Düütsch Turnerbund

Vun Wikipedia
Zur Navigation springen Zur Suche springen

De Düütsche Turnerbund (DTB) is de Dackverband vun de Turnverbännen un -verenen. In den DTB sünd mit Stand vun 2009 ruchweg 20.443 Verenen organiseert. De Präsident is Rainer Brechtken.

Historie[ännern | Bornkood ännern]

De Düütsche Turnerbund is 1848 op’n 1. Düütschen Turnerdag in Hanau grünnt worrn. [1] En eerst Düütsch Turnfest is 1860 in Coburg utdragen worrn. 1868 is de Düütsche Turnerbund in de Düütschen Turnerschop (DT) opgahn. Parallel dorto weer 1893 de sozialdemokraatsch utrichte Arbeiterturnerbund (ATB) grünnt, de sik vun 1919 an Arbeiter- Turn- un Sportbund (ATSB) nömen de un 1933 dör de Natschonalsozialisten verboden worrn is. 1935 hett sik de DT in’n Rahmen vun de Gliekschalten in de Tiet vun'n Natschonalsozialismus sülvst oplöst. Na den Tweten Weltkrieg is de DTB 1950 in Tübingen nee grünnt worrn. 1952 harr he al 900.000 Liddmaten in mehr as 6.100 Verenen. Dat eerste Düütsche Turnfest vun de Bundsrepubliek Düütschland fünn 1953 in Hamborg statt. 2005 geev dat dat eerste Internatschonale Düütsche Turnfest (IDTF), dat in Berlin utdragen worrn is.

Organisatschoon[ännern | Bornkood ännern]

Organiseert is de DTB as Indragen Vereen (e.V.) mit en mehrere Lüüd umfaten Präsidium as Vörstand. Präsident dorvun is siet 2001 Rainer Brechtken as Nafolger vun Jürgen Dieckert. De Gewarfssteed vun’n Düütschen Turnerbund liggt in Frankfort an’n Main.

De DTB is regional in eenuntwintig Landsturnverbännen indeelt, wobi dat in de Bundslänner Nordrhien-Westfalen, Rhienland-Palz, Baden-Württemberg un Bayern mehr as een Verband gifft. In’n Enkelten sünd dat de Verbännen:

  • Badisch Turnerbund
  • Bayerisch Turnspeelverband
  • Bayerisch Turnverband
  • Berliner Turnerbund
  • Bremer Turnverband
  • Hessisch Turnverband
  • Landsturnverband Sassen-Anholt
  • Märkisch TurnerBund Brannenborg
  • Neddersass’sch Turnerbund
  • Pälzer Turnerbund
  • Rhienhess’sch Turnerbund
  • Rhiensch Turnerbund
  • Saarlännsch Turnerbund
  • Sass’sch Turnverband
  • Sleswig-Holsteensch Turnverband
  • Schwäbsch Turnerbund
  • Thüringer Turnverband
  • Turnverband Mekelnborg-Vörpommern
  • Turnverband Middelrhien
  • Verband för Turnen un Freetiet – Landsorganisatschoon Hamborg
  • Westfaalsch Turnerbund

As egen Verband is butendem de Akadeemsch Turnerbund (ATB) organiseert.

Leitbild[ännern | Bornkood ännern]

De Düütsche Turnerdag hett 2004 in Berlin en Leitbild beslaten, dat de Karnopgaven vun den Verband ümrieten deit. Dat ümfaat vör allen dat Ünnerstütten un Vöranbringen vun de Grundsportorden Reedschopturnen un Gymnastik, de Positschoneren vun Kinnerturnen as Marke vun de Turnbewegung, dat Sekerstellen vun Anbotten för de Jöögd op Rebeden in’n Sport un buten den Sport as ok vun de Marktföhrerschop in’n Fitness- un Gesundheitssport dör anmeten Anboten för junge, utwassen Lüüd un dat middlere Öller, sünners för Deerns un Fronslüüd. Bito schall de olympische Spitzensport föddert warrn mit dat Teel, internatschonal Spood to hebben un de Entwickeln vun de Anbotten in de Sportorden un Fackrebeden an den Tietgeist anpasst warrn.

Dör disse Leitgedanken warrt versöcht, de ümfangrieke Arbeit in’n Verband to verbetern un en starkere Kunzentratschoon op de Karnopgaven henktokriegen. En Resultat dorvun sünd de Marken Kinnerturnen, Gymwelt un Turnen!, de dorbi tostannen kamen sünd.

GYMCARD[ännern | Bornkood ännern]

De GYMCARD is en Liddmaten-Koort, de vun’n Düütschen Turnerbund rutgeven warrt. Mit Stand vun’n April 2008 sünd ruchweg 240.000 GYMCARD-Besitters registreert. Vörgänger vun disse bundswieten Koort weern de Vördeelskorten för Liddmaten ünner den glieken Naam GYMCARD vun den Neddersass’schen Turnerbund (NTB) un vun’n Schwäbschen Turnerbund, de al siet 2000 rutgeven worrn sünd. Siet 2006 warrt se vun’n DTB tohopen mit de Landsturnverbännen rutgeven.

Kriegen künnt de Koort al ehrenamtlichen Mitarbeiters un Übungsleiders för jemehr Engagement in de Verenen vun’n DTB. In de enkelten Landsverbännen warrt de Koort butendem as Instrument to’n Binnen vun de Liddmaten an de Verenen anboden.

Vördelen hett de Koort för de Besitters bi meist all Anbotten vun de Sportverbännen, as to’n Bispeel Ut- un Wieterbillen oder Sportveranstalten. Tosätzlichen Weert hett de Koort dör Partners („Födderers vun’t Ehrenamt“) mit Anbotten in’t persönliche Ümfeld, sünners in’t Rebbet Freetiet.

DTB-Shop[ännern | Bornkood ännern]

De DTB Is bito regelmatig Rutgever vun Fackliteratur, vun Verbandsmaterial fö de Trainer-Wieterbillen oder ok as Produzent vun Video- oder CD-Material. För’t Verdrieven vun de Produkten is 1998 de DTB-Shop grünnt worrn.

Borns[ännern | Bornkood ännern]

  1. Harald Braun: Die Gründung des Deutschen Turnerbundes in Hanau. In: Stadtzeit (1998). Histoorsch Magazin to’n Jubiläum 150 Johr Revolutschoon un Turnerbewegung Hanau 1848 – 1998, S. 113-116.

Weblenken[ännern | Bornkood ännern]

Commons-logo.svg Category:Deutscher Turner-Bund. Mehr Biller, Videos oder Audiodateien to’t Thema gifft dat bi Wikimedia Commons.