Portal:Wikinews/Plattdüütsche Daag för Stormarn

6. Oktober 2007: Dat sövente Maal schall dat tokamen Week nu wedder de Plattdüütschen Daag för Stormarn geven. Dorto inladen deit de Kreisverband Stormarn vun’n Sleswig-Holsteenschen Heimatbund. Vun Maandag, den 8., bet Dunnersdag, den 18. Oktober, gifft dat allerhand op Platt to beleven in’n Kreis Stormarn. Maandag halvig 8 avends warrt Christa Heise-Batt in dat lüttje Theater Bargteheid wat ut ehr Böker vörlesen. Dingsdag gifft dat vun Klock twee bet Klock söss en Plattdüütschdag för Schoolmeesters. Ok Kinner snackt Platt weer för Middweken plaant, man dat schall utfallen. Dunnersdag höllt Hans Thomas Carstensen in dat Stadthuus Bargteheid en Diavördrag op Platt to Emil Nolde. Freedag vun halvig acht af an gifft dat Platt för Plietsche mit Hermann Bärthel in’n Ahrensborger Marstall. Sünnavend doot Dieter Hopfe un Leonhard Hundsdoerfer halvig veer in dat Börgerhuus Timmerhorn to’n Kaffee un plattdüütsch Klönen inladen. Sünndag Klock teihn gifft dat denn en Goodsdeenst mit Pastoor Cord Denker in Zarpen. Mit de Plattdüütsch Runn Grothansdörp un den Stormarner Schrieverkrink gifft dat Dingsdag, den 16. Oktober, vun halvig acht af an in Groothansdörp en literarischen Avend in dat Studio 203. Middweken veerdel na acht wiest denn dat Cinema Paradiso in Bargteheid den Film Hahnebeer un Dunnersdag deit to’n Afsluss Wolfgang Sieg halvig acht in de Watermöhl Trittau wat vörlesen.