Karoxbossel

Vun Wikipedia
Wapen/Flagg Koort
Wapen unbekannt
Karoxbossel
Laag vun Karoxbossel in Düütschland
Basisdaten
Bundsland: Neddersassen
Landkreis: Horborg
Gemeen: Seevdaal
Inwahners:
Postleettall: 21218
Vörwahl: 04105
Geograafsche Laag:
Koordinaten:53° 24′ N, 10° 0′ O
53° 24′ N, 10° 0′ O

Karte

Watermöhl in Karoxbossel

Karoxbossel (hoochdüütsch Karoxbostel) is en Dörp in de Gemeen Seevdaal in’n Landkreis Horborg, Neddersassen.

Geografie[ännern | Bornkood ännern]

De Oort liggt an’n Noordrand von de Lümbörger Heid an dat linke Över von de Seev. Dör Karoxbossel flütt ok de Karoxbosseler Möhlenbeek, de an de Watermöhl to en Möhlendiek opstaut is. In’n Süden liggt dat Naturschuulrebeed Oold Moor.

De Naveröörd sünd Glüsen un Glüser Loh in’n Noorden, Jehrden un Maschen-Dörp in’n Noordoosten, Maschen-Heid in’n Süüdoosten, Lindhost un Hittfeld in’n Süüdwesten un Fleest mit Fleesterloh in’n Noordwesten.

Historie[ännern | Bornkood ännern]

En Hoff in Karoxbossel dükert 1366 as Karocksborstell toeerst in de Oorkunnen op. Wohrschienlich kummt de Naam von en Persoon, de Karok heten hett, wat en olen Utdruck för Kreih is. Bi Karoxbossel is aver ok en Grafffeld ut de Sassentied funnen worrn.

De Watermöhl in Karoxbossel kummt toeerst 1438 in de Oorkunnen vör. De hüdige Möhl is von 1893, dat Wahn- un Weertschopsgebüüd dorto von 1817.

In de Franzosentied von 1810 bet 1814 hett de Oort to de Mairie Hittfeld in’n Kanton Hittfeld höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Hittfeld in dat Amt Horborg tohöört un denn von 1852 bet 1859 to dat Amt Hittfeld. 1859 is dat wedder Deel von dat Amt Horborg worrn. Na 1885 weer dat in’n Kreis Horborg. 1932 is dat Deel von’n Landkreis Horborg worrn.

De Oort is 1928 tohoop mit Eddels Deel von de Gemeen Hittfeld worrn.[1] An’n 1. Juli 1972 is Hittfeld sülvs denn Deel von de Gemeen Seevdaal worrn, wo Karoxbossel denn ok mit bihöört hett.

In’n Düütsch-Franzööschen Krieg sünd fiev Soldaten ut Karoxbossel[2] fullen oder vermisst un in’n Eersten Weltkrieg een.[3]

Von 1958 bet 1965 hebbt de Kooplüüd Otto Welsch un Karl Zinnow in Karoxbossel en Casino bedreven. Dat Glücksspeel is offiziell as Geschicklichkeitsspeel utwiest worrn. Ans harrn se en Kunzession von dat Land Neddersassen bruukt.[4]

Inwahnertall[ännern | Bornkood ännern]

Johr Inwahners
1812-00-001812[5] 33
1824-00-001824[6] 10 Füürsteden
1848-00-001848[7] 95 Lüüd, 11 Hüüs
1910-12-011. Dezember 1910[8] 153

Religion[ännern | Bornkood ännern]

Karoxbossel is evangeelsch-luthersch präägt un höört to dat Kaspel von de Mauritius-Kark in Hittfeld.

För de Kathoolschen is de St.-Ansgar-Kark in Hittfeld tostännig, de siet 2014 Deel von de Karkengemeen Goden Hirt in Winsen is. De Oort hett fröher to de Karkengemeen St. Petrus in Bookholt tohöört. Nadem 1964 de St.-Ansgar-Kark in Hittfeld trech worrn is, is Karoxbossel 1965 Deel von de nu egenstännige Karkengemeen Hittfeld worrn. 1969 is in de Karkengemeen Hittfeld tosätzlich de St.-Altfrid-Kark in Mäkelfeld boot worrn.

Kultur[ännern | Bornkood ännern]

En Denkmaal för de Fullenen ut den Düütsch-Franzööschen Krieg un den Eersten Weltkrieg steiht bi de Mauritius-Kark in Hittfeld.

Weertschop un Infrastruktur[ännern | Bornkood ännern]

Verkehr[ännern | Bornkood ännern]

Dör Karoxbossel löppt de Kreisstraat 79, de in’n Noordwesten na Fleest geiht un in’n Süüdoosten na Maschen-Heid. Annere lüttjere Straten gifft dat na Hittfeld un Glüsen.

De Oort liggt direkt an de Autobahn 39. Aver ok de A 1 in’n Oosten un de A 7 in’n Westen sünd weniger as een Kilometer von dat Dörp weg. De Opfohrt 35 Fleest op de A 7 liggt dree Kilometer in’n Noordwesten, de Opfohrt 41 Hittfeld op de A 1 veer Kilometer in’n Süüdwesten un de Opfohrt 2 Maschen op de A 39 veer Kilometer in’n Oosten.

De nächste Bahnhoff is so bi fiev Kilometer wied weg in’n Noordoosten de Bahnhoff Mäkelfeld an de Bahnlien Hamborg–Hannover.

Lüüd[ännern | Bornkood ännern]

De Politiker Norbert Böhlke hett in Karoxbossel leevt.

Weblenken[ännern | Bornkood ännern]

Bidrag von’n NDR to de Watermöhl up Platt (16. Mai 2016, 4 x 8 Minuten)

Footnoten[ännern | Bornkood ännern]

  1. http://agora.sub.uni-hamburg.de/subhh-adress/cntmng;jsessionid=F75F48DBF7C51171703E543E0CDB5126.agora11?type=pdf&did=c1:1278676
  2. http://www.denkmalprojekt.org/dkm_deutschland/hittfeld.htm
  3. http://www.denkmalprojekt.org/dkm_deutschland/hitfeld2.htm
  4. http://www.spiegel.de/spiegel/print/d-13529858.html
  5. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 60: http://books.google.de/books?id=Q 5OAAAAcAAJ&pg=PA60
  6. C. H. Jansen: Statistisches Handbuch des Königreichs Hannover. 1824, Sied 111: http://books.google.de/books?id=tG0AAAAAcAAJ&pg=PA111
  7. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 92: http://books.google.de/books?id=eOI-AAAAcAAJ&pg=PA92
  8. http://www.gemeindeverzeichnis.de/gem1900/gem1900.htm?hannover/harburg.htm