Richard Timothy Hunt

Vun Wikipedia
Zur Navigation springen Zur Suche springen
Richard Timothy (Tim) Hunt

Sir Richard Timothy Hunt (* 19. Februar 1943 in Neston) is en britisch Biochemiker. 2001 kreeg he tosommen mit Paul Maxime Nurse un Leland Harrison Hartwell den Nobelpries för Physiologie oder Medizin „för hör Opdecken wat de Kontrolle vun den Zellzyklus bedrapen deiht“. Bit Juni 2015 hett he bi dat London Research Institute vun de Cancer Research UK arbeit.

Leven[ännern | Bornkood ännern]

Hunt wurr as Söhn vun Richard William Hunt, en Lektor för Paläografie, un Kit Hunt an‘ 19. Februar 1943 in Neston bi Liverpool boren. Sien Kindheit weer vun de Beleevnisse vun de Nahkriegstiet präägt. Knapp Nehrensmiddel, groot Köhlenlager as ok Hülpspakete ut Amerika hemm blieven Indrücke un en fröh pro-amerikaansch Instellung bi hüm achterlaaten. Tim Hunt kreeg all fröh Latienschünnericht to Huus, wurr denn up de Oxford High School för Deerns schickt, bevör he mit 8 Johren an de Dragon School wesseln dee. Sien Interesse an Biologie wurr dör den jungen düütschen Lehrer Gerd Sommerhoff waakt. As gooden Schöler hett he sück sülvst ok in Engelsch betekent, dorgegen weern sien Leistungen in Mathematik, Geschichte, Latiensch un Greeksch weniger good.

Mit 14 Johren is he denn up dat Magdalen College in Oxford wesselt, in dat de natuurwetenschaplich Facken düütlich starker in’t Gewicht fullen. Sien Hööftinteresse leeg toeerst in Chemie un later weer bi de Biologie. Wichtig för Tim Hunt weern in disse Johren de Vörlesungen an de Universität Oxford as ok de Wiehnachtsvördrääg in dat Museum vun Oxford. Völ Exkursionen un Versöök hemm hüm de praktisch Siet vun de Natuurwetenschap nahder brocht. In‘ Harvst 1961 is Hunt an dat Clare College vun Cambridge wesselt, um Natuurwetenschapen to studeeren, mit dat Teel Biochemiker to wurrn.

De wetenschaplich Loopbahn fung 1964 an dat Institut för Biochemie in Cambridge an. In dat Labor vun Asher Korner kunn Hunt sück mit Arbeiten in Berieken DNA, RNA un Proteinsynthese befaaten. Mit de Tiet interesseer he sück immer mehr för de Translatschoon vun mRNA un later forsch he gemeensam mit sien fröheren Studienkollegen Tony Hunter an den Inbau vun Häm in dat Globin to dat Hämoglobinmolekül. De Maanden Juli bit Oktober 1966 hett he up Inlaaden vun Irving M. London in New York verbrocht. 1968 hett he sien Doktertitel (Ph.D.) in Cambridge maakt un gung an dat Albert Einstein College of Medicine in New York. Mit Ünnerstütten dör de de Mitarbeiter dor hemm de Forschungen an de Hämbiosynthese düütlich Fortschritte maakt. Nah sien Rückkehr nah Cambridge hett he wieder mit sien fröhere Kollegen Richard Jackson un Tony Hunter an Themen in den Beriek tRNA un hör Reguleeren arbeit.

Doröver herut is he Liddmaat vun den Wetenschaplichen Biraat vun den böveröösterrieksch Think Tanks Academia Superior.[1]

He kunn rutfinnen, dat sück de Cycline in de Wasdomsphase mit de cyclinafhängigen Kinasen verbinnen. Dör dissen Vörgang aktiveert, fangen de Enzyme an, bestimmte Eiwitten mit Phosphorsüermolekülen to verbinnen. Disse Vörgang führt sluutend to de Synthesephase, dat heet, dat sett en Verdüppeln vun dat Arvmaterial in.

De Opdecken vun Paul Maxime Nurse un Hunt hemm fundamentale Bedüüden för dat Verständnis, welker Rull de Cyclinen in‘ Zellzyklus tokummt. De Forschungsergevnisse hemm aber ok to nee Perspektiven för künftige Behannelnsmethoden vun Krebserkrankungen führt.

Utteknungen[ännern | Bornkood ännern]

Neben den Nobelpries 2001 kreeg Tim Hunt ok wiedere bedüüdende Utteknungen:

Kontroversen[ännern | Bornkood ännern]

An‘ 9. Juni 2015 hull Hunt en Vördrag up de World Conference of Science Journalists in Seoul, in de he en Bemarken to de gemeensam Arbeit vun Mannlüüd un Fruen in Laboren maakt hett, de he, as he later seggt hett, ut Jux seggt hett. En anwesen britisch Universitätslehrerin, Connie St Louis,[2] hett dissen Kommentar aber as fruenfeindlich ansehn un hett de entsprekend kommenteert över Twitter verbreedt. Dornah hett sück ok de Apenlichkeit doröver upregt. As Folg dorvan is Hunt an‘ 10. Juni vun sien Honorarprofessur an de Fakultät för Biowetenschapen an dat University College London (UCL) torüchtreeden.[3][4][5] He verlor ok sien Positschonen bi den Europääschen Forschungsraat un de Royal Society.[6] Hunt hett dorto later seggt, dat dat UCL hüm dorto upfordert harr, sien Stäe uptogeven, annernfalls man androht harr, hüm to künnigen. He hett sück doröver beklaagt, dat man hüm kien Gelegenheit to en Erklärung vun sien Bemarken geeven wurrn weer, un dat he sück för de Bemarken uprichtig entschuldigen würr.

