Ringwall von Örsdörp
De Ringwall von Örsdörp is en ole Wallanlaag an’n Rand von en Hoogmoor bi Örsdörp. He liggt dicht bi de Twiest. De Anlaag hett en Dörmeter von üm un bi 185 Meter un is so bi 2,5 Hektar groot.
Dör Pollenanalys hebbt se 2012 rutfunnen, dat de Graven vör allen Pollen von Ellern, Eken un Hasselbusch bargt, wat op de Tied so 7000 bet 4000 v. Chr. düüdt. Dör de C14-Methood hebbt se 2012 ok rutfunnen, dat sik in de vörröömsche Iesentied an’n Grund von’n Graven Törf billt hett.
De Wall weer ut Plaggen boot un mit Steen befastigt. Vör den Wall leeg en Graven. Binnen hett dat noch en tweten Graven geven.
De Anlaag is toeerst as Borg düüdt worrn, aver nadem de Wetenschoppers faststellt hebbt, dat de Wäll an veer Steden ünnerbraken weren, gaht se dor nu von ut, dat dat ok en Kultanlaag ween hebben kunn.
Opdeckhistorie[ännern | Bornkood ännern]
De Inwahners von de Ümgegend hebbt de Anlaag Iesern Hinnerk toschreven, de in dat 14. Johrhunnert leevt hett. De Anlaag is toeerst in de Johren 1920 von’n Schoolmeester un Heimatforscher Willi Wegewitz beschreven worrn. Wegewitz is dor von utgahn, dat de Anlaag in de Tied von de Sassenkrieg gegen Korl den Groten von de Sassen anleggt worrn is. Na’n Tweten Weltkrieg hett de Denkmalpleger Alfred Cassau de Anlaag ünnersöcht. To de Tied weer de Wall noch bi 60 Zentimeter hoog un dree Meter breed.
En Deel von de Anlaag is 1949 von wegen de Bueree kumplett ünnerplöögt worrn un ok de Rest von de Anlaag is mit de Johren mehr un mehr egaal maakt worrn.
2011 hebbt Wetenschoppers von de HavenCity-Universität Hamborg de Anlaag mit en Laserscanner vermeten. Ok en geomagneetsche Prospekschoon hett dat geven. Dorbi is 200 Meter af von de Anlaag ok en Siedlungsplatz ut de Jungsteentied funnen worrn.
In’t Vörjohr 2012 hebbt de Wetenschoppers en 200 Quadratmeter groot Rebeed utgraavt.
Koordinaten:53° 24′ N, 9° 23′ O