Reinbekium

Dat Reinbekium is en Tiedafsnidd in de Geologie, de von üm un bi 15,5 bet 12,25 Millionen Johr vör uns Tied reckt. Dat is Deel von dat Miozän un binnen dat Miozän von dat Langhium (vör 15,97-13,65 Ma) un dat Serravallium (13,82–11,608 Ma). De Utdruck Reinbekium warrt blots för de Sedimenten in Noorddüütschland un ümto bruukt (Noorddüütsch Tertiärbecken). De Naam kummt af von’n Oort Reinbek. In Reinbek sünd ünner annern 1846 bi’n Bo von de Bahnlien Hamborg-Berlin Fossilfunnen maakt worrn. De Hambörger Dokter Karl Gottfried Zimmermann hett de Funnen dörkeken un dor denn en Bericht över schreven.

Vör dat Reinbekium keem dat Hemmoorium (19,25-15,5 Ma) un achterna dat Langenfeldium (12,25-9,75 Ma).

Desülve Tied in Süüddüütschland un Middeleuropa (zentrale Paratethys) warrt in de Tiedafsneed Badenium (16-13,3 Ma) un Sarmatium (12,8-11,2 Ma) indeelt.

De Sedimenten von dat Reinbekium sünd vör allen Kalksandsteen, in de ok veel Schalen von Mollusken to finnen sünd. Noorddüütschland leeg to de Tied op’n Grund von en siede See. As Leidfossil warrt ünner annern de Snigg Aquilofusus festivus ansehn.