Río Dulce (Guatemala)
| Río Dulce | |
|---|---|
| Laag | Guatemala |
| Stroomsystem | Río Dulce |
| Läng | 43 km |
| Afströömrebeed | 3.435 km² |
| Born | Lago de Izabal (op 2 m över de See) |
| Münn | bi Livingston in de Bucht von Amatique (op 0 m över de See) |
| linke Blangenströöm | Río Sejá, Río Cienega, Río Chocón Machacas, Río Black Creek, Río Tatín |
| rechte Blangenströöm | Río San Juan Vicente, Río Frío, Río Bonito, Río Tamejá, Río Lámpara |
| schippbor | jo |
De Río Dulce is en 43 km langen Stroom in’n Municipio Livingston, Departamento Izabal, Guatemala, de in de Bucht von Amatique münnt, wat en Deel von’n Golf von Honduras is.
Verloop
[ännern | Bornkood ännern]De Stroom spiest sik ut’n Lago de Izabal, de sik sülvs vör allen ut’n Río Polochic spiest. Bi dat Dörp San Felipe de Lara (mit dat Castillo de San Felipe de Lara) verlett dat Water den See op en Höögd von blots noch 2 m över de See un flütt na Noordoosten. Twee Kilometer wieder in’n Noorden föhrt de CA-13 mit en Brügg över’n Stroom. Hier liggt ok de Oort Río Dulce. Nochmaal acht Kilometer wieder wiedt sik de Río Dulce to’n Golfete Dulce. Twüschen de Brügg un den Golfete Dulce münnt von links de Río Sejá un de Río Cienega un von rechts de Río San Juan Vicente. In’n 16 km langen Golfete münnt von links de Río Chocón Machacas un de Río Black Creek un von rechts de Río Frío un de Río Bonito. Twüschen Golfete Dulce un de See flütt de Stroom nochmaal 13 km dör en Bedd, dat twüschen 100 un 500 Meter breed is. Hier münnt von links de Río Tatín un von rechts de Río Tamejá un de Río Lámpara. Twüschen dat Dörp Buena Vista op dat Süüdöver un de Stadt Livingston op dat Noordöver münnt de Stroom toletzt in de Bucht von Amatique, wat en Deel von’n Golf von Honduras un de Karibische See is.
De Stroom is op sien kumpletten Loop för lüttjere Scheep schippbor. He is aver ok in sien kumpletten Loop as Natschonaalpark Río Dulce schuult, dat Noordöver liggt deelwies in dat Schuult Biotop Chocón Machacas.
Historie
[ännern | Bornkood ännern]Al in dat 16. Johrhunnert sünd spaansche Kunquistadoren un later engelsche Piraten den Río Dulce hoogseilt bet na’n Lago de Izabal. Dorüm hebbt de Spaniers dat Castillo de San Felipe de Lara boot, üm den Ingang na’n Lago de Izabal to schulen.
Flora un Fauna
[ännern | Bornkood ännern]In’n Stroom leevt ünner annern Seekeih, wat ok de Grund is, dat de Stroom as Natschonaalpark utwiest is.
Weblenken
[ännern | Bornkood ännern]
Río Dulce (Guatemala). Mehr Biller, Videos oder Audiodateien to’t Thema gifft dat bi Wikimedia Commons.
Koordinaten:15° 49′ N, 88° 45′ W