Pedra Lume

De binnere Deel vun Pedra Lume

Pedra Lume oder ok Pedra de Lume (vun’t port.: pedra „Steen“ un lume „Füer“) is en Dörp an de ööstlichen Küst vun’t Eiland Sal, een vun de negen bewahnten Eilannen vun de Republiek Kap Verde.

Geografie

Oorsprung vun’t Dörp: De Saline

Dat lütte Dörp liggt direkt an’n Atlantik in’n Oosten vun dat Eiland, ungefähr op lieke Hööch as Espargos, wat de Hööftstadt vun Sal is. Dat lütte Dörp süüt meist verlaten ut, man liekers leevt hier en poor Lüüd. Süüdlich vun Pedra Lume is de langtogen Baía da Parda, de an’n nöördlich End in en lüttere Bucht münnen deit. Un dor liggt ok Pedra Lume, as dat dor ’n beten wat schuulter is. De Küst ümto is tomeist steenig, man an’n Süüdrand vun’t Dörp gifft dat ok en lütt Stück Strand.

Na den Oort geiht blots de een Straat vun Espargos, dat villicht 5 km wiet weg is. Ümgeven is Pedra Lume vun sachte Bargens, de all vulkaansch tostannen kamen sünd. Dat sünd Aschenkegels, de noch vun de vulkaansch aktiven Tiet nableven sünd. De gröttste dorvun bargt en Saline binnen in sien meist kreisrunnen Krater. De Saline is natürlich entstahn, wieldat de Bodden vun den Krater neemlich en beten wat deeper liggt as de Waterspegel vun’n Atlantik. So kann dör den porösen Steen jümmer wedder Soltwater ut den Atlantik in den Krater insickern.

Historie

Solt hett lange Johren de Weertschap vun Pedra Lume bestimmt.

Dat Dörp Pedra Lume is möglicherwies de Oort mit de längsten Historie op dat Eiland Sal. Lange Johren hett sik nümms so recht üm dat wöstenoordig Eiland scheert, blots dat af un to mol en poor Schildkrötenjägers op Sal vörbikeken hebbt op de Söök na Büüt. Eerst End vun’t 18. Johrhunnert is dat Eiland dör Manuel António Martins Velho, de Ünnernehmer op dat Navereiland Boa Vista weer. He weer dat, de in Pedra Lume de Saline grünnt hett. Vun de vulkaansche Landschap un sünners den Vulkan mit de Soltpannen is ok de Naam vun dat Dörp afleddt.

Vun’n Oorsprung is de Saline vun Pedra Lume natürlich, man de Seen sünd künstlich noch ’n beten in schick brocht worrn un warrt vundaag över Röhren mitenanner verbunnen, üm de Saline beter nütten to künnen. Dat een lichter in de Saline rinkummt, is 1804 en Lock in de Kraterwand broken worrn. Wiel dat 19. Johrhunnert kemen denn ok de eersten Minschen, de sik dor ansiedelt hebbt. Ut de lieken Tiet stammt ok de lütte witte Kapell in’n Karn vun’n Oort.

Dat Solt weer to’n gröttsten Deel na Brasilien verköfft, man de Markt is denn inbroken, nadem hoge Schuultöll opslahn weern. Ne’n Opswung hett in’t 20. Johrhunnert de franzöösche Firma Les Salines du Cap-Vert brocht. De hett 1919 en Seelbahn boen laten, de vun de Saline na’n Haven föhrt hett. Se weer in de Laag bit to 25 Tünnen Solt to transporteeren. Vundaag staht vun de Seelbahn blots noch de Masten, un ok de Statschoon an’n Haven, woneem dat Solt verlaadt worrn is, is en en gresigen Tostand. De Solt-Export hett bit in de 1930er Johren anhollen, denn is dat jümmer weniger worrn. Vundaag warrt in Pedra Lume nich mol mehr noog Solt för’n Bruuk op Sal sülvst produzeert.

Weertschap

De Fischereehaven vun’t Dörp

De poor Minschen, de in Pedra Lume wahnt, leevt vör allen vun Fischfang. Ladens gifft dat in dat lütt Dörp nich. Wer wat köpen müch, mutt dorför na Espargos föhren.

De Soltprodukschoon hett hüüt keen grote Bedüden mehr, un de Saline is in de Twüschentiet ok in privaten Besitt. Dat gifft dor de Möglichkeit, in dat soltige Water to baden und to swemmen. Op’n Weg rünner to’n Grund vun’n Krater is en lütt Café, wo een sik ok na’t Baden afbrusen kann. De Saline warrt veel vun Touristen besocht, man anners wat kann man in Pedra Lume nich maken. De Strand is ok nich so fein as in’n Süden vun’t Eiland, bi Santa Maria. Dormit is de Tourismus opstunns ok noch keen Weertschapsfakter. Dorbi warrt aver al versocht, dat ’n beter to ännern.