Stadtspoorkass Cuxhoben
De Stadtspoorkass Cuxhoben is en Spoorkass mit Seet in Cuxhoben (Rohdestraat 6). De Bank höört to de Spoorkassen-Finanzgrupp un hett veer Filialen in’n Landkreis Cuxhoben (all tohoop in de Stadt Cuxhoben). De Vörsitter von’n Verwaltungssraad is Uwe Santjer. Dreger von de Anstalt des öffentlichen Rechts is de Stadt Cuxhoben. De Rechtsgrundlaag is dat Neddersassische Spoorkassengesett.
De BLZ is 241 500 01 un de BIC BRLA DE21 CUX. De Bilanzsumm weer an’n 31. Dezember 2018 982,93 Milljonen Euro, de Inlagen weren 781,5 Milljonen Euro un de Kunnenkredite 722,1 Milljonen Euro. De Bank hett üm un bi 223 Mitarbeiders (Stand Dezember 2018).
Blangen den Seet in de Rohdestraat in Cuxhoben hett de Spoorkass ok noch Filialen in Olenbrook, Olenwoold un Sahlenborg.
Historie
[ännern | Bornkood ännern]De Spoorkass is 1831 in Ritzbüttel as Ritzebütteler Sparcasse grünnt worrn. Ritzbüttel, nu Stadtdeel von Cuxhoben, weer to de Tied de Seet von dat Amt Ritzbüttel, dat to de Stadt Hamborg tohöört hett. De eerste Filiaal hett 1919 apenmaakt. De Gebüüd weren toeerst noch meedt, aver 1930 hett de Bank dat eerste egene Gebüüd boot, dat al an de Steed stünn, an de nu de Seet von de Stadtspoorkass is. Düt Gebüüd is 1977 utboot worrn. 1997 is dat Gebüüd von 1930 afreten worrn un dor is en neet Gebüüd boot worrn, dat nu tohoop mit de Gebüüd vn 1977 bruukt warrt.
Eerst nadem dat Rebeed mit dat Groot-Hamborg-Gesett an Prüßen fullen is, hett sik de Spoorkass 1938 den ne’en Naam Stadtsparkasse zu Cuxhaven geven. 1963 is denn de hüdige Naam Stadtspoorkass Cuxhoben (Stadtsparkasse Cuxhaven) kamen. Na de Rebeedsreform in Neddersassen, bi de en Reeg Gemenen ut’n vörherigen Landkreis Land Hadeln an de Stadt Cuxhoben fullen sünd, hett de Stadtspoorkass 1979 de Filialen von de Kreisspoorkass Land Hadeln in düt Rebeed övernahmen. Sietdem harr de Stadtspoorkass ölven Filialen.
För de Filialen in Groden, Döös, de Worth, Ox, in dat Lootsenveerdel un in dat Musikerveerdel hett de Stadtspoorkass 2020 beslaten jem in’n Mai 2020 dichttomaken. De SB-Standoort in Süderwisch warrt dichtmaakt un de Filiaal in Duhnen warrt to en SB-Standoort.[1] Dormit geiht de Tall Filialen von ölven op veer dal.
Vörstand
[ännern | Bornkood ännern]De Vörstand besteiht ut twee Maten. In’e Regel is dat so, dat dat deenstjüngere Vörstandsmaat den Vörsitt övernimmt, wenn dat deenstöllere Maat ut’n Vörstand rutgeiht.
| Tied | Vörsitter | Tweet Maat |
|---|---|---|
| 1948–1970 | Hans Herbert Albers | Amandus Colpe |
| 1970–1973 | Amandus Colpe | Ulrich Müller |
| 1973–1977 | Dietrich Fürst | Armin Korthals |
| 1977–1995 | Armin Korthals | Horst Dreyer |
| 1996–2000 | Horst Dreyer | Egon Hottendorf |
| 2000–2008 | Egon Hottendorf | Ralf-Rüdiger Schwerz |
| 2008– | Ralf-Rüdiger Schwerz | Helmut Weermann |
Literatur
[ännern | Bornkood ännern]- Horst Dreyer: Vertrauen, Verantwortung, Kontinuität – 175 Jahre Stadtsparkasse Cuxhaven. Deutscher Sparkassen-Verlag, Stuttgart 2006, ISBN 3-09-303798-0
Footnoten
[ännern | Bornkood ännern]- ↑ Aus für sieben Geschäftstellen. Stadtsparkassen-Vorstand: „Hoffnung ist keine Strategie“ / Einschnitt soll Selbständigkeit sichern, Niederelbe-Zeitung an’n 5. März 2020, Sied 11
Weblenken
[ännern | Bornkood ännern]
Stadtspoorkass Cuxhoben. Mehr Biller, Videos oder Audiodateien to’t Thema gifft dat bi Wikimedia Commons.
- Websteed von de Spoorkass (hoochdüütsch)