Neehoff (Hamborg)

Vun Wikipedia
Zur Navigation springen Zur Suche springen
Wapen/Flagg Koort
hett keen Wapen
Neehoff
Laag vun Neehoff in Düütschland
Basisdaten
Bundsland: Hamborg
Bezirk: Hamborg-Midd
Stadtdeel: Willemsborg
Inwahners:
Postleettall: 20457, 21107
Vörwahl: 040
Geograafsche Laag:
Koordinaten:53° 31′ N, 9° 58′ O
53° 31′ N, 9° 58′ O

Varendorfsche Koort von de Warders in’n Westen von dat Binnendelta von de Elv ut de Tied 1789 bet 1796
Blick över dat Industrierebeed in Neehoff (2013)

Neehoff (hoochdüütsch Neuhof) is en Warder in dat Binnendelta von de Elv un en Deel von’n Stadtdeel Willemsborg, Bezirk Hamborg-Midd, Hamborg. Neehoff weer fröher en Fischer- un Buurndörp, besteiht vondaag aver blots ut Industrieanlagen von’n Hambörger Haven.

Geografie[ännern | Bornkood ännern]

De Warder Neehoff is in’n Oosten dör den Reiherstieg von Willemsborg aftrennt, in’n Süden dör de Reth von Hogeschaar, Kattwiek un Krusenbusch, in’n Westen dör den Köhlbrand von Oolwarder un Waltershoff un in’n Noorden dör den Rosskanaal von Tolleroort un Steenwarder.

Historie[ännern | Bornkood ännern]

Dat Rebeed von Neehoff weer fröher Deel von Gorieswarder. Disse Warder is bi Stormfloden uteneen reten worrn. In dat 14. un 15. Johrhunnert hett sik de Köhlbrand billt un Neehoff na Westen hen aftrennt. Ok de Reiherstieg hett sik in disse Tied bi Stormfloden billt un Neehoff na Oosten hen aftrennt.

Op Neehoff, dat to de Tied Karkhoff nöömt worrn is, hett dat en Kark geven. Den Naam Neehoff hett de Warder eerst mit’n Stillhorner Rezess von 1672 kregen.[1]

Neehoff is fröher in de dree Öörd Reiherstieg, Reth un Köhlbrand indeelt worrn. Dat güng na de Elvarms, an de de Hüüs liggen deen.

1888 is op Neehoff de Oelkerswarft grünnt worrn. De Warft is in’n Mai 1991 in Kunkurs gahn. De Dreyer-Warft hett von 1840 bet 1895 bestahn. De Dreyer-Warft is denn as Max Oertz & Harder wieder bedreven worrn.

1897 is de Neehöver Kanaal twüschen Köhlbrand un Reiherstieg anleggt worrn.

Von 1911 bet 1914 hett de Neehöver Wahnstedensellschop 87 Wahnhüüs mit veer Etaaschen un alltohoop 966 Wahnungen för üm un bi 3000 Lüüd nee boot. In düsse Wahnungen sünd ok veel Lüüd intagen, de ut Stettin kemen un op de Vulkan-Warft arbeidt hebbt, de 1906 an’n Rosskanaal anleggt worrn is.

In’n Süden von’n Neehöber Kanaal hett sik de Olea GmbH ansiedelt, wat later de Oelwarken Julius Schindler ween sünd un vondaag de H&R AG. 1922 hebbt de Hanseaatschen Möhlenwarken ehren Bedriev opnahmen. Von 1924 af an is dat Kraftwark von de HEW boot worrn, dat 1926/1927 in Bedriev güng. Dat Kraftwark is mit Steenköhlen lopen, harr för de Spitzenlast aver ok en Dieselmotoor. 1983 hett dat Kraftwark dichtmaakt. In dat Johr is en lüttjere Anlaag boot worrn, de mit Swoorööl lopen dee. Dat ole Köhlenkraftwark is 1990 bet 1992 afreten worrn.

Annere Industrieünnernehmens in Neehoff sünd dat ADM-Wark Hamborg un de VOPAK.

Von 1912 af an hett dat en Iesenbahn-Trajekt von Waltershoff na Neehoff geven.

De Köhlbrandbrügg is 1970 boot worrn. 1974 is Neehoff to en Industrierebeed verkloor worrn. Düsse Entscheindung harr ok mit de Stormflood 1962 to doon, bi de Neehoff afsapen is. De olen Hüüs weren al vörher to en groten Deel verswunnen un dat Wahnrebeed von 1911 is denn bet 1979 bilütten ok afreten worrn.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Oolwarder in’n Kanton Willemsborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1859 de Vaagdie Neehoff in dat Amt Willemsborg billt. In dat Johr is dat Deel von dat Amt Horborg worrn. Na 1885 weer dat in’n Kreis Horborg.

