Standing Bear (Ponca)

Standing Bear (* 1829; † 1908) weer en Hööftling vun de Ponca Indianer in dat hüüdig Nebraska. Bekannt wurr he dör en Gerichtsverfohren Standing Bear v. Crook, dat an‘ 30. April 1879 in Washington D.C. stattfunn, un in dat faststellt wurr, dat sück dat bi Indianer ok um Minschen hanneln deiht, de ok Anspröök up de Grundrechte vun de Amerikaansch Verfaaten hemm. Standing Bear hett in dissen Perzess gegen sien Internierung in en Militärlager in Omaha ,Nebraska, klagt. Dorbi deen hüm Susette La Flesche, en Ohama Indianerin as Dolmetscherin, un wurr dör dit Gerichtsverfohren bekannt. Standing Bear gellt as Sinnbild för dat Ünnerdrücken vun de indogenen Bevölkerung in dat hüdige Nebraska. För all Bedeeligten unverwacht hett dat Gericht de Internierung för illegal befunnen un Standing Bear un sien Gefolgslüüd mussen ut de Internierung dör de US Armee entlaaten wurrn.

Hööftling Standing Bear wurr 1829 in de dormalig Heimat vun de Ponca Indianer an‘ Niobara in den hüdigen US-Bundsstaat Nebraska boren. He is in dat Spannungsfeld vun de amerikaansch Oorinwahner upwussen. In sien Jöögd keem dat fakener to blödig Konflikten mit den Arzfeinden vun de Ponca, den Sioux un den Pawnee. De Ponca hemm as Buern un Jäger leevt. In‘ Sömmer hemm se Mais un Gemüüs anbaut, in‘ Winter gungen se up Büffeljagd.

Dör den Kansas-Nebraska_Act steeg de Tall vun de witt Siedler immer wieder an un de Angreep vun de Brule un Oglala Sioux wurrn immer starker.Dorum hemm se en Grootdeel vun hör Stammes-Rebeet in en Verdrag 1858 mit den Vereenigten Staaten an de Bundsregeeren aftreeden, hemm sück dorför aber en Rebeet an den Aowa Creek un an‘ Niobrara, in dat hüüdige nordöstliche Nebraska reserveert.

Doch de mit Verdrag tosekert Hülp dör de Vereenigten Staaten bleev ut. Dat Land weer för den traditschonellen Anbau vun Mais un Früchten nicht o gebruuken, de Angreep vun de Sioux wurrn immer starker un de US-Armee keem nicht o Hülp. Deswegen hemm de Ponca dat reserveert Rebeet 1865 mit en anner 96.000 Acre Rebeet an de Münnen vun de Niobrara in den Missouri tuuscht. Dat Rebeet weer fruchtborer un weer ok beter to verteidigen.

1868 hett man den Verdrag vun Fort Laramie tüschen den Sioux Indianern un de Regeeren vun de USA slooten. De Sioux kunne dormals ut en stark Positschoon herut verhanneln, harrn se doch jüst den Krieg um den Bozeman Trail in Montana gegen de US-Armee wunnen. Mit dissen Vertrag entstunn de Great Sioux Reservation. Aber de Verfaater vun den Verdrag harrn den Verdrag van 1865 mit den Ponca översehn un nich beacht. 96.000 Acre Land weern nu tweemal reserveert wurrn. Offiziell weer dat Rebeet an de Brule Sioux Indianer vergeeven wurrn.

In disse beweegt Tieden wurr Standing Bear to’n Hööftling vun de Ponca wählt. He hett Zazette (Susette) Primeau heiraadt un dat Paar harr mehrer Kinner. 1875 hemm Standing Bear un anner Hööftlinge vun de Ponca en Dokument ünnerschreeven, dat hör Umsiedlung in dat Indianer-Territorium in dat hüdig Oklahoma vorsehn dee. Standing Bear hett later behaupt dat he un de anner Hööftlinge de Ünnerschrift wegen en Missverständnis leist harrn. Se weern dorvan utgahn, en nee Rebeet dicht bi Omaha in dat hüüdig Nebraska to kriegen un nich in Oklahoma.

Dat Rebeet in Oklahoma weer nich to gebruuken. Völ Ponca sünd dor verhungert un hemm noor leevt. So is Standing Bear mit sien Lüüd weer torüchgahn. Wiel se hör Reservat verlaaten harrn wurrn se fastsett un in en Militärllager bi Omaha interneert.

Weblenken[ännern | Bornkood ännern]

Chief Standing Bear The trail ahead (engelsch)
www.nebraskastudies.org The trial of Standing Bear (engelsch)
US National Park Service Chief Standing Bear (engelsch)
Northern Plains Reservation Aid Biographies of Plains Indians Standing Bear — 1829-1908 (engelsch)
The Case of Standing Bear, Establishing Personhood under the Law (engelsch)

Literatur[ännern | Bornkood ännern]

Stephen Dando-Collins, Standing Bear Is a Person: The True Story of a Native American's Quest for Justice (engelsch)
Thomas Henry Tibbles Standing Bear and the Ponca Chiefs (engelsch)