Star Trek (Feernsehreeg)
| Daten vun de Reeg | |
|---|---|
| Plattdüütsche Titel: | — |
| Düütsche Titel: | Raumschiff Enterprise |
| Originaltitel: | Star Trek |
| Produkschoonsland: | USA |
| Produkschoonsjohr(en): | 1966–1969 |
| Produzent(en): |
Gene Roddenberry |
| Episodenläng: | ~48 Minuuten |
| Episodentall: | 79 in 3 Staffeln |
| Originalspraak: | |
| Musik: |
Alexander Courage |
| Titelleed: | |
| Idee: | |
| Genre: | |
| Eerst Sennen: | 8. September 1966 op NBC |
| Eerst Sennen (D): | 27. Mai 1972 op ZDF |
| Dorsteller | |
| |
Star Trek (op Platt so veel as „Reis na de Steerns“; dt. Titel: Raumschiff Enterprise), later ok as Star Trek: The Original Series (TOS) betekent, is en US-amerikaansche Science-Fiction-Feernsehreeg ut de 1960er Johren, de vun Gene Roddenberry utdacht un ümsett worrn is. In de Reeg geiht dat üm dat Ruumschip Enterprise, dat ünner’t Regeer vun Captain Kirk in Rebeden vun’t Universum vördringen deit, de noch nich utforscht sünd. De internatschonal tosamensette Kru vun’t Ruumschip dröppt dorbi op jümmer ne’e Leevwesen, Effekten un Gefohren.
De Tokiekertallen weern dormols nich so hocch, so dat de Reeg 1969 na dree Staffeln un 79 Folgen instellt worrn is. Eerst in de Johren dorna hett sik ut de Feernsehreeg dat popkulturellen Phänomen Star Trek entwickelt. Dorut is een vun de weltwiet gröttsten Serien-Franchises worrn.
Kunzept vun’n Inholt
[ännern | Bornkood ännern]De Reeg speelt in’t 23. Johrhunnert, in dat de Minschen op de Eer jemehr sozialen un weertschopplichen Problemen bikamen sünd. Dat Utforschen vun’t Weltall hett to Allianzen mit butenirdische Leevformen föhrt un de Vereente Föderatschoon vun de Planeten hett sik billt. De Kru vun de Enterprise hett de Opgaav unbekannte Leevformen optodecken. Dat Openeendrapen mit unbekannte Begeevnissen un Phänomenen as ok ne’e Feenden stellt för Cpt. James Tiberius Kirk un sien Offizeeren jümmer wedder swore Opgaven dor.
To de faste Mannschop vun Cpt. Kirk, de in de Reeg en grote Rull speelt, tellt de Eerste Offizeer un Wetenschopsoffizeer Mr. Spock un de Schipsdokter Dr. Leonard McCoy, de faken mit sien Ökelnaam „Pille“ ansnackt warrt. Cmdr. Spock is en Halfvulkanier, de sik nich blots wegen sien spitze Ohren un Ogenbroen vun de Minschen op dat Schip aftekent. Dat sünnere Markmol vun de Vulkanier is vör allen jemehr logische Denken, dat von Geföhlen to’n gröttsten Deel free is. In’n Gegensatz dorto steiht de hartliche mitünner aver ok grummelige McCoy för en humanistisch Weltbild. Disse dree Figuren hebbt ünnerscheedliche Egenschoppen, de sik gegensietig vervullstännigt un jem to en Triumvirat maakt: Faken gifft dat apenen Kunflikten twüschen den logisch-ratschonalen Spock un den idealistischen McCoy, de den Kaptein in swore Situatschonen wedder dorbi helpen doot, den richtigen Sluss to tehn.
