Doorsch

Vun Wikipedia
Wesseln na: Navigatschoon, Söök
De greekschen Dialekten, dor wo de Greken üm 400 v. Chr. rüm in de Hööftsaak siedeln döen.Doorsch in Rot.

Doorsch is en Dialekt vun de Ooltgreeksche Spraak. He is vun den Stamm vun de Dorers snackt wurrn. De Kuntreien, wo düsse Dialekt snackt wurrn is, sünd grote Delen vun den Peloponnes (ünner annern Sparta, Argos, Korinth), dorto Kreta, Rhodos un Delen vun de Westküst vun Lüttasien (dormank Knidos) un de doorschen Kolonien an dat Swarte Meer, up Sizilien un in Süüditalien. Dat Doorsche warrt faken mit de verwandten Dialekten ut den Noordwesten vun Grekenland tohopenfaat to dat Doorsch-Noordwestgreeksch. Düsse Dialekten sünd in Phokis (Delphi), Lokris un Elis (Olympia) snackt wurrn.

De doorsche Dialekt deelt sik noch mol up in allerhand Twiegen, de tomeist vun Inschriften her bekannt sünd. Schreven wurrn is Doorsch vun de Lyrikers Pindar, Bacchylides un Alkman, vun de Kummediendichters Sophron un Epicharmos ut Syrakus un vun de Dichters Theokritos un Kallimachos ut Alexandria. Traditschoon weer dat, dat de Chor in dat greeksche Theater Doorsch sungen hett. In de attische Tragödie (as bi Sophokles, Aischylos un Euripides) warrt de Dialoog up Attisch spraken, man dat Chorleed warrt up Doorsch sungen.

In de Tiet vun den Hellenismus is dat Doorsche, just so, as de annern ooltgreekschen Dialekten ok, vun de Koiné an'e Siet schaven wurrn. Man in Landstreken up de Peloponnes, de wiet af liggt, gifft dat noch hüdigendags dat Tsakoonsche, wat en Dialekt is, de vun dat antike Doorsch herstammen deit.