Portal:Wikinews/Drepen vun’n Bundsraat för Plattdüütsch: wat rutkamen is

4. Oktober 2007: Güstern hett de Bundsraat för Plattdüütsch in Swerin en Drepen hatt. Se hebbt över Plattdüütsch in’e School snackt. Hüüt hett de Raat bekannt geven, wat bi jemehr Drepen rutkamen is: Plattdüütsch schall en egen Fack in’e School warrn. Wenn dat würklich dorüm geiht, dat de Spraak bestahn blifft, denn reckt dat Vermiddeln vun Weten över Plattdüütsch in’n Rahmen vun’n normalen Düütschünnerricht nix, seggt de Staatsrechtler Stefan Oeter. Ok an de Universitäten mutt mehr för Plattdüütsch daan warrn, dat dat ok Lüüd gifft, de wat vun de Spraak afweten doot, de dat de Kinners un jungen Lüüd bibringen köönt.

In’e Kinnergoorns gifft dat al welk Lüüd, de bereit sünd, Plattdüütsch to vermiddeln. Ok an de Scholen gifft dat Ansätz, man de Bundslänner doot sik meist gornich afsnacken un dat gifft keen kloren Plaan, wat vermiddelt warrn schall.

Ok mit Lüüd ut’n Landdag vun Mekelborg-Vörpommern hett sik de Raat bi de Gelegenheit drapen un mit jem snackt wat in Mekelborg-Vörpommern noch to doon is un wat dor daan warrn schall.