Prellball

Vun Wikipedia
Zur Navigation springen Zur Suche springen

Prellball is en Mannschapssport, de to de so nöömten Torüchslagspelen tellt warrt. Prellball höört to de Turnspelen.

Historie[ännern | Bornkood ännern]

Prellball höört to de Turnspelen, wat dorop henwiest, dat Prellball ut dat Turnen rut tostannen kamen is. De Turner hebbt den Ball toeerst woll to’n Oplockern nahmen, bevör dat mit de Övensstünnen losgüng. Wanneer dat Speel utklamüstert woorn is, is nich schriftlich fasthollen.Tiettügen schüllt dorvun snackt hebben, dat Prellball sogor al vör den Eersten Weltkrieg in de kaiserlich Marine op Deck vun de groten Kriegsscheep speelt worrn wesen schall. Dat künn ok verkloren, worüm dat Speel in ganz Düütschland un Öösterriek verbreedt is.

Eerste sekere Henwiesen to en Ballspeel över en ümdreihte Turnbank gaht op dat Johr 1925/26 torüch. Af 1936 is in Turnstünnen na sülvst utklamüsterte Regeln speelt worrn, de 1945 dör en amtlich Regelwark uttuuscht worrn sünd. Siet de Tiet warrt Prellball as Wettkampsport bedreven. In Düütschland warrt Prellball an’n wietsten verbreedt. Hier warrt Prellball in jedet Bundsland speelt un is vör allen in veele lütte Verenen antodrapen. Aver ok in Öösterriek finnt en regelmatig Wettkampbedriev statt. Enkelte Verenen mit en Prellballafdeel sünd ok in Sweden un Argentinien bekannt.

Speelregeln[ännern | Bornkood ännern]

En Prellball ut Ledder as he vun de DTB vörschreven is.

In Düütschland warrt in’n Ligabedriefv na de offiziellen Speelregeln vun’n Düütschen Turnerbund (DTB) un na de Ornen vun’t Fachrebeet Spelen (OFS) vun’n DTB speelt.

Dat Speelfeld is 9 mol 16 Meter groot un warrt in de Mitt dör en Lien vun 40 cm Hööch in twee Mannschapshälften ünnerdeelt. Twee Mannschoppen speelt gegenenanner, wobi jede Mannschap ut tomindst dree, nomalerwies aver ut veer Spelers besteiht. Bito kann en Mannschap bit to twee Utwesselspelers hebben. Utwesselt warrn kann so faken as man müch. De Speeltiet duert 2 mol 10 Minuuten, wobi in de Halftiet dat Mannschapshälften tuuscht warrt. Wunnen hett de Mannschap, de an End de meisten Punkten tohopenspeelt hett.

En Prellball (kiek op dat Bild) hett en Ümfang vun 62 bit 68 cm un en Gewicht vun 320 bit 380 g. In de Jöögdklassen 11 bit 14 Johren dröff ok en lichteren Ball mit en Gewicht vun 260 bit 300 g bruukt warrn.

As Prellen warrt dat Rünnerslahn vun den Ball mit de slaten Fuust oder den Ünnerarm betekent. En Slag, de mit den Ünnerarm maakt warrt, warrt in’n Prellball ok Smetterslag nöömt. Dorbi mutt de Ball jümmer en düütliche Bewegen na ünnen wiesen.

Jede Mannschap hett de Opgaav, den Ball so op den Bodden vun dat egen Feld to prellen, dat he över de Lien wedder na’n Gegner kummt. De Spelers versöökt, den Ball so na den Gegner to spelen, dat de sien Lasten dormit hett, den Ball ordig antonehmen un en Fehler maakt. Jeedeen Fehler gifft en Punkt vör de annere Mannschap. De Speeltog warrt denn ünnerbroken un de Mannschap, de den Fehler maakt hett, bringt den Ball dör en Angaav vun de Grundlien wedder torüch in’t Speel. Bi de Jöögd kann de Angaav ok vun wieter vör in’t Feld maakt warrn.

In en Speeltog dröff de Ball, aver ok keen Speler, de Lien beröhren, anners is dat en Fehler. De Ball dröff, wenn de in dat egen Feld kummt, blots eenmol op den Bodden opkamen, bevör he vun en Speler annahmen warrt. Na jeden Spelerkontakt dröff de Ball ok jümmer blots eenmol op den Bodden opprellen. Jeder Speler dröff den Ball blots eenmol prellen, un an’n laatsten na den drüdden Spelerkontakt mutt de Ball wedder na den Gegner prellt warrn. Wenn dorbi wat scheef geiht, is dat en Fehler un de Gegner kriggt den Punkt. Fehlers sünd ok, wenn nich oordig prellt warrt, also de Ball sik nich na ünnen bewegt, oder wenn de Ball buten vun dat Speelfeld op den Bodden opkummt.

Twe’er-Prellball[ännern | Bornkood ännern]

Twe’er-Prellball is en verwandte Oort vun dat Prellballspeel. An Steed vun veer Spelers warrt hier blots mit twee Lüüd in de Mannschap speelt.

Historie[ännern | Bornkood ännern]

Disse Variant is 1925 in Hessen opkamen un hett sik toeerst in Frankfort an’n Main un in Hanau, man ok in Mannheim un Stuttgart entwickelt. Utfinner weer Horst Hegemann. Wiel in den Rest vun Düütschland dat normale Prellball mehr verbreedt is, hett sik vör allen in Hessen dat Twe’er-Prellball wieter entwickelt. Siet dat Düütsche Turnfest 1983 in Frankfort is Twe’er-Prellball fast in dat Programm vun de Veranstalten vun den DTB un vun den Hess’schen Turnverband (HTV). Siet 1993 sünd ok de Regeln offiziell Bestanddeel bi’n DTB.

Opstunns gifft dat in’n Verbund vun’n DTB blots in’n HTV en organiseerte Wettkamprunnen, de ut twintig Speelklassen för Manns- un Fronslüüd besteiht. Dat gifft hierbi rund 500 Aktive Spelers, de an de Wettkämpen deeltnehmt. Buten vun Hessen gifft dat noch en Twe’er-Prellball-Liga in Wien un en johrlich Turnier in Duisborg.

Ünnerscheden bi de Regeln[ännern | Bornkood ännern]

Bi dat Twe’er-Prellball spellt twee Lüüd in en Mannschap. De Angaav warrt hierbi binnen dat Speelfeld maakt und nich vun de Grundlien. De Ball kann mit de Fuust aver ok mit de apenen Hand vun den een Speler annahmen warrn un warrt denn vun den annern Speler mit de Fuust oder den Ünnerarm in de gegnerische Hälft torüchspeelt.

De Speeltiet is mit 2 mol 5 Minuuten blots half so lang un dat Speelfeld mit 6 mol 14 m ok en beten wat lütter as bi dat normale Prellball. De Lien in de Mitt hangt ok 5 cm deeper. Dör de lüttere Spelertall un de Mööglichkeit, den Ball antosnieden – wat bi dat Veerer-Prellball keen oordig Perllen is – is dat Twe’er-Prellball faken en beten fletiger, sneller un dynamischer.

Websteden[ännern | Bornkood ännern]