Hunt wurr vun sien Fru, en Perfessersche an dat UCL as ok vun de Wetenschaplerinnen Athene Donald, Ottoline Leyser, Nancy Rothwell verteidigt. Se hemm woll sien umstreeden Bemarken aflehnt, aber ok betoont, dat he sück immer för jung Wetenschapler ahn Ünnerscheed vun dat Geslecht insett harr.[6] De Journalist Jonathan Dimbleby is vun sien Ehrenliddmaatschap an dat UCL torüchtreeden, wiel he de Reaktschoon vun de Universität för övertrucken hull.[7][8] Vun de Daagblööt The Times un Daily Mail wurrn Twiefel an de Gloovwürdigkeit vun den utlösen Tweet un sien Verfater vördragen.[9] Acht Nobelpriesdräger as ok Richard Dawkins hemm sück vör hör Kollegen stellt un den „Lynchmob“ angreepen, de Hunt ut de Universität dwungen harr.[10] Dat Protokoll vun de Konferenz sull todem nahwiesen, dat all Deelnehmers klor ween weer, dat Hunt scherzen dee.[11]

Perfesser Michael Arthur, de Präsident vun dat UCL hett seggt, dat mit de Bemarken vun Hunt, ok wenn se humorvull docht weern, en Lien överschreeden weer, de en Besehren vun de Prinzipien vun dat UCL dorstellen dee un he den Rückträe vun Hunt nich torüchdreihn kunn.[12][13]

In en Interview[14] vun de Wetenschapstietschrift "Lab Times" ut dat Johr 2014 hett Hunt up de Fraag, worum Fruen in wetenschaplich Führungspositschonen nah sien Meenen immer noch ünnerrepräsenteert sünd, seggt, dat man ehrder de Fraag stellen sull, worum de minn Andeel vun Fruen in Positschonen as Problem wohrnommen würr. Dat weer för hüm nich direkt inlüchtend, worum dit Missverhältnis slecht för de Fruen, de Wetenschap oder de Sellschopp as Ganzes weer.

Weblenken[ännern | Bornkood ännern]

Commons-logo.svg Richard Timothy Hunt. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. Academia Superior - Wissenschaftlicher Beirat. Afropen an‘ 1. September 2017.
  2. Connie St Louis, the woman who brought down Sir Tim Hunt, faces questions over her CV. Where’s the media coverage? in: The Spectator, 28. Juni 2015, afropen an‘ 4. Juli 2015
  3. Sir Tim Hunt FRS and UCL Websteed vun dat University College London, 10. Juni 2015, afropen an’ 11. Juni 2015
  4. Nobel laureate Tim Hunt resigns after 'trouble with girls' comments in: The Guardian, 11. Juni 2015, afropen an‘ 11. Juni 2015
  5. Forscherinnen protestieren mit Foto-Tweets up Spiegel online, 12. Juni 2015, afropen an‘ 13. Juni 2015
  6. a b Shamed Nobel laureate Tim Hunt ‘ruined by rush to judgment after stupid remarks’ in: The Guardian, 13. Juni 2015, afropen an‘ 14. Juni 2015
  7. Dimbleby resigns from UCL in protest at 'disgraceful' treatment of Sir Tim Hunt in: The Guardian, 30. Juni 2015, afropen an’ 1. Juli 2015
  8. Dimbleby resigns from UCL fellowship over Hunt row up: BBC News, 30. Juni 2015, afropen an’ 1. Juli 2015
  9. Guy Adams, A very flawed accuser: Investigation into the academic who hounded a Nobel Prize winning scientist out of his job reveals troubling questions about her testimony in: Daily Mail, 26. Juni 2015, afropen an’ 29. Juni 2015
  10. Eight Nobel prize winners attack 'lynch mob' who forced sexism row professor Sir Tim Hunt out of his job in: Daily Mail 20. Juni 2015, afropen an‘ 4. Juli 2015
  11. Sexismusvorwürfe: Protokoll soll Nobelpreisträger Hunt entlasten in: Der Spiegel, 25. Juni 2015, afropen an‘ 4. Juli 2015
  12. Michael Arthur Provost’s View: Women in Science up UCL News, 26. Juni 2015, afropen an’ 1. Juli 2015
  13. UCL says Tim Hunt will not be back after 'sexist' comments up: BBC News 26. Juni 2015, afropen an‘ 1. Juli 2015
  14. Interview: Isabel Torres: [1] Nobel Prize winner Tim Hunt about the future of research and public perception of science, LJ-Verlag Herfort un Sailer; Kai Herfort, Ralf Neumann; Lab Times 04 – 2014, Sieden 6-8 van‘ 4. Juli 2014, afropen an‘ 19. Juni 2017 (engelsch)