Portal:Wikinews/Plattdüütsche Oortsschiller op’n Vörmarsch, nu ok in Oilstörp

11. September 2007: De Saak mit de plattdüütschen Oortsschiller geiht vöran. Nu hebbt se ok in Oilstörp in’n Landkreis Horborg ne’e Schiller anbröcht. Blangen hoochdüütsch Oelstorf kriegt de Lüüd, de na’t Dörp rinkaamt, nu ok den plattdüütschen Naam vun den Oort in de Gemeend Solzhusen to lesen. De Beopdragte för Plattdüütsch in’n Landkreis Horborg, Herbert Timm, harr dat anreegt un junge Lüüd ut Oilstörp hebbt sik dor denn för insett un Geld sammelt för ne’e Schiller. De Börgermeester vun de Samtgemeend Solzhusen, Hans-Hermann Putensen, hett de Schiller nu inwieht un he seed, dat he sik good vörstellen kunn, dat ok annere Öörd in siene Samtgemeend nu Schiller mit beide Naams kriegen schullen.