De Oort is 1910 denn Deel von Willemsborg worrn. Willemsborg wedder is an’n 1. Juli 1927 mit Horborg to Horborg-Willemsborg tohoopgahn. To’n 1. April 1938 keem Horborg-Willemsborg mit dat Groot-Hamborg-Gesett an de Stadt Hamborg.

Inwahnertall[ännern | Bornkood ännern]

Johr Inwahners
1793-00-001793[2] 36 Füürsteden
1812-00-001812[3] 310
1824-00-001824[4] 42 Füürsteden
1848-00-001848[5] 542 Lüüd, 59 Hüüs
1871-12-011. Dezember 1871[6] 777 Lüüd, 82 Hüüs
1895-00-001895[7] 904

Religion[ännern | Bornkood ännern]

Neehoff is evangeelsch-luthersch präägt un hett fröher to dat Kaspel von de Gertrud-Kark in Oolwarder höört. 1921 is denn in Neehoff de Jakobi-Kark boot worrn. De Kark is to’n 1. Oktober 1976 wedder oplööst worrn. Sietdem höört dat Rebeed to de Karkengemeen von de Paul-Gerhardt-Kark in Willemsborg.

För de Kathoolschen is de St.-Bonifatius-Kark in Willemsborg tostännig.

Kultur[ännern | Bornkood ännern]

Verenen[ännern | Bornkood ännern]

De Sportvereen FTSV Neehoff is 1911 grünnt worrn. 1975 hebbt se den Vereen oplööst.

Weertschop un Infrastruktur[ännern | Bornkood ännern]

Verkehr[ännern | Bornkood ännern]

Över de Köhlbrandbrügg is Neehoff in’n Westen verbunnen mit Waltershoff. In’n Noordoosten geiht de Ellerholtbrügg na’n Lütten Grasbrook un in’n Süden de Rethbrügg na Hogeschaar. Mit Willemsborg in’n Oosten is Neehoff över de Reiherstiegbrügg verbunnen.

De nächste Autobahn is de Autobahn 7. De Opfohrt 30 Waltershoff liggt so veer Kilometer in’n Westen von Neehoff an de Finkwarder Straat. In’n Oosten besteiht över de Willemsbörger Rieksstraat Ansluss an de A 252 un A 253.

In Neehoff gifft dat en Reeg Industriegleise von de Hambörger Havenbahn. De nächsten Bahnhööv för den Personenverkehr sünd so bi teihn Kilometer wied weg in’n Noordoosten de Hauptbahnhoff Hamborg un negen Kilometer in’n Süüdoosten de Bahnhoff Horborg. Dichter bi sünd de Bahnhoff Willemsborg un de Bahnhoff Veddel von de S-Bahn-Hamborg (S 3/S 31), de all beid so bi fiev Kilometer weg sünd.

Scholen[ännern | Bornkood ännern]

De ole School von Neehoff is 1913 boot worrn. As de Wahnhüss in Neehoff in de Johren 1970 afreten worrn sünd, hett ok de School 1978 dichtmaakt un de School stünn leddig. 1990 is dat Gebüüd as Wahnhuus för Asylanten ümboot worrn, de dor bet 2007 leevt hebbt. Sietdem steiht dat Gebüüd leddig.

Footnoten[ännern | Bornkood ännern]

  1. http://www.museum-wilhelmsburg.de/index.php/geschichte/der-stillhorner-rezess-von-1672-von-reinhard-bosse.html
  2. Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 164: https://books.google.de/books?id=jN5QAAAAcAAJ&pg=PA164
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 45: http://books.google.de/books?id=Q 5OAAAAcAAJ&pg=PAXXS
  4. C. H. Jansen: Statistisches Handbuch des Königreichs Hannover. 1824, Sied 436: http://books.google.de/books?id=tG0AAAAAcAAJ&pg=PA436
  5. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 103: http://books.google.de/books?id=eOI-AAAAcAAJ&pg=PA103
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 130: https://books.google.de/books?id=qTZDAQAAMAAJ&pg=RA2-PA130
  7. http://www.gemeindeverzeichnis.de/gem1900/gem1900.htm?hannover/harburg.htm

Weblenken[ännern | Bornkood ännern]

Commons-logo.svg Neehoff (Hamborg). Mehr Biller, Videos oder Audiodateien to’t Thema gifft dat bi Wikimedia Commons.