Werner Kammann

Vun Wikipedia

Werner Kammann (* 17. September 1919 in Cuxhoben; † 20. November 1985 ok dor) weer en düütschen Politiker von de SPD. He weer von 1967 bet 1982 veer Wahlperioden lang Afornten in’n Landdag von Neddersassen.

Kammann is 1919 in Cuxhoben boren un hett na de Volks- un Hannelsschool en Lehr as Levensmiddelkoopmann maakt. He weer op en Fachschool un prüften Bilanzbookholler un he hett in Hamborg as Filialbaas in’n Levensmiddelhannel arbeidt. Later weer Kammann bi de Finanzverwaltung as Betriebsprüfer. In’n Tweten Weltkrieg weer he von 1940 bet 1945 Soldaat un is an de Oostfront swoor verwunnt worrn. Na’n Krieg hett he sik 1946 as Hotelkoopmann in Duhnen sülvstännig maakt. Von 1966 af an weer he Baas von de Butensteed von en Breemsche Wahnungssellschop in Cuxhoben. Kammann weer verheiraadt un harr twee Kinner.

Kammann is 1945 in de SPD ringahn un is een Johr later Maat von’n Raad von de Stadt Cuxhoben worrn. Dor is he von 1956 af an Vörsitter von de SPD-Frakschoon ween. He is eerst Senater worrn un weer von 1967 bet 1968 Böverbörgermeester von de Stadt. Bi de Wahlen 1968 hett de CDU wunnen un Hans-Joachim Wegener hett Kammann as Böverbörgermeester aflööst. Kammann weer nu ünner Wegener Eersten Börgermeester. Bi de Wahlen 1972 is Kammann denn aver wedder wählt worrn un weer bet 1976 wedder Böverbörgermeester. 1981 weer Kammann ünner Albrecht Harten von de CDU Eersten Börgermeester. Dat is he bet to sien Dood bleven.

In de sösste Wahlperiood is Kammann 1967 in’n Landdag von Neddersassen wählt worrn un dor bet an dat Enn von de Neegte Wahlperiood in bleven. In disse Tied weer he von’n 14. September 1970 bet to’n 20. Juni 1978 Vörsitter von’n Utschuss för Havens un Schipperee. Sien Tied in’n Landdag weer an’n 20. Juni 1982 toenn.

Kammann hett dat Verdeenstkrüüz an’t Band von’n Verdeenstorden von de Bundsrepublik Düütschland un dat Verdeenstkrüüz von’n Neddersassischen Verdeenstorden kregen. In Cuxhoben hett de Werner-Kammann-Straat ehren Naam na em kregen.