Un baven wahnen Engel

Un baven wahnen Engel is en plattdüütsch Theaterstück in dree Akten för söven Personen (veer Froonslüüd, dree Mannslüüd), dat Jens Exler schreven hett. Toeerst opföhrt worrn is dat Stück an’n 25. April 1963 an de Nedderdüütsche Bühn Flensborg.

Dat Stück is later ok in’t Hoochdüütsche un’t Rhiensche översett worrn. En Westfäälsche Version ünner’n Naam Un buoben wuohnt Engels kummt vun Rainer Schepper.

Helene un Elvira Engel wahnt ganz baven in’n böversten Stock vun dat Miethuus. Helene hett sik in’n Kopp sett, dat se in de Wahnung een Stock deper ümtehn wüllt. Aver de Wahnung is nich free. Also mööt de beiden Engels de Wahnung freekriegen. Se maakt düchtig Krach un verwannelt dat Huus in en Spookhuus. Aver Helene un Elvira ehr Neffe Klaus un Naversch Karin kaamt achter den Plaan un dreiht den Spieß üm.