsborg un Habsborg-Lothringen.

Dat Erhartogdom Öösterriek weer vun 1490 af an for de Administratschoon updeelt in Böveröösterriek (Öösterriek over de Enns) un Nedderöösterriek (Öösterriek unner de Enns). De Erzhartog, de in beide Deele regeern dö, weer jummers een un desülvige Person.