Binngeweev

Vun Wikipedia

Dat Binngeweev is en Grundgeweev vun’t Binn- un Stüttgeweev, wat to’t Mesoderm höört. Bestahn deit dat ut Zellen un Twüschenzellstoffen, de ok as extrazelluäre Matrix tosamenfaat warrt. Bi Embryos warrt dat Binngeweev Mesenchym nöömt. Dorut leidt sik dat hele Binn- un Stüttgeweev af. Tyypsch för de Navelsnoor is dat gloorige Binngeweev. Dat na de Geboort an wietsten verbreedte is dat kollagene Binngeweev in sien verscheden Formen. Annere Formen sünd dat elastische, dat retikuläre un dat spinozelluläre Binngeweev. En Sünnerstellung nimmt in disse Reeg dat Fettgeweev in.

De Zellen vun de meisten Binngeweevsorden warrt as Fibroblasten un Fibrozyten betekent. An sik betekent de Fibroblast de aktive Zell, de de extrazelluläre Martix afsünnern deit, wiel de Fibrozyt en inaktive Zell in Roh is. Man, beide Formen gaht langsom inenanner över un sünd tomeist nich to scheden. Dorüm warrt in de Literatur beide Begrepen ok mit glieke Bedüden bruukt.

För de Biosynthees vun Kollagen, wat för de Funkschoon vun’t Binngeweev nödig is, bruukt de Lief Vitamin C.

Indelen[ännern | Bornkood ännern]

Mesenchym[ännern | Bornkood ännern]

Dat Mesenchym is dat embryonale Binngeweev. As en pluripotent Geweev in de Ontogenese is dat Meaenchym dat Utgangsgeweev för all Binn- un Stüttgeweevsorden as ok för’t Muskelgeweev. Butendem hett dat ok mit dat Tostannenkamen vun Endothel, Mesothel un dat Dentin to kriegen.

De Zellen vun’t Mesenchym sünd mitenanner dör dünne Foortsätz vernett un dör so nöömte Gap junctions verbunnen. De extrazelluläre Matrix is dorgegen to’n gröttsten Deel free vun Fesen un bargt vör allen Hyaluronsüür. Dit Glykosaminoglykan binnt veel Water, so dat in’n Embryo de Geweevsdruck bestahn blifft.

Gloorig Binngeweev[ännern | Bornkood ännern]

Dat gloorige Binngeweev is tyypsch för de Navelsnoor, kummt aver ok in de embryonale Huut vör. De Zellen sünd flache, vertwiegte Fibrozyten, de miteneen en wietmaschig Nettwark billt. De extrazelluläre Matrix bargt fiene kollagene un retikuläre Fesen as ok nichsulfateerte Glykosaminoglykanen, sünners Hyaluronsüür. De Opgaav vun dit Geweev is vör allen, de Fatten vun de Navelsnoor för’t Afsnören to schulen, ahn ehr dorbi in ehr Beweglichkeit intoschränken.

Kollagen Binngeweev[ännern | Bornkood ännern]

rööd kollagen Binngeweev[ännern | Bornkood ännern]

Dat röde kollagene oder ok interstitielle Binngeweev is de Geweevstyyp, de an’n fakensten in’n Lief vörkummt. Dormit warrt in’n Lief all „Lücken“ opfüllt, Dat Geweev billt dat Interstitium (Stroma) oder stabiliseert de Wannen vun de Organen, finnt sik in Muskeln, Sehnen, ünner’t Epithel vun de Sliemhüüt un Drüsen, in un ünner de Huut (Dermis, Subkutis) as ok üm de Nerven un de Fatten.

Vun de Funkschoon her deent dat nich blots as Füllstoff, man ok as Waterspieker, Schicht to’n Verschuven un as Ruum för tallrieke fre’e Zellen.

De Fibrozyten leegt enkelt in teemlich grote Afstännen to’nanner. Bestimmt warrt dat Geweev vun röde bülgsche Bünnels vun kollagenen Fesen, de in all Richten anordent sünd. Ok retikuläre Fesen un elastische Fesen kamt vör. De letzten sünd dat, de för de bülgsche Anorden vun de Kollagenfesen sorgt.

stevig kollagen Binngeweev[ännern | Bornkood ännern]

Dat stevig kollagene Binngeweev kummt dor tostannen, woneem kollagen Binngeweev op Tog belast warrt. Meist de hele interzelluläre Ruum is mit Kollagenfesen utfüllt, de för de Togfastigkeit sorgt. Hier gifft dat blots wenig elastische Fesen un Proteoglykanen. Dorbi sünd de Kollagenfesen jümmer in Richt vun de Belasten utricht.

