Hamhung

Vun Wikipedia
Satellitenbild von de Stadt

Hamhung (koreaansch 함흥) is en Havenstadt an de Bucht von Oost-Korea (Deel von de Japaansche See) in de Provinz Süüd-Hamgyong in Noordkorea Dat is ok de Höövdstadt von Süüd-Hamgyong. Se hett 559.056 Inwahners (Stand 1. Januar 2005) op en Rebeed von 330 km² un liggt an’n Stroom Songchon.

Historie[ännern | Bornkood ännern]

Nadem König Yi Sung-ke 1398 na en Pallastrevolte von sien Söhn Yi Bang-won afdankt harr, harr he sien Residenz in Hamhung. As Yi Bang-won 1400 Afsandte na Hamhung schickt harr, hett Yi Sung-ke jem all ümbringen laten. Vondaag noch gifft dat in Korea en Seggwies von’n König sien Baad na Hamhung (Hamhungchasa), wat för en Minsch steiht, de von en Reis nich mehr trüggkummt.

In de Tied von de Japaansche Herrschop in Korea 1910 bet 1945 is de Stadt von de Industrie her temlich utboot worrn. De Japaners hebbt ehr in disse Tied Kankō nöömt. In’n Koreakrieg 1950 bet 1953 is de Stadt kumplett tweibummt worrn. Üm un bi 80 % von de Hüüs in de Stadt weren twei. Na’n Krieg is de Stadt denn wedder opboot worrn. Dor weren 1954 bet 1962 ok Architekten un Inschenöörs ut de DDR bi, de Düütsche Arbeidsgrupp Hamhung.

Von 1960 bet 1967 weer Hamhung keen Provinz todeelt, man egenstännig. Denn is dat aver wedder Deel von de Provinz Süüd-Hamgyong worrn, wo dat nu ok de Höövdstadt von is.

Weertschop[ännern | Bornkood ännern]

In Hamhung gifft dat Aluminium-, Maschinenbo-, Textil- un Chemieindustrie. Ünner annern gifft dat ok dat Wark 8. Februar, in dat Vinalon herstellt warrt.

Verkehr[ännern | Bornkood ännern]

Hamhung is över de Pyongra-Iesenbahnlien mit Pjöngjang un Rason verbunnen.

Delen[ännern | Bornkood ännern]

2005 is de Stadt Hungnam Deel von Hamhung worrn. In Hungnam liggt ok de Haven.


Koordinaten:39° 55′ N, 127° 32′ O