Peter Courtland Agre

Vun Wikipedia
Peter Agre

Peter Courtland Agre (* 30. Januar 1949 in Northfield, Minnesota) is en US-amerikaansch Mediziner un Molekularbioloog, de 2003 den Nobelpries för Chemie tospraaken wurr.

Leven[ännern | Bornkood ännern]

Peter Agre hett en Chemiestudium an dat Augsburg College in Minneapolis (Minnesota) afslooten,ansluutend studeer he Medizin an de Johns Hopkins University in Baltimore (Maryland), an de he siet Januar 2008 ok lehrt.[1]

För dat Utforschen vun Kanälen in Zellmembranen wurr hüm 2003 tosommen mit Roderick MacKinnon (USA) de Nobelpries för Chemie tospraaken. Peter Agre kreeg den Pries för dat Opdecken vun Waterkanälen.

Dat de Zellen vun den Körper neben den unspezifischen Transport vun dat Water över de Zellmembran ok spezifische Kanäle för den Transport vun Water hemm mööt, hett man all Midden vun dat 19. Johrhunnert ahnt, den nipp un nauen Transportmechanismus hett man aber lang vergevens söcht. Eerst 1988 is Peter Agre dat gelungen, de molekularen Vörgänge in't Detail to entslööteln. He hett en Membranprotein isoleert, von dat he goot een Johr later utfinnen dee, dat dit de lang söcht Waterkanal ween muss. Wiedere Forschungen hemm sien Opdecken bestätigt – dat Protein hett Agre up Aquaporin för Waterpore dööpt. Dat hannelt sück um en groot Protein-Familie, as man hüüd weeten deiht – alleen in den minschlichen Körper wurrn elf verscheeden Varianten funnen. Disse entscheeden Opdecken vun den US-Forscher hett de Döör apen maakt to en ganzen Reeg vun biochemisch, physiologisch un genetisch Studien an Waterkanälen in Bakterien, Planten un Söögdeerter. Hüüd könnt de Forscher en Watermolekül up en Weg dör de Zellmembran in' Detail folgen. Dat verbetert dat Verständnis vun en Reeg vun Krankheiten (ünner annern vun de Niere, dat Hart, de Muskeln un dat Nervensystem).

In dat Johr 2000 wurr Agre to'n Liddmaat vun de National Academy of Sciences wählt. Siet 2011 is he utwärtig Liddmaat vun de Russische Akademie vun de Wetenschapen.

Weblenken[ännern | Bornkood ännern]

Peter Courtland Agre. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. Pressemitdeelen vun de Johns Hopkins University, 2007 (engelsch)