Wenn dat Geweev in all Richten belast warrt, sünd ok de Fesen flecht- oder nettordig in all Richten orienteert. Bispelen sünd de Muselfaszien, Gelenk- un Organkapseln, de Knakenhuut, dat Perichondrium, de Dermis (Ledderhuuut), Sclera un de Hoornhuut vun’t Oog as ok de Dura mater (harde Bregenhuut).

Warrt dat Geweev in sünnere Richt belast, sünd all Fesen parallel utricht. Dissen Fall gifft dat bi de Sehnen un Bänner, de mit düchtige Kraft in een Richt treckt warrt. Sünners de Zellen vun de Sehnen warrt ok as Tenozyten oder Flögelzellen betekent. Se hebbt flache un flachige, dreedimensional flögelordige Utlöper, twüschen de sik an de langs sik de Kollagenfesenbünnel utricht.

elastisch Binngeweev[ännern | Bornkood ännern]

Dat elastische Binngeweev stellt en Sünnerform vun dat stevig kollagene Binngeweev dor. Dat bargt vele parallele, dicke elastische Fesen, de dör en hogen Elastinandeel kenntekent sünd. Deelwies billt de Fesen spitzwinklige Verbinnen ünerenanner (Anastomosen) un sünd denn to drangmaschige Netten verbunnen. Twüschen de Fesen leegt Fibrozyten. Makroskoopsch sütt dat licht geel ut. Elastisch Binngeweev kummt to’n Bispeel in’t Nackenband un in de Ligamenta flava („gele Bänner“) vun de Warvelsüül vör. Ok de Arterien dicht an’t Hart un de Lung bargt vele elastische Binngeweevsfesen. Dat sorgt t. B. för’t Tosamentehn vun de Lung un hett dormit Bedüden för’t Utaten. Bi Mannslüüd hett dat ok en Funkschoon in’n Swellkörper vun’n Pint, woneem dat bi en Erekschoon plastisch hollen warrt. Dat hinnert en Kompression vun de Harnröhr.

Retikulär Binngeweev[ännern | Bornkood ännern]

Dat retikuläre Binngeweev gifft dat blots in de sekundären lamphaatschen Organen (Lymphknütten, Milt, Sliemhuut-assozeert lymphaatsch Geweev, kiek ok Immunsystem, Lymphozyten) un in’t Knakenmark vör. De eenzige Opgaav vun dit Geweev is, fre’e Zellen vör allen vun’t Immunsystem, en Ruum to beden, woneem de sik ophollen künnt.

De Zellen vun dissen Geweevtyyp sünd de Retikulumzellen. Se spannt en wiet dreedimensional Nett op, wo sik de fre’en Zellen ophollen künnt. De Grundstellaasch vun’t Nettwark bestieht ut de retikulären Fesen, an de de Retikulumzellen mit Adhäsionsproteien anbackt sünd. De Fesen warrt dorbi vun de Retikulumzellen vullstännig inhüllt, vun wegen dat de Fesen nich mit de fre’en Zellen in Kuntakt kamen drööft.

De Nomenklatur kann hier licht to’n verkehrt Verstahn föhren. Dat retikuläre Geweev is en sünner’t Geweev in dat retikuläre Fesen vörkamt. Retikuläre Fesen gifft dat aver ok in vele annere Geweven.

Spinozellulär Binngeweev[ännern | Bornkood ännern]

dat spinozelluläre, zellige oder ok zellrieke Binngeweev kummt in de Rinn vun’n Eierstock vör. De Zellen sünd noch in de Lagg to differenzeeren, leegt dicht blangenenanner un sünd faken fischtogordig anordent. Dat Geweev bargt en sünnere Mengde vun retikuläre Fesen. De Zellen künnt sik aver noch to Granulosazellen un Luteinzellen wieterentwickeln.

Krankheiten vun’t Binngeweev[ännern | Bornkood ännern]

Krebs[ännern | Bornkood ännern]

As Sarkom warrt jeedeen böösordige Tumor vun’t Binngeweev un annere mesenchymale oder mesodermale Geweven betekent.

Gendefekten[ännern | Bornkood ännern]

Dat gifft en Reeg vun arvbore Defekten, de dat Binngeweev bedrapen doot. För en Reeg vun Binngeweevsdefekten sünd Ännern an’t Kollagenmolekül oder in’n Kollagenstoffwessel bekannt. Mutatschonen dorto sünd bi Minschen as ok bi Huusdeerten funnen worrn (t. B. Ehlers-Danlos-Syndrom, all Typen as ok de Dermatosparaxis[1]). Disse Defekten hebbt tomeist en minnerte Fastigkeit vun de Huut un en högere Mortalität to Folg.

Borns[ännern | Bornkood ännern]

  1. [1] John H Bavinton, David E Peters and John A M Ramshaw: A morphologic study of a mild form of ovine dermatosparaxis, Journal of Investigative Dermatology (1985) 84, 391–395; doi:10.1111/1523-1747.ep12265475