De wieteren groten Rullen ünner de Mannschop vun de Enterprise stellt en Afbild vun de ünnerscheedlichen Natschonalitäten op de Eer dor. Dor is toeerst de schottische Ingeneurbaas Montgomery Scott, de ’n beten schrullig is, aver all technische Problemen wedder klor kriggt. För de Navigatschoon is de Japaner Hikaru Sulu tostännig as jüst so (as de tweete Staffel) de junge Russ Pavel Checkov. As sünners progressiv gell to de Tiet vun de Produkschoon de Rull vun’n Kommunikatschoonsoffizeer, vun wegen dat mit Lt. Nyota Uhura nich blots en Fro, man dorto noch en Afrikanerin in en leiden Positschoon to sehn weer.
To de technischen Vörutsetten vun’t Star-Trek-Universum tellt de Warp-Andrief vun de Ruumschipp. Dormit warrt Reisen mit Snelligkeiten över Lichtsnelligkeit mööglich. Dat gifft an Boord lüttere Shuttle-Scheep, man tomeist besöökt de Lüüd vun de Enterprise de frömden Planeten mit de Technologie vun’t Beamen: Leevweseb oder Saken warrt mit disse Technik in jemehr Molekülen opsplitt un op de annern Siet wedder tosamensett.
Ok de Kommunikatschooon twüschen die Kru-Liddmaten op de Enterprise un buten dat Ruumschipp warrt dör technische Redschoppen ünnerstütt. För’t Opteken, Utwerten un Överdrägen vun Daten gifft dat den Tricorder un de tyypsch Wapen, de de Lüüd mit sik föhrt, is de Phaser, de wahlwies op Benüsseln oder Doodmaken instellt warrn kann.
De Titel Star Trek, de vundaag nich mehr blots för de Originalreeg bruukt warrt, man för de hele fiktive Welt mit all sien Feernsehregeen und Speelfilmen steiht heet so veel as „Tog na de Steerns“ un is anlohnt an de suren Reisen vun de US-amerikaanschen Pioneeren, de mit jemehr Plaanwagens den noch unbekannten amerikaanschen Kontinent dörreist sünd un besiedelt hebbt („Ansiedlertrecks“). Bi sien Kunzept vun de Reeg is Gene Roddenberry dorvun utgahn, dat in’t Weltall mit grote Wohrschienlichkeit vele Planeten as de Eer vörkamt, de blots eerst noch opdeckt warrn mööt. Man, ok ut finanzielle Grünnen sünd in de Reeg de meisten Planeten so as de Eer dorstellt un ok de meisten extraterrestrischen Leevformen sünd humanoid un ünnerscheed sik tomeist blots dör utfallen Liefdelen vun de Minschen op de Eer, as to’n Bispeel de Huutfarv oder den buteren Knakenbo. Oder se warrt dör sünnere Egenschoppen vun’n Charakter defineert, as to’n Bispeel dat streng logische Denken vun de Vulkanier oder dat kriegerische vun de Klingonen. Afsehn vun disse Vereenfachen weer de vernünftige Ümgang mit butenirdische Leevformen en wichtigen Aspekt vun de Feernsehreeg, de wat anners dorstellen wull as de klassischen Invasionsgeschichten, de to de Tiet in de Science-Fiction-Produkschonen begäng weern.
Gene Roddenberry hett sik jümmer gegen de Ansicht verwohrt, dat de Steernflott en militäärsche Organisatschoon weer, liekers weern de Strukturen un de Ümgangsform an Boord militäärsch: De Liddmaten vun de Kru hebbt Uniformen an un snackt sik gegenseitig mit jemehrn Deenstgraad an. Bi de Begeevnissen un Episoden steiht jümmers de Fredensmisschoon in’n Vördergrund, aver liekers kummt dat in’n Verloop vun de enkelten Folgen jümmer wedder regelmatig to Kunflikten, de doch wedder mit Wapen utdragen warrt.
