Norbert Böhlke

Norbert Böhlke (* 28. April 1955 in Hamborg; † 5. Juli 2014 ok dor) weer en düütschen Kommunalpolitiker von de CDU.

Böhlke is 1955 in Hamborg boren. Na de Högere Hannelsschool hett Böhlke en Lehr as Speditionskoopmann maakt. Von 1977 bet 2011 weer he Gesamtbedrievsraads- un Bedrievsraadsvörsitter bi de Spedition Kühne + Nagel in Hamborg. He weer ok as ehrenamtlichen Landsarbeidsrichter aktiv.

Böhlke weer von 1976 bet to sien Dood för de CDU in’n Oortsraad von Mäkelfeld. Von 1976 af an weer he Raadsherr von de Gemeen Seevdaal un Vörsitter von de CDU-Frakschoon. 1986 is he Afornten in’n Kreisdag von’n Landkreis Horborg worrn un Eersten Viez-Landraad. As Nafolger von Jens-Rainer Ahrens weer he von 2001 bet to dat Enn von de Tweegleisigkeit 2003 de letzte ehrenamtliche Landraad von’n Landkreis Horborg. De eerste hauptamtliche Landraad weer denn Axel Gedaschko.

He weer von’n 21. Juni 1990 bet 20. Juni 1994 un von 2003 bet to sien Dood as direkt wählten Afornten för den Wahlkreis Seevdaal Maat von’n Landdag von Neddersassen. För em is Uwe Schünemann in’n Landdag narückt.^[1]

Böhlke weer verheiraadt un harr twee Söhns. Böhlke is na en korte, swore Krankheit an’n 5. Juli 2014 in dat Universitätsklinikum Eppendörp doodbleven.^[2] He hett in Mäkelfeld leevt.