Nebraska

Nebraska is en Bundsstaat vun de USA. He breet sik ut över en Rebeet vun 200.520 km². De Hööftstadt is Lincoln. De Staat liggt in den Middelwesten vun de USA. De Naam kümmt ut de Indianer-Sprake Chiwere un bedutt „sied Water“. Dat hett to doon mit den Platte River, de dör dat Land fleten deit. Vörmols höör Nebraska to de „Great American Desert“ (Grote amerikaansche Wööst) mit to, man hüdigendags warrt in dat Land veel Landweertschop bedreven. Dor hett Nebraska ok sien Ökelnaam vun weg: „Cornhusker-State“ („Koornspieker-Staat“). De Inwahners vun Nebraska hefft dat Land mit Hölp vun de moderne Landweertschop in en Land vull mit Ranches un Farmen verwannelt. Den Staat siene Geschicht is dorüm ok deep verbunnen mit de Bueree.

Geographie

Nebraska grenzt an South Dakota in'n Norden; Iowa un Missouri in'n Oosten, achter den Missouri River; Kansas in'n Süden; Colorado in'n Südwesten, un Wyoming in'n Westen. De gröttste Stadt is Omaha, de Hööftstadt is Lincoln. Nebraska liggt tomidden de Great Plains an den westlichen Rand vun den „Wetengördel“ („Grain Belt“. En vun de Slogans vun Nebraska is: „Wo de Westen anfangt“ (Where the West begins).

Inwahners

Nebraska hett 1.768.331 Inwahners (Stand: Census 1.7.2006], dormank 88,6 % Witte, 4,1 % Swatte un Afroamerikaners, 0,9 % Indianer, 1,7 % Asiaten, 7,4 % Hispanics.^[1]