Produkschoonshistorie
[ännern | Bornkood ännern]In’t Johr 1964 is för den US-amerikaanschen Feernsehsenner NBC de Pilotfilm mit den Titel The Cage produzeert worrn. In de Hööftrull speel Jeffrey Hunter den Captain Pike. De Verantwoortlichen hebbt aver aflohnt, de Reeg Star Trek in disse Form ümtosetten, jem weer in dat Science-Fiction-Aventüer veel to veel to’n Nadenken binnen[1]. Man, de Produkschoonkru üm Roddenberry hett en tweete Chance kregen, müss dorför aver eenige Ännern hinnehmen: So schülln de Actionelementen in de Reeg mehr Gewicht hebben un dat schüll ok keen Fronslüüd in leiden Positschonen to sehn wesen. Dormit müss de as „Number One“ ansnackte eerste Offizeer, de vun Majel Barrett speelt, wedder rutnahmen warrn. Man, in een annern Punkt künn Roddenberry sik bi’n Senner dörsetten: Spock, de mit sien spitze Ohren un Ogenbroen en dübelschen Indruck maken de, is ok in de överarbeiten Version vun de Feernsehreeg bleven.
De tweete Pilotfilm weer denn Where No Man Has Gone Before (dt.: Die Spitze des Eisbergs) dreiht, in den nu William Shatner as Captain Kirk an Steed vun Hunter spelen dee, de in de Twüschentiet annere Plichten övernahmen harr. Dormit weer de Senner denn tofreden. En poor Saken sünd denn noch an dat Prodkuschoonsdesign (sünners an de Kledaasch) ännert worrn un ok bi de Personen, wobi de Togang vun den Schippsdokter McCoy sünners opfallig is. Dormit güng de eerste Staffel denn in Produkschoon. In’n Dörsnitt sünd üm de söss Daag för een Episood to’n Dreihn bruukt worrn[2].
1. Staffel (1966–1967)
[ännern | Bornkood ännern]Mit de Episood The Man Trap (dt.: Das letzte seiner Art) is Star Trek an’n 8. September 1966 in’t amerikaansch Feernsehn anlopen. De Geschicht üm en butenirdisch Leevwesen, dat Solt to’n Överleven bruukt, in de Gestalt vun McCoy Jöögdleefste opduukt un sik an’t Enn nich to helpen weet un mehrere Mannschoppsliddmaten an de Siet maakt, vördem dat sülvst ümbröcht warrt, is vun’n Senner as eerste Folg utwählt worrn. De Schrievers üm Roddenberry harrn dat lever seh, wenn en annere Folg toeerst sennt worrn weer, de mehr dat Niveau wiest harr, dat mit de Feernsehreeg anstreevt warrn schüll, as to’n Bispeel The Naked Time (dt.: Implosion in der Spirale), in de sik de Kruliddmaten mit en Viurs infizeert, dat jemehr versteken Geföhlen freesett un opletzt den Verstand roovt un to’n Dood föhrt.
De Produkschoon harr mit wenig Geld torecht to kamen, dat sünners för en Science-Fiction-Reeg knapp to wesen schien. De Entwickeln un Ümsetten vun de Dreihböker hüng wiel de eersten Staffel düchtig achteran. Üm to’n een keen vun de wekentlichen Sennenterminen utfallen laten to möten un op de annern Siet den düren Pilotfilm mit Jeffrey Hunter nich ümsünst maakt to hebben, is The Cage mit en Rahmengeschicht in de lopen Reeg inarbeit worrn: Wiel en Gerichtsverhanneln gegen Spock, de mit de Enterprise dörneiht weer, üm den in de Twüschentiet schannen un lahmen Captain Spike na’n Planeten Talos IV to bringen, is dat Film material vun den eersten Pilotfilm as visuelle Logbook-Opteken op de Lienwand wiest worrn. The Menagerie (dt.: Talos IV – Tabu, Teil I und Teil II) is de eenzige Tweedeler vun de Reeg bleven un weer 1966 mit den Hugo Award uttekent as beste dramaatsche Science-Fiction-Produkschoon[3].
