Wikipedia:Bi Wikipedia mitmaken? Ik weet noch nich recht ...

Vun Wikipedia
Wesseln na: Navigatschoon, Söök

Ach, nee, ik kann bi Wikipedia nich mitmaken. Ik weet doch gor nich de rechte Schrievwies för Plattdüütsch …[Bornkood ännern]

De rechte Schrievwies för dat Plattdüütsche... Dat is würklich so’n Saak. Dor hebbt sik al veel Lüüd en Kopp üm maakt. Wi hebbt seggt, för de plattdüütsche Wikipedia wüllt wi uns geern so’n beten an de Schrievwies vun Sass hollen.

Wenn du di aver mit Sass nich utkennst: Dat maakt würklich gornix! Schriev vun uns ut as di de Snavel wussen is! Solang du man schriffst! Wi freit uns dusendmal duller över en Artikel in en beten kruse Schrievwies as wenn du gorkeen Artikel schriffst!

Een Saak dröfft wi nich vergeten: Nüms vun uns hett Plattdüütsch schrieven in’e School lehrt. Also kann sik ok nüms blameren. Richtig un verkehrt gifft dat gornich. Un wi hebbt all kleen anfungen un uns ganz suutje en bestimmte Schrievwies toleggt. Soveel is gewiss: De Schrievwies kummt mit dat Schrieven. Wenn du eerstmal en beten wat schreven hest, denn fallt de Schrievwies ok jümmer lichter.

Ach, nee, ik kann bi Wikipedia nich mitmaken. Mien Plattdüütsch is bestimmt veel to slecht …[Bornkood ännern]

Dat gifft ganz gewiss Plattdüütsch dat beter is un Plattdüütsch dat slechter is. Aver bedenk di ene Saak: Wenn du dien Plattdüütsch nich bruukst, denn fangt dat dat Rusten an. Beter warrt dat dorvun nich. Un op de annere Siet: wenn du dien Plattdüütsch bruken deist, denn warrt dat jümmer beter! Dat kummt faken vör, dat wi bi dat Plattsnacken hoochdüütsche Wöör bruukt, wenn uns dat rechte plattdüütsche Woord jüst nich infallt. Bi dat Schrieven hest du en Vördeel: Du kannst di bedenken. Villicht fallt di noch en good Woord in. Un wenn nich: Dat maakt ok nix, denn schriffst du dat hoochdüütsche Woord rin. Un denn fraagst du eenfach hier op de Wikipedia, op de annern Lüüd nich dat rechte Woord kennt. Wi hebbt dor en extra Siet för: Wikipedia:Mi fehlt dat Woort. Eenfach fragen! Wi överleggt denn tohoop. Un ans laat wi’t eben Hoochdüütsch stahn. Wenn’t anners nix helpt. Blot keen Stress. Wikipedia is keen Dichterweddstried. Schriev man eenfach to!

Ach, nee, ik kann bi Wikipedia nich mitmaken. All disse technische Kraam, dat is mi to hooch...[Bornkood ännern]

En beten Technik is dorbi, dat stimmt schon. Aver dat sütt veel slimmer ut as dat is! Dat gifft allerhand technischen Kraam (Kategorien, „Interwiki-Links“, Vörlagen un en masse annere Syntax). Wenn du dat mit de Technik nich so hest: Vergeet all dissen Snicksnack. Schiet op all dissen Tüdelkraam. Schriev eenfach blot dien Text. Ganz normal. Wenn du di mit Word good utkennst, denn schriev dien Text mit Word un kopeer em denn na de Wikipedia. Den Rest, sowat as Överschriften un Links un all disse Kraam, dat maakt denn de annern för di. Is uns veel lever du schriffst en feinen Text, un wi maakt den Rest, as wenn du gornix schriffst. Un wenn de annern denn för dien Text den ganzen technischen Kraam trech hebbt, denn kannst du di ja mal ankieken, wat se maakt hebbt. Mit de Tied lehrst du dat denn ok. Ganz gewiss. Un wenn nich, ok nich slimm...

De Anfang, dat du överhaupt eerstmal en Siet to’n ännern opröppst, wat du dor maken musst, dor steiht ünner Wikipedia:Inwiesung wat to.