Vedas

Vun Wikipedia
Rig-Veda, en Book in Devanagari ut den Anfang vun dat 19. Johrhunnert

De Vedas (Eentahl: Veda) sund de Schriften, de de Grundlage dorstellt för de Upanischaden, de Indische Philosophie un allerhand Religionen, de to den Hinduismus torekent weert. Se bestaht ut religiöse Hymnen över Gott (oder Gödder), över sprituelle Philosophie, över dat Universum, de Natur un de Aart, wie een sien Leven richtig föhren schall. Dat Woord Veda is vun de Ethymologie her verwandt mit dat Verb weten un bedutt Kennis oder Kunne. De Vedas sund al twuschen 8.000 v. Chr. un 6.000 v. Chr. tostanne kamen.[1]

Oorsprung[ännern | Bornkood ännern]

De öllste Veda is de Rig Veda. Se schall buten Indien bi de Ariers tostann kamen sien. Na de Arische Invaschoonstheorie, de avers umstreden is, schöllt de Ariers vun dat 15. Johrhunnert v. Chr. af an na Indien rintrocken sien. In jungste Tied is bi archäoloogsche Buddeleen in dat Harappadaal rutkamen, datt de Vedas twuschen 6.000 un 8.000 v. Chr. schreven wurrn sund. De Vedas sund in Indien dör so nömmte Rishis (up Sanskrit: Sehers) ankeken wurrn. Kieken bedutt hier en Kennis dör direkt ankieken in schier Bewusstsien (nich Droom oder Denken). Vundeswegen snackt de Vedas vun afsolute Kennis, de sik nich ännert un de ewig wohren deit.

Dor sund de Vedas de öllsten religiösen Texte up de Welt mit. De Hindus glöövt dor an, datt de Vedas ewige Kennis sund, vun Gott schunken an de Minschheit. In de Vedas steckt allens in, wat een över dat Universum weten mutt.

Wat dor in steiht[ännern | Bornkood ännern]

'Veda' bedutt Kunne oder Kennis över Religion un Theologie[2] De 4 Vedas sund

  • de Rig-Veda: De Vers-Veda, de Kunne vun de Loffgesänge (Hymnen). Dat is de Grundlagen-Veda mit Loffgesänge, de to'n Deel in de annern Vedas noch mol wedder updükert.
  • de Sama-Veda: De Leeder-Veda, de wohre Kunne, dor warrt vun sungen.
  • de Yajur-Veda: de 'Veda vun de Offerspröke'; de Kunne um de Offerschriften umto.
  • de Atharva-Veda: de 'Veda vun de Atharvan'; de Kunne rund um de magischen Schriften.

Denn gifft dat noch en Reeg vun Unner-Vedas. Dor höört de Ayurveda to, de över de Kunst vun dat Gesundweern un -maken geiht, de Gandharva Veda, de Musik mit Ragas wieter gifft un ok de Sthapatya Veda, de sik befaten deit mit de eersten Grundlagen vun de Architektur vun Wahnungen in mehrere Stockwarke in de Städer. Düsse Vedas hefft mit Religion nix to kriegen. Bekannter, as de Vedas sülms sünd de Upanischaads, wo de Philosophie in verklaart warrt, de achter de Vedas steiht.

Henotheismus oder Monotheismus[ännern | Bornkood ännern]

Sunnerlich de lateren Vedas sund monotheistisch. De Indienforscher Max Müller, de groten Indruck up de Forschung maakt hett, hett se man doch henotheistisch nömmt. Dor meen he mit, datt twaars glöövt warrt, datt dat en ganze Reeg vun Gödder gifft, man datt blot man een as de Hööchste ankeken un vundeswegen ok man blot een anbeedt warrt. Man he weet dor in Twiefel över, of he nich doch vun Monotheismus snacken möss, vunwegen datt dor en Reeg vun Verse em dor doch up rut to lopen düchen.

De meisten Hindus beroopt sik för ehre monotheistische Sicht unner annern up den Vers: „Up wat een geven is, dor wiest veel Naams up. Se nöömt em Agni, Yama, Matarisvan“ (Rig Veda, 1.164.46). Se glöövt, datt düt bedutt, datt mit de verschedenen Gödder blot man unnerscheedliche Aspekte vun den een Gott meent sund.

Interpretatschoon[ännern | Bornkood ännern]

De Vedas sund in en unbannig ole Form vun dat Sanskrit upschreven. Wöer köönt hier en grote Tahl vun verscheden Bedüdens in hebben. So kümmt dat, datt de Interpretaschonen vun een Text sik bannig verschelen könnt. Towielen lett dat, as wenn dat Afsicht weer, man faken ok nich. So leest de Anhängers vun de Arische Invaschoonstheorie in en Vers, datt en Gott-König vun de Ariers dat Water-System vun de dunkel farvten Drawiden verneelt, wieldes Lüde, de mit düsse Theorie nix anfangen könnt, dor blot rut leest, wie de Kreisloop vun Water beschreven warrt.

In dat Middelöller sünd Kommentare över de Vedas unner annern vun Sayana un Mahidhara schreven wurrn. Dat gifft ok Översetten in Engelsch dör westliche Indologen, as Max Müller, Wilson un Griffith, de to'n Deel up den Grund vun Kommentare ut dat Middeloller staht. Veel Hindus könnt mit düsse Översetten nix anfangen un meent, se weern ja betahlt vun de Briten un vun de christlichen Misschonare.

Belege[ännern | Bornkood ännern]

  1. Prof. S. Khak un Prof. D. Frawley, In search in the cradle of civilisation, Quest books (Universität Oklahoma, 2001).
  2. Hans Joachim Störig: 'Geschiedenis van de filosofie', Uitg. Het Spectrum BV, 1988

Literatuur[ännern | Bornkood ännern]

Weblenken[ännern | Bornkood ännern]