De as 28. Folg utstrahlte Geschicht The City on the Edge of Forever (dt.: Griff in die Geschichte) tellt to de Folgen, de vun de klassischen Reeg an meisten fiert worrn sünd. Kirk un Spock folgt dorin en McCoy, de vun Wahnvörstellen plaagt warrt, in dat New York vun de 1930er Johren. Kirk verkiekt sik dor in Edith Keller (Joan Collins). Üm aver de Tiet nich to verännern mutt Kirk McCoy dorvun afhollen, Edith dat Leven to redden. De Episood baseert op dat Dreihbook vun den renomeerten Science-Fiction-Schriever Harlan Ellison, dat aver för de Dreiharbeiten noch mol bannig överarbeit worrn is: Dat de Bruuk vun Drogen to de Wahnvörstellen föhren schülln, hett Roddenberry nich in dat Kunzept vun Star Trek passt. An de Steed vun de Drogen hett sik McCoy bi en Behanneln ut Versehn en Överdosis sprütt. De Folg is 1967 mit den Hugo Award as beste dramaatsche Science-Fiction-Produkschoon uttekent worrn. Dat Originaldreihbook vun Ellison is vun de Screen Writers Guild ehrt worrn[4].
De Tokiekertallen weern aver allns annere as goot, so dat meist de Instellen vun de Feernsehreeg drauht hett. Blots de Insaag vun ieverige Science-Fiction-Anhangers un -schrievers hett dorför sorgt, dat dat wietergüng. „The Committee“, dat ut naamhaftige Schrievers as Robert Bloch, Harlan Ellison, Poul Anderson, Theodore Sturgeon, A. E. van Vogt un annere bestahn hett, rööp to en groot anleggte Breefakschoon op. NBC hett sik dorvun övertügen laten un segg denn to, en tweete Staffel produzeeren to laten. Man, de Sennentermin is 1967 vun Dunnersdag- op Freedagavend verleggt worrn, wat noch slechtere Tokiekertallen vermoden laten hett.
|
|
2. Staffel (1967-1968)
[ännern | Bornkood ännern]Bi de tweeten Staffel weer de opfalligste Ännern, dat nu de Russ Pavel Checkov as Deel vun de internatschonal tohopensetten nee dorbi weer. De vun Walter Koenig speelte Figur is bi de Tokiekers goot ankamen un is na en Proovtiet as fasten Bestanddeel in de Reeg opnahmen worrn. De eerste Episood vun de tweete Staffel weer den Ümstand todacht, dat Spock so geern sehn weer: In Amok Time (dt.: Weltraumfieber) warrt de streng logische Vulkanier vun dat Pon Farr plaagt, en Oort „Brunfttiet“, de mit eenmol över em kummt. Dör disse Folg is nich blots de bekannte vulkaansche Grööt – de rechte Hand, bi de de Fingers twüschen Mittel- un Ringfinger uteenhollen warrt – man se legg ok den Grundsteen för den Vulkanier-Mystizismus, wat sik to’n wichtigen Deel vun’t Star-Trek-Universum entwickelt hett. Ok in de Folg Journey to Babel (dt.: Reise nach Babel) stünn wedder Spock in’n Middelpunkt. Dorin müss sien Vadder Sarek mit annere Delegeerte to en wichtige Kunferenz bröcht warrn. De Person Sarek warrt ok in de lateren Reegen noch wedder opgrepen. Wietere Hööchpunkten vun de Staffel weern de Folgen Mirror, Mirror (dt.: Ein Parallel-Universum), in de in en Paralleluniversum en kriegerische an Steed vun de friedliche Enterprise opduukt, un The Trouble with Tribbles (dt.: Kennen Sie Tribbles?), de as humorvullste Folg een vun de an’n leefsten sehn is. De Schippskru hett dat dorin mit lütte fellklutenoordige Deerten to doon, de sik jümmerfoort vermehren doot.
