Systool

Vun Wikipedia
Zur Navigation springen Zur Suche springen
De Systool vun’t Hart

De Systool (afleidt vun’t gr. συστολή „Tosamentrecken“) betekent de Phaas vun’n Bloodkreisloop, wenn dat Hart sik tosamentehn un dat Blood ut de Hartkamern utsmieten deit. Dat Gegendeel dorto is de Diastool, wenn sik dat Hart wedder entspannt un Blood nafüllt warrt. Dat Blood warrt dör dat Tohopentrecken ut de Hartkamern rutdrückt. De Systool beschrifft de Druckleistung vun’t Hart.

De Duer vun de Systool blifft teemlich gliek, ok wenn sik de Hartfrequenz (Puls) ännert. De Diastool dorgegen ännert ehr Läng düchtig. Bi en utwassen Minschenduert de Systoll ruchweg 300 Millisekunnen.

De Systool vun de Hartkamer warrt in en korte mechaansche Anspannungsphaas un en länger duern Utsmietphaas ünnerdeelt. In de Anspannungsphaas sünd de Kamern mit Blood füllt, de Seil- un Taschenklappen sünd slaten. De Druck warrt grötter. In de tweeten Phaase warrt de Druck in de Kamern grötter as de Blooddruck in’n Truncus pulmonalis („Lungenstamm“) un Aorta un de Taschenklappen gaht apen. Denn kann dat Blood in de groten Bloodfatten inströmen.

De mechaansche Utsmietphaas fangt an:

  • in’t Phonokardiogramm oder auskultatoorsch mit den eersten Harttoon
  • in de Echokardiografie mit dat Apengahn vun de Aortenklapp
  • in’t EKG mit de R-Tack

Se geiht to Enn:

  • in’t Phonokardiogramm oder auskultatoorsch mit den tweeten Harttoon.
  • in de Echokardiografie mit dat Sluten vun de Aortenklapp
  • in’t EKG mit de T-Bülg

Vör de Systool sünd de Hartkamern wiet un vull mit Blood. De Vörhöff sünd dorgegen tosamentogen. Beid Hartkamern treckt sik wiel de Systoll gliektietig tosamen un dat Blood warrt utsmeten in de Lungenarterie un in de Aorta. Vun dor ut strömt dat Blood sien Weg in de Lungen un dör den Lief. De Vörhöff wiet sik to glieken Tiet un füllt sik wedder mit Blood. De Togang to de Hartkamern warrt wiel de Systool dör Seilklappen dicht maakt, vun wegen dat keen Blood in de Vörhöff torüchlopen kann. Na de Systool kummt de Diastool, in de de Muskel afslappen doot. Dorbi strömt dat Blood ut de Vörhöff dör de Seilklappen, de nu apengaht, in de Hartkamern in. De Taschenklappen sünd nu dicht, dat dat Blood, dat wiel de Systool utsmeten worrn is, nich wedder in’t Hart torüchlöpt.

Wiel de Systool, is de Hartmuskel nich anregbor (afsluut Refraktärität).

Kiek ok[ännern | Bornkood ännern]