Roh Moo-hyun

Vun Wikipedia
De fröhere Präsident Roh Moo-hyun

Roh Moo-hyun (Hangeul: 노무현; * 6. August 1946 in Gimhae; † 23. Mai 2009 ok dor[1][2]) weer en süüdkoreaanschen Politiker. He weer vun’n 25. Februar 2003 bit to’n 25.Februar 2008 Präsident vun Süüdkorea. In de Tiet, vördem he in de Politik gahn is, weer he en bekannten Afkaat för Minschenrechten. He weer bekannt dorför, dat he sik för de Demokratiseeren, för de Minschenrechten un för de armen Lüüd in’t Land insetten de. He wull sik butendem dorför insetten, dat sik dat Land mit Noordkorea wedder beter verstahn de.

Utbilln un Leven[ännern | Bornkood ännern]

Roh weer 1946 in Gimhae, in’n Süüdoosten vun Süüdkorea, boren. 1960 weer he de Anföhrer vun Protesten an sien School gegen de Plicht Opsätz to schrieven, in de de dormolige Präsident loovt warrn müss.

As he mit Spood de Highschool achter sik laten un sien Wehrdeenst bi de Armee afleist harr hett he in verschedene Jobs arbeit un sik in’t Sülvststudium op de juristischen Staatsexamen vörbereit, de he 1975 afslaten hett. He is 1977 Bezirksrichter in Daejeon worrn un weer af 1978 Afkaat för Stüerrecht. 1981 hett he Studenten verdeffendeert, de vun de Militärregeeren ahn Haftbefehl fastnahmen un foltert worrn sünd, vun wegen dat se verboden Literatur in jemehrn Besitt harrn. Roh schall 2003 doröver seggt hebben: „As ik jemehr verstörten Ogen un de sehn heff, un dat jem de Footnagels fehlen deen, weer mien leeftallig Leven as Afkaat to Enn.“

He hett sik gegen dat dormolige autokratische Regime in Süüdkorea insett. In’n September 1987 weer he as Anföhrer vun de prodremokratischen Organisatschoon Juni-Kamp för dree Weken in’t Gefängnis.

Roh Moo-hyun weer mit Kwon Yang-sook (Hangeul 권양숙) verheiraadt un harr mit ehr twee Kinner: Sien Söhn Geon-ho (건호) weer 1973, sien Dochter Jeong-yeon (Hangeul 정연) is 1975 boren.

Politische Loopbahn[ännern | Bornkood ännern]

Roh mit US-Präsident G.W. Bush, 2003

Roh is 1988 in de Politik gahn un hett swore Anschulligungen gegen de Regeeren vörbröcht, sünners Korrupschoon un dat Gwangju-Massaker in’t Johr 1980. Dat glieke Johr weer he för de Verennigte Demokraatsche Partei (통일민주당) in’t Kukhoe, also dat süüdkoreaansche Parlament, wählt. Söss Johren weer he dor binnen. In’t Johr 2000 harr he as Kandidat för’t Kukhoe keen Spood, weer aver bit 2001 Minister för Fischeree. An’n 19. Dezember 2002 hett he as Kandidat vun de regeeren Milleniumspratei] de Präsidentschopswahl wunnen un is an’n 25. Februar 2003 Nafolger vun sien politischen Tehvadder Kim Dae-jung worrn.

Gegen em is an’n 12. März 2004 en Verfohren inleidt worrn, üm em dat Amt wegtonehmen, vun wegen dat he in sien Amt de Neutralitätsplicht nich acht harr. Dat Verfohren is aver an’n 14. Mai vun süüdkoreaansche Verfatengericht ophoven worrn. In de Grünnen vun’t Oordeel hett dat heten, dat de in’t Parlament vörbröchten Grünnen nich recken deen, üm em ut sien Amt to nehmen. As Övergangspräsident hett de dormolige Premierminister Goh Kun amteert.

Roh weer na Kim Dae-jung de tweete süüdkoreaansche Staatspräsident, de – in’n Oktober 2007 – to en Drapen mit den noordkoreaanschen Staatsbaas Kim Jong-il na Pjöngjang reist is. Dor hebbt de beiden Politiker en „Fredensverkloren“ ünnerschreven.

An’n 23. Mai 2009 hett sik Roh wohrschienlich dör’n Sprung vun en Barg in de Neeg vun sien Huus sülvst dat Leven nahmen. För sien Familie schall he en Breef torüch laten hebben. Gegen Roh lööp en Ermiddeln, vun wegen dat he wiel sien Präsidentschop 6 Millionen US$ Smeergeld annahmen hebben schall[3],[4].

Borns[ännern | Bornkood ännern]

  1. http://english.yonhapnews.co.kr/national/2009/05/23/95/0302000000AEN20090523001500315F.HTML
  2. http://nachrichten.t-online.de/c/18/81/11/62/18811162.html
  3. Ex-Präsident Roh Moo Hyun stürzt sich in den Tod Badische Zeitung vun’n 23. Mai 2009
  4. http://edition.cnn.com/2009/WORLD/asiapcf/05/22/roh.dead/index.html

Weblenken[ännern | Bornkood ännern]

Roh Moo-hyun. Mehr Biller, Videos oder Audiodateien to’t Thema gifft dat bi Wikimedia Commons.