Provinz Hannover

Hannover weer en Provinz von Prüßen, de von 1866 bet 1946 bestahn hett. De Provinz harr 3.537.390 Inwahners op en Rebeed von 38.705 km² (Stand 1939). De Höövdstadt weer Hannover.

Vondaag höört dat Rebeed von de Provinz Hannover to dat Bundsland Neddersassen. Lüttjere Delen höört ok to Bremen, Hamborg un Döringen.

Geografie

De Provinz hett in’n Noordosten an de Provinz Sleswig-Holsteen, an Hamborg un an Mekelborg-Swerin grenzt, in’n Oosten op en Enn an de Provinz Brannenborg, in’n Süüdoosten an de Provinz Sassen, Hertogdom/Freestaat Bruunswiek un Hertogdom/Freestaat Anhalt, in’n Süden an de Provinz Hessen-Nassau, in’n Süüdwesten an de Provinz Westfalen, Fürstendom/Freestaat Waldegge, Fürstendom/Freestaat Schaumborg-Lippe un Fürstendom/Freestaat Lippe un in’n Westen an dat Königriek von de Nedderlannen. In’n Noorden leeg as Exklaav von Hamborg dat Amt Ritzbüttel un ans de Noordsee. Dat Groothertogdom/Freestaat Ollnborg leeg heel von de Provinz ümgeven un Bremen jüstso.

Historie

De Provinz is 1866 billt worrn. Dat Königriek Hannover harr an de Sied von Öösterriek in’n Düütschen Krieg gegen Prüßen kämpt un verloren. Na’n Krieg hett Prüßen dat Königriek annekteert.

An’n 18. Mai 1924 hett dat en Volksafstimmen geven, in de de Lüüd afstimmen kunnen, dat de Provinz Hannover (ahn den Regerungsbezirk Auerk) von Prüßen aftrennt un wedder egenstännig warrt. De Afstimmen is aver fehlgahn, dor hebbt nich noog Lüüd bi mitmaakt. Een Drüddel harr dat ween müsst.

Na’n Tweten Weltkrieg is 1946 ut de Provniz Hannover dat Land Hannover worrn, dat sik aver al na dree Maand mit annere Länner to Neddersassen tohoopdaan hett.

Oberpräsidenten von de Provinz Hannover

Nadem Prüßen Hannover innahmen harr, hett dat Rebeed eerst ünner Militärverwalten dör Konstantin Bernhard von Voigts-Rhetz stahn. De hett 13 Maand wohrt. An’n 14. September 1867 hett Willem I. Order geven, dat nu en zivile Verwalten ünner Otto zu Stolberg-Wernigerode dat Leid över de Provinz övernehmen schull. An’n 17. September 1867 is dat denn ok so schehn.

17. September 1867–1873: Otto zu Stolberg-Wernigerode
1873–1873: Karl Heinrich von Boetticher
1873–1878: Botho Wendt August Graf von Eulenburg
1878–1888: Adolf Hilmar von Leipziger
1888–1897: Rudolf von Bennigsen, NLP
1898–1902: Constantin zu Stolberg-Wernigerode
1902–1914: Richard von Wentzel
1914–1917: Ludwig von Windheim
1917–1920: Dr. Ernst von Richter, NLP/DVP
1920–1933: Gustav Noske, SPD
1933–1933: Friedrich von Velsen
1933–1941: Viktor Lutze, NSDAP
1941–1945: Hartmann Lauterbacher, NSDAP
11. Mai 1945-16. September 1945: Eberhard Hagemann
1945–1946: Hinnerk Willem Kopp, SPD

Ünnerafdelen

Dat Königriek Hannover weer in Landdrostien indeelt un de füdder in Ämter un Städer. Bavento geev dat de Barghauptmannschop Clausthal. Dat is ok in de Provinz Hannover toeerst so bleven. De Amtshauptlüüd harrn de sülve Stellung as en Landraad annerwegens in Prüßen.

Blots de Barghauptmannschop Clausthal is al 1868 oplööst un Deel von de Landdrostie Hilmssen worrn.

Bito to de Ämter sünd dör en prüüßsche Verordnen von’n 12. September 1867 för de Militär- un Finanzverwalten bito 37 Stüürkreise inricht worrn. De gröttste Deel von de Verwalten is aver bi de Ämter bleven un de Stüürkreise harrn dorüm blots en begrenzt Bedüden.

An’n 1. April 1885 is de Provinz nee indeelt worrn. Ut de Landdrostien sünd Regerungsbezirke worrn. Ok de Ämter sünd nee to Kreise tohoopfaat worrn. De Stüürkreise sünd wegfullen.

Literatur

Ernst Gottfried Mahrenholz: Ein Königreich wird Provinz - Über Hannovers Schicksalsjahr 1866. MatrtixMedia Verlag, Göttingen 2011, ISBN 978-3-932313-46-2

Weblenken

Provinz Hannover. Mehr Biller, Videos oder Audiodateien to’t Thema gifft dat bi Wikimedia Commons.