Winds of the Wasteland

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: Winds of the Wasteland
Düütsch Titel: Winde der Wildnis
Produkschoonsland: USA
Johr vun’t Rutkamen: 1936
Läng: 54 Minuten
Originalspraak: Engelsch
Filmkru
Speelbaas: Mack V. Wright
Dreihbook: Joseph F. Poland
Produkschoon: Nat Levine
Musik: Harry Grey
Kamera: William Nobles
Snitt: Robert Jahns
Dorstellers

Winds of the Wasteland (op plattdüütsch so veel as „Winnen vun’t Öödland“; dt. Titel: Winde der Wildnis oder Stürme im Wilden Westen) is de Titel vun en US-amerikaanschen B-Western ut dat Johr 1936 mit John Wayne in de Hööftrull. Dreiht worrn is de Film an verscheden Öörd in’n US-Bundsstaat Kalifornien[1]. De Premiere harr he an’n 6. Juli 1936 in de USA[2].

Inholt[ännern | Bornkood ännern]

Amerika in’t Johr 1861: De Pony-Express, en Kureerdeenst, de mit Peerd gau Post in’t hele Land verdeelt, gifft sien Deenst op. Sien Opgaav schall nu de Telegrafenleitung övernehmen, de dweer dör’t Land verlöpt. De Rieders kriegt as Dank för jemehrn Insatz jeedeen twee Hingsten ut’n Bestand as Geschenk. De beiden Kollegen John Blair un Larry Adams beslutt, nu jemehr Glück mit en Kutschendeenst to versöken. Se riedt tosamen na Buchanan City in Kalifornien, woneem se en Kutsch vun den Gewarfsmann Cal Drake köpen wüllt. De haut jem glieks bannig över’t Ohr: För veel Geld dreiht he jem een vun sien Kutschlienen an, de na Crescent City geiht, mitsams de Kutsch, de dorto höört. Man, wat in en Atlas as en opstreven Stadt mit över 3.000 Inwahners anpriest warrt, wiest sik as en Spökenstadt, in de blots noch twee olle Mannslüüd wahnt. Un ok de Kutsch, de dor noch steiht, hett sien besten Daag lang achter sik.

Vun Rocky O’Brien, een vun de beiden Inwahners, warrt se gewohr, dat bald en Postkutschenrennen vun Buchanan City na Sacramento stattfinnen schall. För den Winner schall dat en staatlich Föddergeld vun 25.000 US-Dollar geven. Blair sütt dorin de Mööglichkeit, den finanziellen Verlust wedder uttoglieken un mellt de ne’e Kutschlien för dat Rennen an. Op’n Torüchweg hett he al sien eersten Fohrgast: Barbara, de Dochter vun den tweeten Inwahner vun Crescent City, den Dokter William Forsythe. Na un na kamt verscheden Lüüd dör Crescent City un warrt besnackt, dor to blieven. As Blair denn ok noch en Arbeitstrupp vun de Telegrafenlien dat Leven redden deit, kann he en Telegrafenansluss för de verlaten Stadt rutslahn. Dorför warrt Arbeiters bruukt, de sik ok gau op’n Weg na Crescent City maakt. Tosamen mit de Utsicht op den Postverdrag ut dat Rennen tekent sik af, dat de Stadt bald wedder op de Been kummt.

Drake sütt mit Nied, woans sik de Stadt entwickeln deit. Sien Mackers gifft he Order, dat se de Kutsch överfallen schüllt. Larry warrt dorbi anschaten un kann blots dör dat Ingriepen vun Dr. Forsythe reddt warrn. Blair schall dorgegen in en Fall lockt warrn, ahnt dat aver vörher un kummt heel dorvun af. Ok en Brandanslag, den Drake sien Lüüd op de Kutsch un de Peer veröövt, geiht dorneven. Blair warrt dorbi aver ünner en Vörwand fastnahmen, vunwegen dat he een vun Drake sien Mackers doodschaten hett. Meist hett dat den Anschien, as wenn Blair dör disse Saak nich an’t Rennen deelnehmen kann. Aver de Dokter stellt jüst noch rechttietig de Kautschoon för em. Ofschoonst Blair mit Vertog in’t Rennen geiht, un ünnerwegens ok noch mehrmols vun Drake un sien Mackers angrepen warrt, kann he dat Rennen opletzt bannig knapp winnen – nich toletzt ok wegen de gauen Pony-Express-Peerd.

Weblenken[ännern | Bornkood ännern]

Borns[ännern | Bornkood ännern]

  1. Dreihöörd op IMDb, afropen an’n 24. Februar 2013
  2. Premierendaten op IMDb, afropen an’n 24. Februar 2013