Japaansche See

Vun Wikipedia
Koort von de Japaansche See

De Japaansche See is en Blangensee von’n West-Pazifik. De See is 1.048.950 km² groot un in’n Dörsnidd 1752 m deep. De deepste Steed is 3742 m deep.

Rebeed[ännern | Bornkood ännern]

Op’n fasten Wall billt Noord- un Süüdkorea de Westgrenz, denn in’n Noorden Russland. Na Oosten deelt dat Sachalin un de japaanschen Eilannen de Japaansche See von’n Pazifik af. Över den Tatarensund twischen den russ’schen fasten Wall un Sachalin un de La-Pérouse-Straat twischen Sachalin un Hokkaidō is de Japaansche See in’n Noorden mit de See von Ochotsk verbunnen. In’n Süden is se över de Korea-Straat mit de Gele See un de Oostchineesche See verbunnen. In’n Westen föhrt de Tsugaru-Straat twischen Honshū un Hokkaidō un de Kanmon-Straat twischen Honshū un Kyūshū na’n Pazifik.

De Internationale Hydrograafsche Organisation leggt de Grenzen von de Japaansche See so fast:[1]

In’n Süüdwesten. De Noordoostspitz von de Oostchineesche See [Von Nomozaki (32° 35′ N) in Kyūshū na de Süüdspitz von Fukue-Eiland (Gotō-Eilannen) un wieder dör dit Eiland na Ōsezaki un na Hunan Kan, de Süüdspitz von Jeju-do, dör dit Eiland na sien Westspitz un denn langs 33° 17′ N na’n fasten Wall] un de Westkant von de Seto-Binnensee.

In’n Süüdoosten. In de Kanmon-Straat. En Lien von Kap Yahata (130° 49′ O) in Kyūshū dör de Eilannen von Uma-Eiland un Mutsure-Eiland (33° 58,5′ N) na Murasakinohana (34° 01′ N) in Honshū.

In’n Oosten. In de Tsugaru-Straat. Von de Spitz von Shiriyazaki (141° 28′ O) na de Spitz von Kap Esan (41° 48′ N).

In’n Noordoosten. In de La-Pérouse-Straat. En Lien, de Kap Sōya un Kap Nishi-Notoro verbinnt (45° 55′ N).

In’n Noorden. Von Kap Tuik (51° 45′ N) na Kap Sushcheva.

Eilannen[ännern | Bornkood ännern]

Wichtige Eilannen in de See sünd Ulleung in Süüdkorea, Tsushima un Iki in de Korea-Straat, Mishima, de Oki-Eilannen un Sado vör Honshu, Oshima, Okushiri, Rishiri un Rebun vör Hokkaido un Russky vör de Küst von Russland. Temlich lütt sünd de Liancourt-Felsen, sünd aver von Bedüden, vonwegen dat Japan un Süüdkorea sik üm disse Felsen al lang striedt.

Footnoten[ännern | Bornkood ännern]

  1. Limits of Oceans and Seas, 3rd edition, 1953


Koordinaten:40° 0′ N, 135° 0′ O