De Tokiekertall is aver ok wiel de tweeten Staffel nich beter worrn. So stünn de wietere Produkschoon in’n Anluss vun de tweeten Staffel wedder op de Kipp un künn eerst dörsett warrn, as en wietere Protestakschoon organiseert weer. Ruchweg een Million Breven güngen bi de NBC in un hebbt de utermatige Verbunnenheit vun de troen Tokiekers to de Feernsehreeg ünnerstreken[5].
|
|
3. Staffel (1968-1969)
[ännern | Bornkood ännern]De Senner hett noch mol Verlööf geven för en wietere Staffel, hett aver för de Reeg en lateren Sennentermin vörsehn, wat sik op de Tokiekertall noch mol slecht utwirken de. Butendem sünd de Geller kört worrn, so dat opwännige Speelöörd buten vun de Enterprise to’n gröttsten Deel weglaten warrn müssen[6].
Ünner de verscheden Mööglichkeiten hett de NBC de Folg Spock’s Brain (dt.: Spocks Gehirn) as eerste Folg vun de Staffel utwählt. För vele Kiekers vun de Feernsehreeg tellt disse Episood to de slechtesten vun de an sik bemöhte Reeg. As sünners goot henkregen gellt dorgegen For the World is Hollow and I Have Touched the Sky (dt.: Der verirrte Planet), in de en Asteroid op’n Weg is, mit en bewahnten Planeten tosamentostöten, sik denn aver as'n tarnt Ruumschipp rutstellt.
För sünner’n Schandaal hett de Episood Plato’s Stepchildren (dt.: Platons Stiefkinder) sorgt, in de sik Kirk un Uhura in’n Verloop vun de Geschicht küsst hebbt. Se weern dorto vun en luunschen Herrschet mit telekineetsche Anlagen dorto dwungen worrn. Düsse eerste Söten twüschen en witten Mann un en swarte Fro in’t US-amerikaansche Feernsehn, gell to de Tiet as Tabubreken. Dat geev eenige Senners in de Süüdstaaten, de dorüm de Folg nich utstrahlen wullen. De Kru müss bi de Dreiharbeiten dorop achten, dat sik de Lippen vun de Schauspelers nich wirklich anröhren deen. Mit Turnabout Intruder (dt.: Gefährlicher Tausch) hett NBC an’n 3. Juli 1969 denn de 79. un letzte Folg vun de Originalreeg sennt. Dat weer eendüdig, dat disse dörsnittliche Folg nich as Afsluss vun de Feernsehreeeg dacht weer[7].
|
|
Nawirken
[ännern | Bornkood ännern]Entwickeln vun’t Phänomen
[ännern | Bornkood ännern]
De Spood vun de Reeg hett sik bi’t eerste Utstrahlen vun de Star Trek op en eher lütte Koppel vun Science-Fiction-Intresseerte beschränkt. As de Feernsehreeg na de drüdden Staffel afsett worrn is, güng dat an’n Verkoop vun de Sennenrechten an öörrtliche un private Senners in de USA. Dor kreeg de Reeg den tomeist betere Sennentieten, wat ok de Tall vun de Tokiekers na baven scheten leet. De Lüüd intresseeren sik nu ok mehr för de Aventüers vun de Enterprise, sünners ok, vun wegen dat 1969 de eerste Maandlannen wesen is. Ok in’t Utland hett sik de Reeg bald to en groten Spood bi de Tokiekers entwickelt. In Grootbritannien weer Star Trek 1970 dat eerste mol buten vun de USA utstrahlt. Twee Johren later harrn al 170 Senners in de helen Welt de Feernsehreeg in jemehr Programm, as ok dat ZDF in Düütschland[8].
