Swarttunnensand

Vun Wikipedia
Wesseln na: Navigatschoon, Söök
Luftbild von 2012: Aaßlersand, Swarttunnensand un Pagensand

De Swarttunnensand is en 582 Hektar groot Binneninsel un Naturschuulrebeed in de Ünnerelv. De Sand is 3500 Meter lang, bet to 400 Meter breed un höört to de Gemeen Drochters in’n neddersassischen Landkreis Stood. Op de annere Sied von dat Hauptfohrwater von de Elv liggt Pagensand, wat to Sleswig-Holsteen höört.

Dat Naturschuulrebeed driggt dat Kennteken NSG LÜ 126 un is an’n 16. August 1985 ünner Schuul stellt worrn.

Swarttunnensand weer bet 1968 en Slickbank vör Aaßlersand in de Ünnerelv un weer blots bi Leegwater dröög. As de Elv 1968/1969 von 12 op 13,5 Meter utbaggert worrn is (Elvverdepung), is de Slick op’n Swarttunnensand opspöölt worrn. 1969/1970 is de Sand tosätzlich mit Aaßlersand verbunnen worrn. Dat schull de Waterströöm in de Elv so ännern, dat de Elv de Fohrrinn sülvs freespöölt. Düsse Damm is aver noch in dat sülve Johr dör en Stormflood wegspöölt worrn. As de Elvverdepung toenn weer, hebbt se den Sand begröönt, ünner annern mit Loovbööm, dat de Sand nich so stöfft. He liggt op 0 bet 1 Meter över NN.

Siet 1973 is jümmer von März bet Oktober en Vagelwart von’n Vereen Jordsand op Swarttunnensand. De Sand is vondaag Levensruum för allerhand Soorten Watervagels.



Koordinaten:53° 43′ N, 9° 28′ O