Thorsten Krüger

Vun Wikipedia
Zur Navigation springen Zur Suche springen
Thorsten Krüger

Thorsten Krüger (* 8. Februar 1966 in Bremerhoben) is en düütschen Verwaltungsbeamten.

Leben[ännern | Bornkood ännern]

Krüger is 1966 in’n Bremerhobener Stadtdeel Leh boren. Sien Vader weer Füürwehrmann un siene Moder bi dat Feernmellamt von de Düütsche Bundspost. He hett twee Geswüster.

Nadem he 1982 de Realschool an de Johann-Gutenberg-School in Bremerhoben afslaten hett, füng he en Lehr as Feernmellhandwarker bi de Düütsche Bundspost Telekom an, de he 1985 afslaten hett. Bet 1986 weer Krüger op de Gewarvlichen Lehranstalten in dat Schoolzentrum Carl von Ossietzky in Bremerhoben un hett so de Fachhoochschoolreife kregen. Na düsse Tied hett Krüger sien Grundwehrdeenst bi de Luftwapen bi’n Flegerhorst Gosler un bi dat Floogafwehrraketengeschwader 37 in Olenwoold daan. Krüger is Staffsünneroffzeer von de Reserve. Na de Tied bi de Bundswehr weer Krüger Boföhrer un Utbiller bi de DBP Telekom. Von 1992 af an hett he as Boleiter un later as Niederlassungsleiter in de Boweertschop arbeidt.

1996 hett Krüger en Studium an de Fachhoochschool von’n Bund för öffentliche Verwaltung in Mannheim anfungen, dat he mit en Afsluss as Diplom-Verwaltungsweert 1999 afslaten hett. To Anfang von sien Studium is Krüger to de Bundsagentur för Arbeid wesselt. Dor hett he bet 2005 arbeidt, toletzt as Geschäftsföhrer för Personal un Finanzen. Tosätzlich weer he dor Trainer för verscheden Fachrebeden so as Kösten-Leistungsreken, Controlling un Personalföhrung. Bavenop weer Krüger Lehrbeopdragten von de Hoochschool Bremerhoben un an de Fachhoochschool von’n Bund för öffentliche Verwaltung in Swerin.

Von 2005 bet 2014 weer Krüger Börgermeester von de Stadt Langen in Neddersassen. An’n 2. November 2014 is he mit 79,84 % von de Stimmen as Börgermeester von de nee grünnte Stadt Geestland wählt worrn, de an’n 1. Januar 2015 mit de Fusion von de Stadt Langen un de Gemenen von de Samtgemeen Beers tostann kamen is. An düssen Dag hett denn ok Krüger dat Börgermeesteramt övernahmen.

Krüger is verheiraadt un hett twee Kinner.