Portal:Wikinews/Grönet Licht för nee gäälsch Feernsehn in Schottland

30. Januar 2008: De BBC Trust, de de Arbeit vun de BBC överwaken deit, hett nu grönet Licht geven, dat dat en ne’en Feernsehsenner för de Gäälsch-Snackers in Schottland geven dröff. Dat schall en digitalen Kanal wesen, de dat gäälsche Programm, dat nu blot denn un wenn op annere Senners kummt, afrunnen schall. Gäälsche Spraakaktivisten freit sik, dat so en kumplett gäälschen Senner helpen schall, de Spraak to wohren un vörantobringen. De BBC Trust harr in’n November noch Bedenken, dat sik de Senner lohnt.

De Senner schall toeerst jeden Dag annerthalf Stünnen nee Programm bringen. Dor kummt denn noch Programm, dat en tweet Maal wedder wiest warrt, un Archivmaterial to. To dat ne’e Programm schall ok en gäälsch Narichten-Sendung höörn.

Besünnere Sorgen maakt de Gälen, dat de Senner digital is un blot över Satellit, Kavel un Breedband löppt. Per Antenn is he nich to kriegen, dat warrt to düür, meen de Trust. Veel Gäälsch-Snackers warrt so utslaten, seggt Spraakaktivisten. In de Hoochlannen un op de Eilannen hebbt veel Lüüd sounso al Satellitenschötteln, aver in de Städer un in’n groten Deel vun’n Rest vun dat Land bruukt se vör allen de Antenn, denn de köst weniger un is lichter antobringen. De Trust will eerst 2010 wedder nadenken, wat de Senner ok över Antenn lopen schall, wenn dat analoge Feernsehn över Antenn in Schottland utlöppt.