Düvelsmoor

Vun Wikipedia
Wesseln na: Navigatschoon, Söök

Disambig.svg Dit Woort hett noch annere Bedüden: kiek dorför ünner Düvelsmoor (Dörp).

Dat Düvelsmoor is en Moor, dat in de Landkreise Oosterholt un Rodenborg liggt.

Dat Moor is so bi 500 km² groot un liggt in en oold Daal ut de Saal-Iestied. Na Süden hen flütt dat Water över de Strööm Hamm un Wörp na de Wümm hen af, in’n Noorden na de Oost hen. Jürgen Christian Findörp hett von 1751 af an mit de Moorkolonisation dat Moor dröögleggen laten un dorbi is ok de Oost-Hamm-Kanaal anleggt worrn, de merrn dör dat Moor löppt un dor för sorgt, dat dat Water wegflütt.

De Siedlers weren vör allen lüttje Lüüd, de keen egen Buursteed harrn. Dat Leven in’t Moor weer hart un mit veel Arbeid verbunnen. En olen Snack geiht „Den Eersten sien Dood, den Tweten sien Nood, den Drüdden sien Brood“. Toeerst hebbt de Siedlers vör allen von’n Törfafbo leevt. De Törf is över Gravens un Kanaals na Bremervöör un Bremen bröcht worrn. Eerst later kunnen se denn ok en beten Bueree bedrieven. De Öörd in’t Moor sünd vör allen Stratendörper, bi de de Hüüs na achtern rut en lang, small Stück Land hebbt.

Dat Düvelsmoor weer fröher vör allen Hoogmoor, dat na de Strööm hen in Neddermoor övergüng. Vondaag is en groten Deel aftörft un dröögleggt un oold Moor is nich mehr veel na. Dat lett sik groff in twee Delen indelen, De Oosterholter Deel un de Rodenbörger Deel draapt sik bi Korlshöben, wo de Geest von beide Sieden dicht rankummt.