1972 fünn in de USA ok de eerste Star-Trek-Convention statt, de ruchweg 3000 Besökers harr. Dit Drapen vun de Anhangers weer nu jeed Johr maakt un harr 1974 al mehr as 15.000 Besökers, wat nu de Organisatschoon vun mehrere öörtliche Begeevnissen nödig maken de. Blangento weern in de wassen Fangemeen de so nöömten Fanzines jümmer mehr in ’t Kamen. In disse Tietschriften ründ üm Star Trek hebbt Anhangers Geschichten un Gedichten sülvst verfaat un dorin Motiven ut de Feernsehreeg opgrepen[9]. Dör de al in de 1960er Johren in de USA wiet verbreedte Gewarfsidee vun’t Merchandising hett ok de professchonelle Hannel vun den tonehmen Tosprook wunnen: Al bi’t Eerstutstrahlen weern de vun James Blish schreven Kortgeschichten, de op de Dreihböker baseeren, geern vun de Anhangers köfft. Man nu weer dat Anbott na un na üm all möögliche Produkten utwiet, as T-Shirts, Buttons, Slötel- un Kedenanhangers, Speeltüüch, Tellers, Klocken, Modellbosätz un noch veel mehr[10] .
Zitaten un annere Elementen ut de Feernsehreeg hebbt jemehrn Weg in de Alldagskultur funnen, so to’n Bispeel de Vulkanier-Grööt, oder de Satz „Beam me up, Scotty“, de in de Reeg aver in disse Form nie so seggt worrn is. In’t Johr 1977 is en vun de Medien opwännig inszeneerte Dööp vun de eersten Ruumfähr vun de NASA – de blots to’n Öven un för Proven bruukt worrn is – op den Naam Enterprise maakt worrn, de opletzt ok dorför Bewies geev, dat Star Trek natschonal utermatig geern sehn weer[11].
Nafolgen Warken
[ännern | Bornkood ännern]De eerste Nalöper-Feernsehreeg keem 1973 int amerikaansche Feernsehn. De sporsom animeerte Tekentrickreeg Star Trek:The Animated Series (dt.: Die Enterprise) för Kinner is woll mit’n Emmy uttekent worrn, harr aver blots so wenig Tokiekers, dat se na 22 Folgen wedder instellt worrn is[12] .
In’n November 1977 hett Paramount Pictures negen Daag vör’n plaanten Dreihanfang vun de Neeoplaag vun de Feernsehreeg ünner den Arbeitstitel Star Trek: Phase Two afseggt, üm en poor Maanden later den eersten Enterprisefilm för de Kinolienwand künnig to maken. Star Trek: The Motion Picture hett 1979 sien Premiere hatt. As dat nich anners wesen künn, is de Film en groten kommerziellen Spood worrn, man de Anhangers un Kritikers weern mit den Film nich tofreden.
För den tweeten Film is dorüm ünner den Produzent Harve Bennett un den Speelbaas Nicholas Meyer en ne’e Richt för de Reeg vörgeven worrn. Gene Roddenberry hett an Influss verloren un weer bannig untofreden, dat de militäärschen Elementen nu so stark in’n Vördergrund kemen. Man, dorvun afsehn keem Star Trek: The Wrath of Khan bi de Tokiekers un de Kritiker goot an un geev dorüm den Stil för de wieteren Star-Trek-Filmen vör. Ok Leonard Nimoy, de siet den Spood vun de Feernsehreeg düchtig ünner de dullen Identifikatschoon mit sien Rull as Spock to lieden un al annere Plaans maakt harr, is denn doch bi de Reeg dorbi bleven un weer bi de nächsten beiden Produkschonen ok glieks Speelbaas.
Sünners de weltwiet grote Spood vun Star Trek IV: The Voyage Home geev Andrief för den Plaan, en ne’e Star-Trek-Feernsehreeg mit en ne’e Mannschop in’t Feernsehn to bringen: Star Trek: The Next Generation (dt.: Raumschiff Enterprise: Das nächste Jahrhundert) is in’n Oktober 1987 to’n eersten mol utstrahlt worrn un is in’n Verloop vun söven Staffeln to een vun de spoodrieksten dormoligen Science-Fiction-Regen worrn. Dorna geev dat noch twee wietere Kinofilmen in de klassischen besetten, wiel de dorop folgen veer Filmen an de 1994 instellte Feernsehreeg The Next Generation ansluten deen.
