Peter Higgs

Vun Wikipedia
Peter Higgs, 2009

Peter Ware Higgs, CH, FRS, FRSE, FKC (* 29. Mai 1929 in Elswick, Newcastle upon Tyne)[1] is en britischer Physiker. An' 8. Oktober 2013 wurr hüm tosommen mit François Englert de Nobelpries för Physik för de Entwickeln vun den Higgs-Mechanismus tospraken.[2]

Leven[ännern | Bornkood ännern]

Higgs is de Söhn vun en Tooningenieur vun de BBC un gung in Bristol un London to de School.[3][4] He hett studeert, kreeg 1950 den Bachelor in Physik mit Utteken (First Class Honours) un hett 1951 den Master-Afsluss. 1954 hett he denn sien Doktertitel mit de Arbeit Some Problems in the Theory of Molecular Vibrations an dat King’s College London bi Christopher Longuet-Higgins maakt. 1954/55 weer he an de Universität Edinburgh tätig, 1956 an dat University College London un af 1957 an dat Imperial College London, jeweils mit Forschungsstipendien.

Higgs weer för en körten Tiet Lecturer (etwa vergliekbor mit en Lehrbeupdragten) för Mathematik an dat Imperial College un kehrte 1960 as Lecturer för Mathematische Physik nah Edinburgh torüch. Dor schreev he ok 1964 de 1964 de Arbeit, de hüm later beropen maakt hett. 1970 wurr he Reader (en Oord Perfesser ahn Lehrstohl) in Edinburgh, af 1980 weer he up en Personal Chair (en Utteknung för herutragen wetenschaplich Leistungen) Perfesser för theoretische Physik in Edinburgh. 1996 wurr he emeriteert.

Ehrungen[ännern | Bornkood ännern]

Higgs is Fellow vun de Royal Society of Edinburgh (1974), de Royal Society (siet 1983) un dat Institute of Physics (siet 1991). 1981 kreeg he mit T. W. B. Kibble de Hughes-Medaille vun de Royal Society, 1984 ebenfalls mit Kibble de Rutherford Medal vun dat Institute of Physics. 1997 kreeg he dorvan de Dirac-Medaille. 1997 kreeg he mit Robert Brout un François Englert den High Energy and Particle Physics Prize vun de European Physical Society un 2004 kreegen all dree den Wolf-Pries in Physik. 2010 wurrn Higgs, Robert Brout, François Englert, Gerald Stanford Guralnik, Carl Richard Hagen un T. W. B. Kibble mit den Sakurai-Preis ehrt. 2013 kreeg he gemeensam mit François Englert den Prinz-von-Asturien-Pries. Higgs is Ehrendokter vun de Universitäten vun Bristol (1997), Edinburgh (1998) un Glasgow (2002). 2013 kreeg he gemeensam mit François Englert den Nobelpries in Physik; all in dat Vörfeld wurr he as Favorit för den Nobelpries hannelt.[5]

Privates[ännern | Bornkood ännern]

Peter Higgs is Vader vun twee Söhns.

Wark[ännern | Bornkood ännern]

Bekannt wurr Higgs dör sien Arbeiten, de insbesünnere to de nah hüm nömmt Higgs-Mechanismus führen dee (rutbrocht 1964)[6]. Dorbi hannelt sück dat um en Verallgemeenerung vun de vun Philip Warren Anderson entwickelt Ideen to de Fastkörperphysik, insbesünnere to de Supraleitung, up de relativistische Quantenfeldtheorie.[7] Sien nahderhen beropen Arbeit wurr tonächst vun de europääsch Facktietschrift Physics Letters torüchwiest (nahdem de vörher allerdings en eerste Arbeit vun Higgs herutgeven harr, in de he up en Gliev in dat Goldstonetheorem henwiest harr). He hett denn de Arbeit in de US-amerikaansch Facktietschrift Physical Review Letters publizeert, wobi he in en Tosatz dat eerste Mal dat later nah hüm nömmt Higgs-Deelken nömmt hett.[8] De Arbeit is tonächst up Skepsis stött, hör Bedüüden wurr aber eerst vun Freeman John Dyson sehn, de Higgs 1965 to en Vördrag an dat Institute for Advanced Study in Princeton einlaaden dee. Unafhängig un tietgliek mit Higgs wurr de Effekt vun François Englert un Robert Brout in Brüssel as ok Gerald Guralnik, Carl Richard Hagen und T. W. B. Kibble an dat Imperial College in London opdeckt. As dat Standardmodell Enn’ vun de 1960er Johren entwickelt wurr, hett sück aber Higgs sien Naam för den Effekt dörsett,[9] de dormals bannig bekannt wurr. Nach Higgs sien Seggen funn he dormals aber kien Ansluss mehr an de störmisch Entwicklung vun de theoretisch Elementardeelkenphysik Anfang vun de 1970er Johren.[10]

Meest 50 Johr nah Higgs sien Verapenlichen hebbt Wetenschapler vun dat europääsch Karnforschenszentrum CERN seggt, dat hör dat an dat Large Hadron Collider eerstmals mit groot Wohrschienlichkeit gelungen weer, en Boson mit en Mass vun etwa 125 GeV/c² nahtowiesen, bi dat sück dat um dat lang söcht Higgs-Boson hanneln kunn.[11] Disse Nahwies gelung mit twee unafhängig Detektoren, den LHC-Experimenten ATLAS un CMS. Bi de Pressekonferenz, de an’ 4. Juli 2012 in’ CERN afhollen wurr, weer Peter Higgs sülvst anwesend

Literatur[ännern | Bornkood ännern]

  • Peter Higgs: My life as a boson. The story of the Higgs. In: Michael Duff, James Liu (Herutgever): 2001 - A spacetime odyssey. World Scientific, Singapur 2002, S. 86–89.

Weblenken[ännern | Bornkood ännern]

Peter Higgs. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. The University of Edinburgh: Peter Higgs: Curriculum Vitae, afropen an' 26. Oktober 2013.
  2. Nobelprize.org: The Nobel Prize in Physics 2013, afropen an' 26. Oktober 2013.
  3. http://www.telegraph.co.uk/science/science-news/3338770/Prof-Peter-Higgs-profile.html
  4. http://www.guardian.co.uk/science/2007/nov/17/sciencenews.particlephysics
  5. 2013 Predictions bi Thomson Reuters (sciencewatch.com), afropen an' 26. Oktober 2013.
  6. Peter Higgs: Broken symmetries, massless particles and gauge fields. In: Physics Letters. Band 12, 1964, S. 132. Peter Higgs Broken symmetries and the masses of gauge bosons. In: Physical Review Letters. Band 13, 1964, S. 508.
  7. Higgs wiest in sien in den Physical Review Letters verapenlicht Arbeit explizit up de Arbeit vun Anderson hen.
  8. Up Drängen vun den Referees Yōichirō Nambu nehm he to de tovör rutkommen Arbeit vun Englert un Brout Stellung.
  9. As eerster hett Benjamin Wiso Lee dat nee hypothetische skalare Deelken up de Rochester-Konferenz in [[Berkeley (Kalifornien)|]] 1966 nah Higgs nömmt, kiek de Mitteilung: Nobelist Steven Weinberg Praises Professor Carl Hagen and Collaborators for Higgs Boson Theory (Laudatio up Hagen an Rochester University).
  10. Ulrich Schnabel: Das Teilchen Higgs. Peter Higgs. In: Die Zeit. 4. September 2008
  11. [1], CERN experiments observe particle consistent with long-sought Higgs boson, Pressemitdeelen vun CERN van 4. Juli 2012, afropen an’ 25. Oktober 2013