Overhaken

Wapen/Flagg	Koort
Basisdaten
Bundsland: Hamborg Stadtbezirk: Bardörp Stadtdeel: Ossenwarder
Inwahners:
Postleettall:	21037
Vörwahl:	040
Geograafsche Laag:	53° 26′ N, 10° 6′ O

Overhaken (hoochdüütsch Overhaken) is en lütten Oort in’n Stadtdeel Ossenwarder (Bezirk Bardörp) in de Stadt Hamborg. Deelwies warrt dat Rebeed von Overhaken ok Overwarder nöömt.

Geografie

Overhaken liggt an’n Hauptdiek von de Elv, an de Grenz von de Maschlannen na de Veerlannen.

De Naveröörd sünd de Ossenwarder Elvdiek in’n Noorden, Fiefhusen in’n Noordoosten, Browisch un Rosenweid in’n Süüdoosten, Wuhlenborg in’n Süden, Over in’n Westen un Hagolt un Oortkaten in’n Noordwesten.

Historie

Overhaken weer fröher as Swansbusch en Insel in de Elv un leeg dichter bi dat linke Över as bi dat rechte. Dorüm hett dat Rebeed ok to Over tohöört. Dör Waterboarbeiden is dat Rebeed later denn aver an dat rechte Över anslaten worrn. Liekers is de Elvdiek en poor hunnert Meter in’n Oosten verlopen un Overhaken leeg butendieks. Eerst na de Stormflood 1962 is de ne’e Hauptdiek anleggt worrn, de nu dat Overhaker Vörland mit indiekt hett. De Hoff Overhaken liggt aver jümmer noch butendieks. Bi disse Diekboarbeiden is ok de Hogendieker See anleggt worrn, de nu dat Rebeed von dat Overhaker Vörland innimmt.

In de Johren 1920 is bi Overhaken en Ferienkolonie mit Ferienhüüs anleggt worrn.

Verwaltungsgeschicht

De Oort hett vör 1885 to de Vaagdie Neeland-Over in dat Amt Horborg tohöört. Na 1885 weer dat in’n Kreis Horborg. 1932 is dat Deel von’n ne’en, grötteren Landkreis Horborg worrn. Bet 1937 hett de Oort polietsch bi Over bihöört. Mit dat Groot-Hamborg-Gesett von 1937 is Overhaken denn aver von Over trennt worrn un is an Hamborg kamen.

Inwahnertall

Johr	Inwahners
1824-00-001824	2 Füürsteden
1848-00-001848	10 Lüüd, 2 Hüüs
1871-12-011. Dezember 1871	14 Lüüd, 2 Hüüs

Religion

Overhaken is evangeelsch-luthersch präägt un höört to dat Kaspel von de Pankratius-Kark in Ossenwarder. Fröher hett dat to dat Kaspel von de Mauritius-Kark in Hittfeld höört.

För de Kathoolschen is de St.-Marien-Kark in Bardörp tostännig.

Weertschop un Infrastruktur

Verkehr

De Straat an’n Hauptdiek föhrt von Overhaken in’n Noordwesten över Gauert na Ossenwarder un in’n Süüdoosten na Browisch, Wraust un Hoow.

De nächsten Autobahnen sünd de A 25 un de A 1. De Opfohrt 4 Nettelnborg op de A 25 liggt so teihn Kilometer in’n Noordoosten von Overhaken un de Opfohrt 34 Moorfleet op de A 1 so ölven Kilometer in’n Noordwesten.

De nächste Bahnhoff is so bi 13 Kilometer wied weg in’n Noordoosten de Bahnhoff Bardörp an de Bahnlien Hamborg–Berlin.