Sephardim

Sephardim (hebr.: ספרדים, Sfaradim; düütsch. Sepharden) is de Naam for de Joden, de bit 1492 un 1531 in Spanien (Al-Andalus) un Portugal leevt hefft un de denn vun dor verdreven wurrn sünd. Achterna hefft se sik in dat Osmaansche Riek un in den Maghreb in Noordwestafrika ansiedelt. En lüttjen Deel vun jem is ok na Noordeuropa gahn, sunnerlich na de Seehabens in de Nedderlannen, unner annern na Amsterdam, un na Noorddüütschland, besunners na Hamborg. Ok in Amerika, Indien un Afrika hefft se nee Wohnstäen socht un funnen. Ehre Kultur steiht up de Grundlaag vun de ibeersche Kultur. Dor verscheelt se sik dör vun de Aschkenasim, de vun Middel- un Oosteuropa präägt wurrn sünd.

Wo de Naam vun herkummt

De Naam Sephardim kummt vun de Landschop Sefarad (ספרד) vun her, de in de Bibel in dat Book vun den Profeten Obadja (Obd. 1,20) nömmt warrt. Dor hefft dormols Lüde in wohnt, de to de verdreven tein Stämm vun dat Noordriek Israel tohören döen. In dat Middelöller is de Naam up de Ibeersche Halsinsel topasst wurrn un up de Joden, de dor leven döen.