Santa Maria (Kap Verde)
Santa Maria is en Stadt an de Süüdküst vun dat Eiland Sal in Kap Verde. De Stadt is vör allen bekannt as Anloopsteed op Kap Verde för den Strandtourismus.
Geografie
[ännern | Bornkood ännern]De Stadt liggt an de Süüdküst vun Sal direkt an Atlantik bi de Koordinaten 14° 56' 10" N, 25° 44' 14" W. Wat fröher mol as en weertschopplich intressanten Oort anfungen is, leevt vundaag vör allen dör de Touristen. Dat hett sik so entwickelt, wieldat de süüdliche Küst vun dat Eiland en kilometerlangem Sandstrand opwiest in Verbinnen mit warm un kristallklor Water vun den Atlantik. Woveel Minschen in de Stadt leevt is nich ganz kloor un ännert sik opstunns ok vun Johr to Johr. Tomindst gifft dat in ganz Kap Verde kuum en Stadt, woneem een so veel europääsche Touristen andrapen kann as in Santa Maria.
Dat Stadtbild warrt dorna denn ok prägt von Hotelanlagen, Restaurants, Bars un lütte Ladens, woneem de Inheemschen jemehr Mitbringels anpriesen doot. In de Mitt liggt de Havenkai, de jümmer wedder Touristen antehn deit, wenn de öörtlichen Fischers an’n fröhen Namiddag anleggen doot un jemehrn Fang an Land bringt. För denverlängerten Avend gifft dat ok dat en oder annere Nachtlokal.
Vun Santa Maria ut föhrt en tweesporig utboote Straat na Noorden, de na de annern Öörd op dat Eiland henföhrt un ok na’n internatschonalen Flaaghaven. Apentlich Verkehrsmiddel gifft dat op de ganzen Insel nich, man mit de Aluguers, en Oort Sammeltaxi, kann man den Rest vun dat Eiland besöken.
Historie
[ännern | Bornkood ännern]Santa Maria is 1830 dör Manuel António Martins grünnt worrn, de in de Neeg vun den Oort Salinen hett anleggen laten. Sal weer to de Tiet düchtig kostbor un hett an’n End dat Eiland ok sien Naam geven: Sal heet nix anners as Solt. De Salinen leegen to’n Deel bannig wiet af vun’n Haven.
Vun wegen, dat op dat Eiland blots teemlich wenig Foder to finnen weer, weer dat nich eenfach, Esels to hollen. För den Transport vun dat Solt hett Martins dorüm de eerste „Iesenbahn“lien op portugeesch Lannen inrichten laten, womit se an’n Dag bit to twee Tünnen Solt dör transporteeren kunnen. Dat weer en Wagen, de Segels un en Mast harr un dör den starken Passatwind andreven worrn is. De Segels weern ut Jutesäck maakt. Disse Bahn hett bit in de 1950er Johren lopen, bit se dör Treckers uttuuscht weer. De hebbt denn Solttransport övernahmen, bit 1984 de Saline stilllegt worrn is.
De Tourismus hett langsom in de 1960er Johren insett und weer vun de Regeeren siet Mitt vun de 1980er Johren ok föddert. Siet dem hett sik de Situatschoon ännert un en beten wat vun Wollstand hett sik verbreedt.
Weertschap
[ännern | Bornkood ännern].JPG)
De Weertschap vun Santa Maria is ganz op den Strandtourismus utricht. Jümmer mehr Hotelanlagen un Bungalows warrt langs vun de Stränn hoochtogen, wobi aver op dat Stadtbild Acht geven warrt. Rund üm Santa Maria gifft dat en wieten Strand, de veel Platz hett för Lüüd, de baden un sik sünnen wüllt. För Intressierte gifft dat Anbotten to’n Sportangeln, Duken, Surfen oder Schippfohrten. De Lüüd in de Stadt leevt vör allen vun de Gastronomie un de Deenstleisten rund üm den Touristen. De Ort sülvst hett bannig veel Ladens, de allerhand Saken veköpen doot, de mit de Eilannen to doon het.
Klima
[ännern | Bornkood ännern]Dat Klima op dat Eiland is för’n Strandtourismus wunnerbor. För de Planten dorgegen is dat nix. Op Sal hett een dat mit en Halfwööst to doon. Dat heet, dat op dat Eiland blots ganz wenig Regen fallen deit. De Regentiet is an sik vun Juli bi Oktober bringt aver nich veel Regen. Mitünner gifft dat ok mol dat ganze Johr keen Regen. De Temperaturen leegt in de Sommermaanden an’n Dag in’n Snitt bi 32°C, wobi dat hier in de Tropen natürlich keen Johrestieten gifft. Man, to’n Johresend to warrt dat en beten köhler. Dat Weder warrt bestimmt dör den Noordoostpassatwind, de bestännig ut de lieke Richt weiht. De Wind sorgt dorför, dat de Hitt hier nich ganz so dull is, as op de Eilannen wieter in’n Westen.
