Portal:Wikinews/Soltwedel dröff wedder Hansestadt heten

Vun Wikipedia
Zur Navigation springen Zur Suche springen

21. März 2008: De Stadt Soltwedel dröff vun’n 1. April af an wedder Hansestadt heten. De Stadt harr en Andrag bi’n Landkreis stellt, dat se dissen Titel wedder dregen dröff. Soltwedel weer vun 1263 bet 1518 in de ole Hanse wesen (de Kurförst vun Brannenborg harr de Stadt denn dwungen, uttotreden) un will nu wedder ehr ole, stolte Hansetradition vörwiesen. Dormit is Soltwedel nu de eerste Stadt in de Ooltmark de offiziell Hansestadt is. Aver ok Stendal, Tangermünn, Gardelegen, Osterburg, Seehusen, Havelberg un Werben hebbt nu Andrääg stellt oder överleggt dat to doon. In Neddersassen harr toletzt de Stadt Stood versöcht, den Titel antonehmen. In Sassen-Anhalt reckt dat, wenn de Stadt nawiesen kann, dat se in de ole Hanse wesen is, doch in Neddersassen harr dat Land den Andrag afwiest, vun wegen, dat Stood nich bet toletzt Deel vun de Hanse wesen is.

Soltwedel is vun’n 5. bet 8. Juni denn ok glieks Gastgever vun’n 28. Internatschonalen Hansedag vun de Ne’e Hanse. Över 100 Städer ut 15 Länner hebbt toseggt, dat se kamen wüllt.