Thiemo Röhler

Vun Wikipedia
Thiemo Röhler, 2018

Thiemo Röhler (* 2. Juni 1979 in Cuxhoben) is en düütschen Politiker von de CDU. He is siet 2017 Afornten in’n Landdag von Neddersassen.

Leven[ännern | Bornkood ännern]

Röhler is 1979 as Söhn von de Schoolmeesterscher Margot Röhler un den Bedrievsweert Walter Röhler in Cuxhoben boren. He is in dor ok opwussen un weer von 1986 bet 1990 op de Grundschool Olenbrook. Von 1990 bet 1992 hett he de Orientierungsstufe in Olenbrook besöcht un güng 1992 op dat Amandus-Abendroth-Gymnasium in Cuxhoben. Dor hett he 1999 sien Abitur maakt. Na dat Abitur hett he sien Wehrdeenst bi de Bundswehr afleist un weer in Eckernföör, Flensborg un bi dat Marienflegergeswader 3 op’n Flegerhorst Noordholt as Feernmeller insett. 2000 hett he en Studium von de Juristeree an de Leibniz-Universität Hannover anfungen un dor 2005 sien Eerst Staatsexamen maakt. He hett 2005 as Anstellten bi de CDU-Frakschoon in’n Neddersassischen Landdag arbeidt un weer von 2005 bet 2007 wetenschoplichen Mitarbeider bi Perfesser Hinrich Rüping an de Universität Hannover.

Von 2007 bet 2009 hett he sien Rechtsreferendariat maakt un dorbi dat Amtsgericht Borgwedel, de Staatsanwaltschop Hannover, den Landkreis Cuxhoben un de Ünnernehmerverbänn Neddersassen kennenlehrt. In’n März 2009 hett he an dat Oberlandsgericht Celle dat Referendariat mit dat Twete Staatsexamen afslaten. Siet 2009 is he as Avkaat in Cuxhoben sülvstännig.

Politik[ännern | Bornkood ännern]

Röhler is 1997 in de Junge Union un 1998 in de CDU rin. Von 1999 bet 2003 weer he Kreisvörsitter von’n JU-Kreisverband Cuxhoben un von 2003 bet 2009 Bezirksvörsitter von’n JU-Verband Elv-Werser.

2004 is he Maat von’n Stadtraad von de Stadt Cuxhoben worrn un hett dor 2009 dat Leid von de CDU-Frakschoon övernahmen. 2011 is he ok in’n Kreisdag von’n Landkreis Cuxhoben wählt worrn. Dor hett he in de Utschüss för Finanzen un Hoochbo un Straat un Verkehr seten.

Bi de Landdagswahl in Neddersassen 2013 weer he Direktkannedaat för de CDU in’n Wahlkreis Cuxhoben un hett 41,4 % von de Eerststimmen kregen. Dormit kunn he sik nich gegen Uwe Santjer von de SPD dörsetten un is nich in’n Landdag intagen.

Bi de Landdagswahl in Neddersassen 2017 weer he wedder Direktkannedaat in’n Wahlkreis Cuxhoben un hett düt Maal 34,0 % von de Eerststimmen kregen. Dat hett wedder nich utreckt, üm sik gegen Santjer dörtosetten. Röhler is denn aver över Platz 22 von de CDU-Landslist in’n Landdag intagen.

Weblenken[ännern | Bornkood ännern]