Georg Wilhelm Friedrich Hegel

Vun Wikipedia
Wesseln na: Navigatschoon, Söök
Georg Wilhelm Friedrich Hegel,
maalt vun Jakob Schlesinger, 1831

Georg Wilhelm Friedrich Hegel (* 27. August 1770 in Stuttgart; † 14. November 1831 in Berlin) weer en düütschen Philosophen. He warrt as de wichtigste Vertreder vun den Düütschen Idealismus ankeken.

Hegel siene Philosophie will de ganze Würklichkeit mit al de unnerscheedlichen Formen, wie se sik wiesen deit un mit allens, wat dor in de Geschicht vun warrt, in en System bringen un utdüden. Se hett so dull up de Geschicht vun den Geist in'n Westen inwarkt, as anners bloß noch de Gedanken vun Platon, Aristoteles un Kant. Sien philosoophsch Wark Phänomenologie des Geistes (up Platt: Up wat for'n Aarden de Geist sik wiesen deit) ut dat Johr 1807 is en vun de Warken, wat in de ganze Geschicht vun de Philosophie den gröttsten Infloot harrt hett.

Hegel sien Wark warrt updeelt in „Logik“, „Naturphilosophie“ un de „Philosophie vun den Geist“. Dor höört unner annern ok en Philosophie vun de Geschicht mit to.

Na Hegel sien Dood hefft sik siene Anhängers upspleten in ene „rechte“ un ene „linke“ Fraktschoon. De Hegelianers vun de rechte Siet, oder ok „Ooldhegelianers“, folgen Hegel siene Sporen na un bleven bi dat, wat he seggt harr. De annern vun de linke Siete, mit Naam vun „Junghegelianers“, harrn dor wat an ut to setten, dat Hegel siene Philosophie den Staat Stütt un Stöhn verlehnen dö. To de Ooldhegelianers höörn Lüde, as Eduard Gans un Karl Rosenkranz to, to de Junghegelianers weert Ludwig Feuerbach oder Karl Marx to tellt. Sünnerlich Karl Marx is bannig präägt wurrn vun Hegel.