William Reid Pogue

Vun Wikipedia
Bill Pogue, NASA-Foto
Seiko Automatic-Chronograph Cal. 6139 mit geel Zifferblatt, de nömmt „Pogue Seiko“[1][2]

William Reid Pogue (* 23. Januar 1930 in Okemah, Oklahoma, USA; † 3. März 2014 in Cocoa Beach, Florida) weer en US-amerikaansch Astronaut.

Leven[ännern | Bornkood ännern]

Pogue kreeg 1951 en Bachelor in Billenswesen vun de Oklahoma Baptist University un 1960 en Master in Mathematik vun de Oklahoma State University. 1974 kreeg he de Ehrendokterwürde vun de Oklahoma Baptist University.

Pogue keem 1952 to de United States Air Force. Nah sien Insatz in' Koreakrieg weer he ünner annern ok as Pilotenutbilder up de Edwards Air Force Base tätig. Van 1960 bit 1963 hett he Mathematik an de U.S. Air Force Academy in Colorado Springs ünnerricht. Ansluutend weer he twee Johr lang Testpilot in en Uttuuschprogramm vun de U.S. Air Force mit de britisch Royal Air Force.

Astronautentätigkeit[ännern | Bornkood ännern]

William Pogue (baben) un Gerald Carr (ünnern) wiels de Skylab-4-Mission

Pogue weer een vun de 19 Astronauten, de vun de NASA in' April 1966 utwählt wurrn. He wurr in de Ünnerstüttensmannschapen för de Crews vun de Missionen Apollo 7, 11 un 14 insett. Nich uttosluuten is, dat Pogue as Pilot vun de Kommandokapsel vun en latere Apollo-Mission in't All harr fleegen kunnt, mögelkerwies mit Apollo 19. Disse Mission wurr allerdings in' September 1970 afseggt, lang bevör de Mannschap offiziell bekanntgeven wurr. Pogue wurr denn to dat Skylab-Programm toordnet.

An' 16. November 1973 is Pogue as Pilot vun de Skylab-4-Mission to'n darten un letzten bemannten Floog to de Ruumstatschoon Skylab flagen. Bi dissen bit dorhen längsten Ruumfloog wurr he vun Kommandant Gerald Carr un den Wetenschapspiloten Edward Gibson begleit. Se hebbt tallriek Experimente un umfangriek Eer- un Sünnbeobachtungen dörführt. Up sien Weltruumfloog droog Pogue ahn offiziellen Updrag as eersten Automatic-Chronographen in' Weltruum en Seiko Cal. 6139 mit geel Zifferblatt, de siether dorüm nah Pogue nömmt, so nömmt „Pogue Seiko“.[1] Bi twee Weltruumutstiege hett Pogue insgesamt mehr as 13,5 Stünn buterhalv vun de Ruumstatschoon verbrocht. Nah 84 Daag is Skylab 4 weer an' 8. Februar 1974 up de Eer land. De vun Pogue un sien Mannschapskameraden upstellt Rekord hull veer Johr.

Nah sien Utscheeden ut de NASA un de Air Force an' 1. September 1975 weer Pogue Berader för de Luft- un Ruumfohrt as ok Produzent vun Filmen över de Ruumfohrt.

Schrieverkarriere[ännern | Bornkood ännern]

1991 schreev Pogue dat Book How do you go to the Bathroom in Space? (Wu geiht man in' Weltruum up de Toilette?), in de he 270 Fragen beantwort, de man hüm faken stellt hett. Buterdem weer he 1992 tosommen mit Ben Bova Mitschriever vun den Science-Ficton-Roman The Trikon Deception.

Ehrungen[ännern | Bornkood ännern]

Pogue kreeg 1974 de NASA Distinguished Service Medal un wurr 1997 in de Astronaut Hall of Fame upnommen. De Stadt Sand Springs in Oklahoma hett ehr Flooghaben 1975 in William R. Pogue Municipal Airport umnömmt.[3]

Privates[ännern | Bornkood ännern]

Pogue stamm vun den Indianerstamm vun de Choctaw af. He weer dreemal verheiraadt un harr ut sien eerst Ehe dree Kinner, as ok veer Steefkinner ut de tweet Ehe. Pogue is an' 3. März 2014 in dat Öller vun 84 Johren in sien Huus in Florida storven.[4]

Weblenken[ännern | Bornkood ännern]

William R. Pogue. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. a b William Pogue's Seiko 6139 Watch Flown on Board the Skylab 4 Mission, from his Personal Collection... The First Automatic Chronograph to be Worn in Space., afropen an' 5. März 2014
  2. The “Colonel Pogue” Seiko 6139, dreamchrono.com, afropen an' 23. Februar 2015.
  3. Oklahoma Historical Society: http://digital.library.okstate.edu/encyclopedia/entries/S/SA017.html, engelsch, Sand Springs, Encyclopedia of Oklahoma History & Culture, van' 25. August 2010, afropen an' 5. März 2014, Zitat: Sand Springs opened its municipal airport in May 1971. The name was changed in 1975 to William R. Pogue Airport to honor the Skylab 4 astronaut.
  4. Tim Stanley, Tulsa World: http://www.tulsaworld.com/communities/sand-springs-native-skylab-astronaut-bill-pogue-dies-at/article_f0380572-a403-11e3-98d4-0017a43b2370.html, engelsch, Sand Springs native, Skylab astronaut Bill Pogue dies at 84, van' 4. März 2014, afropen an' 5. März 2014