Bi den ölvten Kinofilm is de Produkschoonsfirma Paramount Pictures wedder torüch na’n Anfang gahn. In den Film Star Trek, de 2009 rutkamen is, warrt vör allen de Vörgeschicht vun Kirk un Spock in jemehr jungen Johren dorstellt[13][14].
Mehr oder minner na dat vun Roddenberry utklamüsterte Kunzept sünd wietere dree Feernsehregen rutkamen, wobi Star Trek: Deep Space Nine un Star Trek: Voyager ruchweg een Johrhunnert na de Aventüer vun Kirk un sien Lüüd speelt. De opstunns letzte Reeg Star Trek: Enterprise speelt dorgegen ruchweg een Johrhunnert vör de Tiet vun Kirk.
In dat Johr 2007 is de Reeg inn Opdrag vun’n Senner CBS digital överarbeit worrn. In de Kru weern ok de Star-Trek-Fachlüüd Denise un Michael Okuda as ok de Söhn vun Roddenberry, Eugene. Se hebbt vör allen de Trickeffekten moderniseert. Butendem i s de Titelmusik nee inspeelt un de hele Reeg in’t HDTV-Format överdragen worrn[15].
Parodien
[ännern | Bornkood ännern]To de Parodien op de Feernsehreeg tellt to’n Bispeel de Episoden „Pigs in Space“ binnen de Muppet Show. Star Trek weer de Vörlaag för de Slapstick-Filmreeg Raumschiff Highlander vun Robert Amper as ok för Klaus Knösels Star Mac ut dat Johr 1990, in det ünner annern de hoochdüütschen Synchroonstimmen bruukt worrn sünd. Ok in de US-amerikaanschen Conedyreeg Saturday Night Live weer Star Trek faken parodeert, in de de Rull vun Cpt. Kirk ünner annern vun John Belushi un Tim Carrey speelt weer. Ut Finnland stammt bito de Filmreeg Star Wreck, de twüschen 1992 un 2005 entstahn is.
Ok för den Speelfilm Galaxy Quest un de Persiflage Traumschiff Surprise vun Michael Herbig weer – blangen de Star Wars-Filmen – de klassische Star-Trek-Reeg de Hööftvörlaag. Jüst so ok för Herbigs Feernsehreeg Bullyparade.
Düütsche Faten
[ännern | Bornkood ännern]Dat ZDF hett de Reeg vun Mai 1972 af ünner den Titel Raumschiff Enterprise utstrahlt. Vun de 79 Folgen sünd toeerst 26 för de Synchronisatschoon utwählt worrn. As de düütschen tokiekers denn ok na mehr Folgen fragen deen, sünd nochmol 13 Episoden anköfft worrn. De wieteren veertig Folgen hett de tostännige Redakschoon aflohnt, vun wegen dat se to veel Gewalt wiesen oder moraalsch beanstand weern.
Üm de Folgen in dat Sennenschema intofögen, sünd de enkelten Folgen för’t düütsche Feernsehn op ruchweg 45 Minuuten kört worrn. De Synchronisatschoon hett de tomeist eernsten Texten vun’t Original mit flapsige Spröök oplockert, wat sik to’n Bispeel in den faken bruukten Ökelnaam „Spitzohr“ för Spock wiest. Sünnere Kritik vun de Fans bröch de Folg Weltraumfieber (orig.: Amok), de in de düütschen Faten ganz anners dorstellt weer: Spock hett hier nich ünner sien sexuellen Drift to lieden, man ünner en sünnere Krankheit, wobi en groten Deel vun de Geschicht as Feverdroom vun Spock dorstellt warrt[16].
