The Dawn Rider
| Filmdaten | |
|---|---|
| Plattdüütsch Titel: | — |
| Originaltitel: | The Dawn Rider |
| Düütsch Titel: | Reiter in der Dämmerung |
| Produkschoonsland: | USA |
| Johr vun’t Rutkamen: | 1935 |
| Läng: | 53 Minuten |
| Originalspraak: | Engelsch |
| Filmkru | |
| Speelbaas: | Robert N. Bradbury |
| Dreihbook: | Robert N. Bradbury Lloyd Nosler (Story) |
| Produkschoon: | Paul Malvern |
| Musik: | Billy Barber |
| Kamera: | Archie Stout |
| Snitt: | Carl Pierson |
| Dorstellers | |
| |
The Dawn Rider (op platt so veel as „De Schummertiet-Rieder“; dt. Titel: Reiter in der Dämmerung, Der Mann ohne Gnade, Freunde un Der geheimnisvolle Reiter) is de Titel vun en US-amerikaanschen Western ut dat Johr 1935. In den B-Movie hett John Wayne de Hööftrull speelt, Speelbaas weer Robert N. Bradbury. Dreiht weer de Film an verscheden Öörd in’n US-Bundsstaat Kalifornien[1]. De Premiere vun den Film fünn an’n 20. Juni 1935 in de USA statt[2].
Inholt
[ännern | Bornkood ännern]John Mason hett sien Vadder al lang nich mehr besöcht, de in en lütte Stadt dat Büro vun en Express-Badendeenst föhrt. Kumm, dat John in de Stadt is, warrt he in en Haueree mit Ben McClure verwickelt, mit den he sik glieks dorna goot anfrünnen deit. Se gaht tosamen in dat Büro vun ‚Dad Mason‘, as dor jüst en Överfall stattfinnt. As John sien Vadder en Pistool ruthalen deit, warrt de vun en vun de Banditen dör’t Finster doodschaten. Foorts neiht John achter de Bande ran un kann ok twee vun de Rövers doodscheten. Man ok he sülvst kriggt swoor wat af. Ben finnt em, bringt em in sien Huus ünner un lett em dor vun Alice gesund plegen, in de Ben sik al lang verkeken hett, de aver nix vun Ben will.
Keeneen weet, dat Alice ehr Broder Rudd de Kopp vun de Röverbande is. Man Rudd tögert, John – so lang he sik nich wehren kann – an de Siet to maken, ofschoonst he Tüüg vun den ÖVerfall weer un den Dood vun sien Vadder nich eenfack hennehmen deit. De Röverbande maakt wietere Överfäll op de Express-Kutschen. Jemehr Informatschonen kriegt se vun den Saloon-Besitter. Een Dag markt John, dat Rudd sien Vadder ümbröcht hett: He kennt dat opfallige Halsdook, dat Rudd bi den Överfall an harr. Üm de Bande in en Fall to locken, deit he so, as wenn he en Goldtransport maken will. Wohrhaftig överfallt de Bande de Kutsche, man John kann jem meist all, een na’n annern, utschalten.
De eenzige, de utneihn kann, is Rudd, de op de Flucht na sien Ranch rieden deit, üm dor sien Peerd to wesseln. John ritt em achteran, finnt op de Ranch aver blots noch Alice vör, de vun nix afweet. John will ehr ok nich verraden, worüm he achter Rudd her is. Ben, den Rudd vörher al mit Afsicht op John ieversüchtig maakt hett, sütt de beiden vun wieter weg un glöövt nu, dat de beiden anbanneln doot. Wiel nu twüschen Rudd un John en apenen Striet losbreken deit, wennt sik Ben vun John af. Ut Ieversucht nimmt he de Patronen ut John sien Colt. John markt dorvun nix un maakt sik op’n Weg in de Stadt to en Duell mit Rudd. As Ben nu doch en slecht Geweten kriggt, ritt he achter John ran un kann em jüst noch dat Leven redden. He schütt Rudd doot, jüst as de John an de Siet maken will. Man, ok Ben warrt drapen un blifft op de Straat in John sien Arms dood. De Film ennt mit de Hochtiet vun John un Alice.
Weblenken
[ännern | Bornkood ännern]- The Dawn Rider in de Internet Movie Database (engelsch)