Portal:Wikinews/Plattdüütsch ok in’t Schooltüügnis

Vun Wikipedia
Zur Navigation springen Zur Suche springen

10. Juli 2008: Dat plattdüütsche Nettwark NettPlatt Neddersassen (Deel vun’n Neddersassischen Heimatbund) hett nu fordert, dat dat Land Neddersassen dat Plattdüütsche beter in’n Schoolünnerricht inbinnen schall. An vele Scholen warrt jümmer minner wat för Plattdüütsch daan un veel Angebaden warrt instellt. Dat allens steiht in de Stellungnahm to Plattdüütsch in’t Bildungswesen, de NettPlatt Neddersassen vundaag in Hannover vörstellt hett.

Dorüm fordert dat Nettwark dree Saken:

  • Dat mutt sekerstellt warrn, dat an de Universität Ollnborg Schoolmeesters för Plattdüütsch utbillt warrt.
  • Dat Plattdüütsche schall in alle Schoolformen un -stufen ok för dat Tüügnis relevant warrn.
  • Un de Ünnerricht schall offiziell as tweesprakig-bilingual utwiest un goodkennt warrn.

Dat Land Neddersassen mutt endlich dat doon, wat se in de Europääsche Charta vun de Regional- oder Minnerheitenspraken al lang toseggt harrn, seggt dat Nettwark.