De düütsche Privatsenner Sat.1 hett disse un de Folgen, de noch fehlen deen, nee synchroniseert un wies de Folgen vun’n 7. Januar 1985 an. Blots de Episood Patterns of Force is nich övernahmen worrn, vun wegen dat de Inholt düütlich op de düütsche Nazidiktatur anspelen de. Disse Folg is eerst 1995 för de Videopublikatschoon in’t Düütsche översett worrn, lööp aver vörher al mit düütsche Ünnertitels in’n Rahmen vun de late Sennenreeg kunst-stücke in’n ORF. In’t düütsche Betahlfeernsehn is se in de Twüschentiet mehrfach in de düütsche Synchroonfaten wiest worrn.
Synchroonsnackers
[ännern | Bornkood ännern]| Schauspeler/in | Rull | Synchroonsnacker |
|---|---|---|
| William Shatner | Captain James T. Kirk | Gert Günther Hoffmann |
| Leonard Nimoy | Commander Spock | Herbert Weicker |
| DeForest Kelley | Lt. Cmdr. Leonard McCoy | Manfred Schott (ZDF), Randolf Kronberg (Sat.1) |
| James Doohan | Lt. Cmdr. Montgomery Scott | Kurt E. Ludwig |
| George Takei | Lt. Hikaru Sulu | Fred Klaus |
| Nichelle Nichols | Lt. Nyota Uhura | Rose-Marie Kirstein (ZDF), Ilona Grandke (Sat.1) |
| Walter Koenig | Ens. Pavel Chekov | Elmar Wepper (ZDF), Martin Umbach (Sat.1) |
| Majel Barrett | Dr. Christine Chapel | Ruth Pistor, Dagmar Heller, Frauke Sinjen, Liane Hielscher |
| Grace Lee Whitney | Janice Rand | Ilse Pagé (ZDF), Ingrid Capelle (Sat.1) |
Literatur
[ännern | Bornkood ännern]- Ralph Sander: Das Star Trek Universum.
- William Shatner: Star Trek Erinnerungen. ISBN 3-453-09474-3
- Edward Gross und Mark A. Altman: Captain’s Logbuch. ISBN 3-89365-376-7
- Phil Pharrand: Cap’n Beckmessers Führer durch Star Trek – Die klassische Serie. ISBN 3-453-09475-1
- Denise und Michael Okuda: Die offizielle Star Trek Chronologie. ISBN 3-89365-443-7
- Dave Marinaccio: Alles, was ich im Leben wirklich brauche, habe ich von Star Trek gelernt. ISBN 3-453-08898-0
- J. M. Dillard: Star Trek: Wo bisher noch niemand gewesen ist – Eine Chronik in Bildern. ISBN 3-453-09071-3
- Allan Asherman: The Star Trek Compendium.
- Denise und Michael Okuda: The Star Trek Encyclopedia: A Reference Guide to the Future.
Borns
[ännern | Bornkood ännern]- ↑ „Too cerebral“, vgl. Asherman: The Star Trek Interview Book, S. 154.
- ↑ Vgl. Asherman: The Star Trek Interview Book, S. 164.
- ↑ Sander: Das Star Trek Universum, S. 39.
- ↑ Sander: Das Star Trek Universum, S. 58.
- ↑ Vgl. Sander: Das Star Trek Universum, S. 94.
- ↑ Vgl. Asherman: The Star Trek Interview Book, S. 163.
- ↑ Vgl. Sander: Das Star Trek Universum, S. 94–119.
- ↑ Vgl. Sander: Das Star Trek Universum, S. 293ff.
- ↑ Vgl. Sander: Das Star Trek Universum, S. 120f, 125f.
- ↑ Vgl. Sander: Das Star Trek Universum, S. 286–292.
- ↑ Vgl. Sander, S. 126.
- ↑ Vgl. Sander, S. 128.
- ↑ cinema.de över de Weltpremiere in Sidney (afropen an’n 12. April 2009).
- ↑ Besnacken op rottentomatoes.com (afropen an’n 12. April 2009).
- ↑ Startrek.com: TOS remastered
- ↑ Vgl. Sander, S. 295f.